Tokoniʻi Kinautolu Kotoa Naʻe Hā mei Ai ʻa e Mahuʻingaʻiá

¹ Ko ʻetau tuí mo ʻetau ʻofa ki he niʻihi kehé te ne ueʻi kitautolu ʻi Māʻasi ke tokoni mo fakaafeʻi ki he Fakamanatú ʻakinautolu hono kotoa naʻa nau fakahā ʻa e mahuʻingaʻia ʻi he pōpoaki ʻo e Puleʻangá. ʻOku fiemaʻu ki he faʻahinga peheé ke taki ki he tokonaki ʻa Sihova ki he fakamoʻuí, ʻa ia ʻoku fakatuʻunga ʻi he feilaulau huhuʻi ʻa Kalaisí.​—Hepelū 9:28.

² Ko ha fakakaukau lelei ke ʻai ha fakahokohoko ʻo e faʻahinga ʻokú ke fie fakaafeʻi mai ki he Fakamanatú. Fakakau ki ai mo e faʻahinga ʻoku maʻu maʻu pē ʻa e ngaahi fakatahá pea pehē ki he faʻahinga naʻa nau ako ki muʻa atu pe fakahā ʻa e mahuʻingaʻiá ʻi ha ngaahi founga kehe. ʻOua naʻa ngalo ʻa e ngaahi hoa ʻoku ʻikai ke tuí mo e ngaahi mēmipa kehe ʻo e fāmilí. ʻI he ʻosi hono hiki ʻa hoʻo fakahokohokó, fai ha feinga makehe ke ʻalu ki he tokotaha taki taha. Te ke loto nai ke kole ki he kau mātuʻá ha tokoni kiate koe ʻi he ngaahi ʻaʻahi ʻe niʻihi.

³ Ko e hā ʻe malava ke ke leaʻaki ʻi he ʻaʻahí?

ʻI he ʻosi ha lea fakafeʻiloaki māfana, ʻe lava ke ke lea ʻo hangē ko ʻení:

◼ “Naʻá ke fakahā ʻa e mahuʻingaʻia ʻi he ngaahi mea fakalaumālié ʻi he kuo hilí, pea kuo u fakakaukau te ke houngaʻia ki he fakaafe ko ʻeni ki ha fakataha makehe. [ʻOange ki he tokotaha-ʻapí ʻa e lauiʻi tohi fakaafe kuo pulusi ki he Fakamanatú.] Ko e Fakamanatu ʻo e pekia ʻa Kalaisí ko e meʻa pē ia ʻe taha naʻe tuʻutuʻuni ʻe he ʻEiki ko Sīsū Kalaisí ki hono kau muimuí ke nau fakamanatu. ʻOku tau ʻamanaki atu ke toe vakai ki he meʻa naʻe lavaʻi ʻe Kalaisi ʻi heʻene pekiá pea mo e founga ʻe lava ke tau maʻu ai ʻa e moʻui taʻengatá. ʻI he taʻu kuo ʻosí, naʻe lahi hake ʻi he toko 11 miliona naʻa nau kau ki he fakataha makehe ko ʻení. Te u fiefia ke kau fakataha mo koe ki ai ʻi he taʻú ni.” Fakapapauʻi ke ke tohiʻi ʻa e taimi mo e feituʻu ʻe fai ai ʻi hoʻo fakatahaʻangá ʻa e Fakamanatú. ʻIkai ngata ai, tala ange te ke ʻoatu ha meʻalele ke haʻu ai, kapau ʻoku fiemaʻu.

⁴ ʻI he haʻu ʻa e kau foʻoú ki he Fakamanatú, ʻoku totonu ke talitali lelei kinautolu. Tokoniʻi ke nau maheni mo e kau malanga fakalotofonuá pea fakafeʻiloaki kinautolu ki ha faʻahinga mahuʻingaʻia ʻoku nofo ofi atu nai ki honau ʻapí. ʻE fakalototoʻa ia kiate kinautolu ke ʻilo ʻoku ʻi ai ha kakai ʻi honau feituʻú ʻoku mahuʻingaʻia ʻi he moʻoní. Kapau ʻe malava, fakaafeʻi kinautolu ke nofo fakataha mo ho fāmilí ʻi he Fakamanatú.

⁵ Ko e moʻoni, ʻe ʻikai fakapapauʻi ai ʻa honau fakamoʻuí ʻi he haʻu pē ki he Fakamanatú. Ka ki he tokolahi te ke fakaafeʻí, ʻe lava ke hoko ko ʻenau ʻuluaki lākanga ia ki he tui ki he taʻataʻa ʻo Sīsū naʻe lilingí. ʻI he foki mei he fakatahá ki ʻapí, ʻeke ki he tokotaha ʻaʻahí pe ʻe saiʻia ke haʻu ki he Fakataha ʻoku fai ai ʻa e Malanga Fakahāhaá mo e Ako Taua Leʻo ʻi he Sāpate hono hoko maí. ʻAi ke loto-tatau mo anga-fakakaumeʻa. ʻAi ke ne ʻilo ʻokú ke loto-lelei ke tokoni ʻi ha founga ʻe malavá. Ko e vave ange ʻa ʻene kamata ke feohi maʻu pē mo kitautolú, ko e vave ange ia ʻa ʻene fakalakalaka fakalaumālié. Ko ha fiefia lahi ē mo ha fiemālie te tau maʻu ke hao moʻui atu ʻi he “fakamamahi lahi” fakataha mo e tokolahi kehe naʻa tau malava nai ʻo tokoniʻí!​—Fakahā 7:​9, 14.