Tokanga ki Hoʻo Founga Faiakó
1 Ko e polokalama Ako Fakafaifekau Fakateokalati foʻoú ʻe kamata ia ʻi Sanuali 1995. Ko e hā ʻe lava ke fai ke fakaleleiʻi ange ai ʻa e Ako Fakafaifekau Fakateokalati ʻi hoʻo fakatahaʻanga fakalotofonuá?
2 Teuteu Lelei: ʻOku fēfē ke ke vaheʻi ha taimi ʻi he uike taki taha ke fakamanatu ai ʻa e fakamatala kuo vaheʻi ʻa ia ʻe lave ki ai ʻi he Ako Fakafaifekau Fakateokalati ki he uike ko iá? ʻE tokoni ʻeni kiate koe ke ke maʻu ai ʻa e ʻaonga lahi taha ʻe malava mei he fakamatala kuo vaheʻi ke fai ʻi he malanga taki taha. Kapau ʻoku maʻu ʻe he fāmilí kotoa ʻa ʻenau tatau ʻi he ngaahi tohi ʻe ngāueʻakí pea nau haʻu mo ia ki he fakatahá ʻe tokoni ia kiate kinautolu ke lahi ange ai ʻa e meʻa ʻe maʻu mei he akó.
3 Lau Tohi Tapu Fakatupu-Fakakaukau: Ko e lau tohi leleí mo e fakamamafa totonú mo e ongoʻí, ko e konga mahuʻinga ia ʻo e faiako ola leleí. Tānaki atu ki ai, ko e fakamatala kuo vaheʻi ke lau ʻi he Malanga Fika 2 ʻoku ʻikai ke fuʻu lahi, pea ʻoku faʻa maʻu ai ʻa e taimi feʻunga ki he lea kamatá mo ha lea fakaʻosi ʻa e tokotaha akó. Ko e lea kamatá ʻoku totonu ke ne langaʻi ʻa e mahuʻingaʻia ki he fakamatala kuo vaheʻí mo teuteuʻi ʻa e kau fanongó ke nau ʻilo ʻa hono mahuʻingá. Ko e lea fakaʻosí ʻe kau nai ai ha ngaahi fakamatala fakamaʻalaʻala mo hono ngāueʻaki ʻa e fakamatalá, mo ngāueʻaki kakato ʻe he tokotaha akó ʻa e taimi ʻoku kei toé.
4 Ko ha fakamatala lahi ange ʻi he polokalama akó mo e anga ʻo hono fai ʻo e ngaahi konga kuo vaheʻí ʻe lava ke maʻu ia ʻi he “Fakahokohoko Ako Fakafaifekau Fakateokalati ki he 1995.” ʻOku tau tokanga ki heʻetau founga faiakó ʻaki hano fakamanatu ʻa e ngaahi fakahinohino ʻi he fakamatala ko ʻení, mo ngāueʻaki ʻa e enginaki ʻoku ʻomai kiate kitautolú, koeʻuhi ke fakaleleiʻi ange ai ʻetau pōtoʻi ʻi he leá mo e faiakó. Ko kinautolu ʻoku teʻeki ai ke nau kau ki he akó ʻoku fakaafeʻi loto-māfana atu ke mou kau mai ki ai.