Fakamanatu ki he Kau Mālōlō ʻEveʻevá
1 ʻE ʻi ai nai ʻa e ngaahi taimi te tau mamaʻo ai mei heʻetau fakatahaʻanga ʻoku tau kau ki aí lolotonga ʻa e mālōlō ʻeveʻevá, ʻo hangē ko e lolotonga ʻa e ʻalu ki ha Fakataha Fakavahe. Kapau te tau mavahe, ʻi he ngataʻanga ʻo e māhina taki taha ʻe fiemaʻu ke tau fakapapauʻi ke lī mai ʻetau līpooti ngāue fakamalangá ki he sekelitali ʻa e fakatahaʻangá. ʻOku totonu ke fai ʻeni ʻi ha taimi feʻunga ki muʻa ke fakakau ʻetau ngaahi līpootí ki he līpooti fakamāhina ʻa e fakatahaʻangá, ʻa ia ʻoku tānaki pea lī atu ʻe he sekelitalí ki he Sōsaietí ki muʻa he ʻaho hono ono ʻo e māhiná.
2 ʻE toe fiemaʻu foki ke tau tokanga ki he ngaahi faingamālie ke fai ha fakamoʻoni ʻikai ʻi he founga anga-mahení. ʻE hoko ʻa e ngaahi faingamālie pehē lolotonga ʻo e fefonongaʻakí, ʻaʻahi ki he ngaahi kāingá pe talanoa mo ha niʻihi kehe te tau fetaulaki. ʻOku tau vakai atu ki ha ngaahi faingamālie ke fai ha fakamoʻoni ʻo hangē ko ia naʻe fai ʻe Sīsuú? Naʻe ʻikai te ne taʻotaʻofi ia mei heʻene fai ha fakamoʻoni ʻikai ʻi he founga anga-mahení. (Sione 4:5-30) Naʻe fai pehē mo e ʻapositolo ko Paulá ‘ke ngaueʻaki ʻa e faingamalié’ pea maʻu mo ha ngaahi ola lelei. (ʻEf. 5:16; Ng. 17:17; 28:30, 31; Kol. 4:5) Fai ha palani pau ke kau ʻi he fakamoʻoni ʻikai ʻi he founga anga-mahení. ʻAi ke teuteu lelei ʻaki ha ngaahi tuʻunga fetalanoaʻaki feʻunga ʻe niʻihi pea ke toʻo maʻu pē ha makasini pe ko ha tuleki ke langaʻi hake ʻa e mahuʻingaʻiá.
3 ʻI he tokanga ke muimui ki he ngaahi fakamanatu ko ʻení, te tau fakapapauʻi ke ngāuefakapotopotoʻaki ʻa e taimi ʻo ʻetau mālōlō ʻeveʻevá pea te tau ʻoatu ʻa e “uluaki fua” kia Sihova.—Pal. 3:9, PM.