Puha Fehuʻi
◼ Ko e hā ʻa e fakapotopoto ʻoku fiemaʻu kiate kitautolu ʻi heʻetau ngāue ʻi he feituʻu ʻoku fakatuʻutāmakí?
1 ʻOku fakautuutu ʻa ʻetau fanongo ki he ngaahi ongoongo ʻo e fakamālohí, ngaahi kaihaʻasiá, mo e ngaahi taʻemanonga ʻi he nofo ʻa e kakaí, tautefito ki he nofo fakaekoló. Neongo ʻoku tau tokanga ki ai, ka ʻoku tau ʻilo naʻa mo e ngaahi feituʻu taʻemanongá, ʻoku ʻi ai ʻa e kakai loto-moʻoni te nau tali ʻa e pōpoaki ʻo e Puleʻangá. Ko ia ʻi ha taimi ʻoku feʻungamālie, kuo pau ke tau tuʻu lototoʻa ʻo tutui atu ʻetau ngāue fakamalangá, ʻo falala pau ki he maluʻi ʻa Sihová.—Pal. 29:25; 1 Tes. 2:2.
2 ʻI heʻetau ʻalu ki ha feituʻu ʻoku mātuʻaki ngali fakatuʻutāmakí, ʻoku ʻamanekina ʻe Sihova meiate kitautolu ke tau fakapotopoto mo ngāueʻaki ʻa e fakakaukau leleí. Ke tokanga. “Ko e fakapotopoto ʻoku ne sio ki he kovi, ʻo ne toi: ka ko e hehemangofua ʻoku nau laka atu pe, ʻo moʻua ai.” (Pal. 22:3) ʻOku houngaʻia ʻa e kau malanga taukeí ʻi he fakapotopoto ʻo e ngāue fakataha ʻo tauhoá pe naʻa mo e fakakulupu ʻo e kau malanga kehekehe, kapau ʻoku malava. ʻOku pehē ʻi he Koheleti 4:9, 12: “ʻOku ngutuhuaange ke toko ua ʻi heʻete toko taha . . . Kapau ʻe ʻohofia toko taha ʻa Meʻa, ʻo lava, kuo ne matuʻu nai, ʻoka ne toko ua.” ʻOku faʻa fakasio ʻa e kau faihiá kiate kinautolu ʻoku nau taka tokotahá mo faingofua ange ke ngaohikoviʻí.
3 Ke mātuʻaki tokanga ʻaupito ʻo fekauʻaki mo e ʻalu ki ha ngaahi fale ʻoku fakapoʻuli ʻa e ngaahi hala vahaʻa lokí mo e ngaahi sitepu ʻoku ʻikai ke ʻi ai ha kakaí. ʻOua ʻe fakakikihi mo kinautolu ʻoku hā ngali kehe pe fakatupu ʻita nai. Fakavave ke ʻai ke ʻiloʻi ko e taha koe ʻo e Kau Fakamoʻoni ʻa Sihová. Ko e kau malanga ʻe niʻihi ʻoku nau toʻotoʻo maʻu pē ha Tohi Tapu pe ko e makasini Taua Leʻo pe ko ha Awake! ko e taumuʻá ke ʻiloʻi ai kinautolu.
4 Fakatokangaʻi ʻa e faʻahinga ʻoku nau nofo noaʻia holo pē. Ke tokanga ʻo fekauʻaki mo e hū ki ha lifi fakataha mo e niʻihi ʻoku hā ngalingali ʻoku ʻikai te nau nofo ʻi he fale ko iá. ʻOua te ke ngāueʻaki ha ngaahi meʻa teuteu mahuʻinga. Kapau te ke fononga ʻi he poʻulí, fakaʻehiʻehi mei he fononga ʻi he ngaahi hala ʻoku fakapoʻulí pea ʻoku ngaongaó. Kapau ʻoku kaihaʻasia fakamālohi koe, ʻoua te ke talitekeʻi kapau ko hoʻo paʻangá pē pe ngaahi meʻa ʻokú ke maʻú ʻoku nau fiemaʻú; ʻoku mahuʻinga lahi ange ʻa hoʻo moʻuí ʻi ha meʻa fakamatelie ʻokú ke maʻu.—Mk. 8:36.
5 ʻOku fiemaʻu ke tokanga ʻa e ngaahi tokoua ʻoku nau takimuʻá, mo ʻiloʻi ʻa e kauhala ʻoku ngāue ai ʻa e kau malangá ʻi he feituʻu ko iá. ʻOku faʻa lelei taha ke ngāue fakataha pē ʻa e kulupú ʻi he feituʻu tatau koeʻuhi ke nau vāvāofi pē. Kapau ʻe hoko ha faʻahinga fakamālohi pe maveuveu ʻi he feituʻu ko iá, ʻoku totonu ke mavahe leva mei ai ʻa e kulupú ia.
6 Kapau te tau tokanga mo fakapotopoto, ʻoku lava ke hokohoko atu ʻa ʻetau aʻu kiate kinautolu ʻi he ngaahi feituʻu ʻoku lahi ai ʻa e faihiá ʻa ia ʻoku nau “mapuhoi mo toʻe koeʻuhi ko e ngaahi fakalielia ʻoku fai.”—ʻIsi. 9:4.