Tō ke Hulu Atu Kae Fai ʻi he ʻIloʻilo
1 ʻOku ʻilo ʻe he kau tō ngoue kotoa pē kapau ʻe hulu ʻene tō ʻa e tengá, ʻoku ngalingali ʻe hulu ʻa e meʻa te ne utu ʻi he utu-taʻú, ka ʻo kapau ʻe fakasiʻisiʻi ʻene toó, ʻoku pau ke siʻisiʻi ʻa e meʻa te ne utú. (2 Kol. 9:6) ʻOku tokanga lahi ʻa e kau tō ngoué ke ʻoua ʻe maumauʻi ʻenau tengaʻi ʻakaú ʻi haʻanau tō ʻi ha feituʻu he ʻikai malava ke tupu ai ha meʻa. ʻOku pehē pē ʻa e tokanga ʻoku fie maʻu ʻi he taimi ʻoku tau tuʻuaki ai ʻetau ngaahi tohí ʻi he ngāue fakamalangá. ʻOku tau loto ke tuku atu ʻa e ngaahi tohí kiate kinautolu ʻoku nau fie lau iá. ʻOku totonu ke tau tuku atu kiate kinautolu ʻoku taaú ha faingamālie ke ako ʻo kau ki he ʻofa maʻataʻatā ʻa Sihová mo e ʻamanaki fekauʻaki mo e Puleʻangá.
2 ʻOkú ke ʻilo kuo fokotuʻunga lahi ʻi hoʻo tukuʻanga tohi ʻi ho ʻapí ʻa e ngaahi makasini, ngaahi polosiua, mo e ngaahi tohi kehe ʻa ia ʻe lava ke ngāueʻaki ke fakahoko kiate kinautolu ʻoku taaú ʻi ho feituʻú ʻa e ʻilo ʻo kau ki he moʻoní? (Fakafehoanaki mo Mātiu 25:25.) ʻOkú ke taʻotaʻofi ʻi he taimi ʻe niʻihi mei hono tuʻuaki ʻo e ngaahi makasiní pe ngaahi tohi kehé ʻi hoʻo ʻuluaki ʻaʻahí koeʻuhi ʻoku faingataʻa kiate koe ke fakahā ʻa e anga hono poupouʻi ʻo e ngāue fakamalanga fekauʻaki mo e Puleʻangá? Kuo ʻilo ʻe he kau malanga taukeí ʻoku lelei ʻa e anga ʻo e tali ʻa e kakai loto-houngá ʻi hono fakamatalaʻi hangatonu mo nounou ʻa e anga hono ngāueʻaki ʻa e ngaahi tokoni ʻoku maʻú ki he ngāue fekauʻaki mo e Puleʻangá.
3 Te ke lea pehē ni nai:
◼ “ʻOkú ke fifili nai pe ʻoku malava fēfē hono tuʻuaki ʻa e ngaahi tohí ʻo ʻikai ha totongí. Ko e konga ia ʻo e ngāue fakaeako ʻi māmani lahi ʻa ia ʻoku poupouʻi ʻaki ʻa e ngaahi tokoni loto-fiefoaki. Kapau te ke fie fai ha kiʻi tokoni ki he ngāué, te u fiefia ke tali lelei ia.”
4 Ko e tokolahi ʻo e kakaí te nau ʻeke pe ʻoku fiha ʻa e totongi ʻo e ngaahi tohí.
Te ke tali pehē ni nai:
◼ “ʻOku ʻikai ke ʻi ai ha totongi ki he ngaahi tohí koeʻuhi ko ʻemau ngāué ʻoku poupouʻi ia ʻi he ngaahi tokoni loto-fiefoaki. Kapau te ke saiʻia ke fai ha kiʻi tokoni he ʻahó ni, te mau fiefia ke fakapapauʻi ʻe ngāueʻaki ia ki he ngāue fakamalanga ʻi māmani lahí.”
Pe te ke lea pehē ni:
◼ “ʻOku mau ʻai ke ala maʻu ʻemau ngaahi tohí ʻe kinautolu kotoa pē ʻoku fie ako lahi ange ʻo kau ki he Tohi Tapú. Kapau te ke saiʻia ke fai ha kiʻi tokoni ki he ngāue ko ʻeni ʻi māmani lahí, te u fiefia ke ʻoatu ia ki ai maʻau.”
5 ʻI he ngāue makasiní ʻoku ʻi ai ʻa e kau malanga ʻe niʻihi ʻoku nau fakahā ʻa e peesi hono ua ʻo e makasiní ʻo nau pehē:
◼ “Hangē ko ia ʻokú ke vakai ki ai hení, ʻoku poupouʻi ʻemau ngāué ʻaki ʻa e ngaahi tokoni loto-fiefoaki. Kapau te ke saiʻia ke fai ha tokoni siʻisiʻi ke tokoni ki he ngāue ko ʻení, te u lava ke fakahoko ia.”
Ko e toe fakamatala faingofua ʻe taha ke fai:
◼ “Neongo ʻoku tuʻuaki ʻemau ngaahi tohí ʻo ʻikai ha totongi, ka ʻoku mau tali lelei ha tokoni siʻisiʻi ki heʻemau ngāue ʻi māmani lahí.”
6 ʻOku totonu ke ʻoua te tau toupīkoi mei hono tō ʻa e tenga fekauʻaki mo e Puleʻangá koeʻuhi ko ʻetau toumoua ke lave ki he anga ʻo hono fakapaʻanga ʻetau ngāué. ʻI he taimi tatau pē, ʻoku fie maʻu ʻa e ʻiloʻilo ke ʻoua ʻe fakamole noa ʻetau ngaahi tohí ʻi ha ‘kelekele makamaka.’ (Mk. 4:5, 6, 16, 17) Ko kinautolu ʻoku nau houngaʻia ʻi he ongoongo lelei ʻoku tau malangaʻí ʻoku nau fiefia ʻi he maʻu ha faingamālie ke tokoni fakamatelie ki ai.—Fakafehoanaki mo Mātiu 10:42.