Puha Fehuʻi
◼ Ko e hā ʻa e kofu ʻoku taau ke ʻai ʻi he teu ke te papitaisó?
Neongo ʻoku kehekehe ʻa e ngaahi tuʻunga ki he kofú ʻi he ngaahi feituʻu kehekehe ʻi he māmaní, ka ko e ekinaki ʻa e Tohitapú ke ʻai ʻa e kofú ke “ō mo e angamā mo e angafakamaʻumaʻu” ʻoku kei tuʻu tatau pē ia ki he kau Kalisitiane kotoa pē tatau ai pē pe ko e fē ʻa e feituʻu ʻoku nau nofo ai. (1 Tīm. 2:9) ʻOku totonu ke ngāueʻaki ʻa e tefitoʻi moʻoni ko ʻení ʻi hono fakakaukauʻi pe ko e hā ʻa e kofu totonu ki he papitaisó.
ʻI he Watchtower, Sune 1, 1985, peesi 30, ʻoku fakahā ai ʻa e akonaki ko eni ki ha taha ʻoku teu papitaiso: “ʻOku pau ʻoku totonu ke hā ʻa e fakanānā ʻo kau ki ha faʻahinga teunga kaukau ʻe tui. ʻOku mahuʻinga ʻa e meʻá ni koeʻuhi he ʻi he ʻahó ni ʻoku ngalingali ʻoku loto ʻa e kau faʻu sīpingá ke fakaʻaiʻai ʻa e anga taʻetaaú mo ʻai ke meimei aʻu ki he tuʻunga telefua. Ko e toe meʻa ʻe taha ke fai ha fakakaukau ki aí ʻoku ʻi ai ʻa e ngaahi vala kaukau ʻoku hā lelei ʻi heʻene kei matuʻú ka ʻoku ʻikai ke pehē ʻi heʻene vikú. ʻOku ʻikai totonu ki ha taha ʻe papitaiso ke ne hoko ko e fakatupunga ʻo ha fakaleluʻi pe fakatūkiaʻanga ʻi he meʻa mamafa ko ʻeni ko e papitaiso.—Fili. 1:10.”
ʻI he fehoanaki mo e faleʻi ko ʻení, ʻe fiemaʻu kiate kinautolu ʻe papitaisó ke nau ʻai ʻa e kofu taau, ʻo manatuʻi maʻu pē ʻa e mahuʻinga ʻo e meʻa ko ia ʻoku hokó. Ko ia, ko ha vala kaukau ʻoku meimei hā kotoa pē ʻa e kilí pe ko ha vala ʻoku pipiki ki he sinó ʻi heʻene vikú ʻoku ʻikai ko e vala taau ia pea ʻoku totonu ke ʻoua ʻe tui ia ʻe ha Kalisitiane. Pehē pē, ʻe ʻikai ke taau foki ke te ʻai ʻa e teunga ʻoku mafuefue pē taʻemaau. ʻIkai ko ia pē, heʻikai ke feʻunga ke tui ha falani ʻoku tohi ai ha ngaahi kupuʻi lea fakaemāmani pe ngaahi kananga fakakomēsiale.
ʻI he taimi ʻe fai ai ʻe he kau mātuʻa kuo filí ʻa e fakamanatu ʻo e ngaahi fehuʻi ki he papitaisó mo e tokotaha ʻoku teu papitaisó, ʻe hoko ko e taimi lelei ia ke fai ha fetalanoaʻaki ʻo kau ki he mahuʻinga ʻa hono tui ʻa e kofu ʻoku taaú. Ko e founga ʻeni ʻe malava ke tauhi ai ke mamalu ʻa e taimi ko iá, pea te tau hokohoko atu ke tuʻu ʻo mavahe atu mei he māmaní.—Fehoanaki mo Sione 15:19.