Fakaafeʻi ʻa e Niʻihi Kehé ke Muimui kia Sīsū Kalaisi
1 Naʻe tala ʻe Sīsū ki heʻene kau ākongá ʻo hangē ko ia kuo hiki ʻi he Mātiu 5:14: “Ko kimoutolu ko e māma ʻo mamani.” Ke tala ʻe he kau muimui ʻo Sīsuú ki he kakai ʻi he feituʻu kotoa pē ʻo fekauʻaki mo e Puleʻanga ʻo Sihová mo ʻEne tokonaki ʻofa ki he fakamoʻuí ʻo fakafou mai ʻia Sīsuú. ʻI heʻetau fakakaukau ki he ngāue kuo vaheʻi maí, ʻi he lolotonga ʻo e māhina Tīsemá ʻoku tau ʻamanaki ke tuʻuaki atu ʻa e Ko ʻEku Tohi ʻo e Ngaahi Talanoa Faka-Tohitapú. Ko ha ngaahi fokotuʻu ʻeni te ke fiemaʻu nai ke ngāueʻaki.
2 ʻI he ʻosi ʻa hoʻo fakafeʻiloakí, ʻe lava ke ke ngāueʻaki ʻeni ʻi hoʻo ngaahi lea pē ʻaʻau:
◼ “Kuo fifili ʻa e tokolahi pe ʻe anga-fēfē haʻanau fakamatala ʻi ha founga faingofua ki heʻenau fānaú ʻa e ngaahi talanoa fakaofo lahi ʻoku hā ʻi he Tohi Tapú. Ko e tohi fakamānako ko ʻení, Ko ʻEku Tohi ʻo e Ngaahi Talanoa Faka-Tohitapú, ʻoku lave ia ki he ngaahi talanoa tefito ʻoku hā ʻi he Folofola ʻa e ʻOtuá ko e Tohi Tapú. ʻI he hili hono lau iá, ʻoku pehē ʻe he niʻihi kuo nau maʻu ha mahino lelei ange ʻo e pōpoaki fakalūkufua ʻoku ʻi he Tohi Tapú.” ʻI he hili hono fakaʻaliʻali ʻa e niʻihi ʻo e ngaahi fakatātā fakaʻofoʻofa ʻi he tohí, huke ki he lea kamatá, pea lau ʻa e palakalafi hono uá. Kapau ʻoku tali lelei, tuʻuaki ʻa e tohí.
3 Pe te ke leaʻaki nai ha meʻa hangē ko ení ʻo pehē:
◼ “ʻI he lolotonga ʻo e taimi ko ení ʻoku fakakaukau ʻa e kakaí ʻo fekauʻaki mo Sīsū. Kae kehe, koeʻuhi ko e fuʻu lahi ʻa e ngaahi meʻa kovi kuo hoko ʻi māmani lahí, ʻoku fifili ai ʻa e niʻihi pe ʻoku tokanga moʻoni mai ʻa Sīsū ʻo fekauʻaki mo kitautolu. ʻOku anga-fēfē haʻo fakakaukau ki he meʻa ko iá?” Tuku ke ne tali. Huke ki he talanoa 101 ʻi he tohi ʻo e Ngaahi Talanoa Faka-Tohitapú, pea fakamatala fuonounou ʻa e ʻuhinga naʻe haʻu ai ʻa Sīsū ki māmaní. Pea lau ʻa e Sione 15:13, ʻo fakamamafaʻi ʻa e langa ʻa e fatu ʻo Sīsuú ʻi he ʻofa ki he niʻihi kehé. Manatuʻi ke ʻave ʻa e ngaahi makasini fakamuimui tahá, ko ha polosiua, ko ha kiʻi tohi pe ko ha tuleki ʻoku feʻungamalie ke tukú kapau ʻe ʻikai ke tali ʻa e tohí ia.
4 Ko ha fokotuʻu ʻeni ʻe taha:
◼ “Ko e kau talavou tokolahi taha ʻoku nau vakavakai ki ha ngaahi ʻulungaanga ke faʻifaʻitaki ki ai, ka ʻoku faingataʻa ke maʻu ʻa e faʻifaʻitakiʻanga leleí ia. Naʻe fokotuʻu ʻe Sīsū Kalaisi ʻa e faʻifaʻitakiʻanga haohaoa ki he tokotaha kotoa pē. [Lau ʻa e 1 Pita 2:21.] Ko e kotoa ʻo ʻene moʻuí naʻe uhoʻaki ia ʻa e lotu ki heʻene Tamai fakahēvaní. ʻOkú ke pehē ʻe anga-fēfē, kapau ʻe tokolahi ange ʻa e kakai ia te nau feinga ke faʻifaʻitaki ki aí?” Tuku ke ne tali. Lave ki he palakalafi fakaʻosi ʻi he talanoa 96, ʻa ia ʻokú ne fakamatalaʻi ʻa hono ngaahi ʻulungaanga makehé. Fakamatala ki he anga ʻo e tokoni ʻa e tohi ʻo e Ngaahi Talanoa Faka-Tohitapú kiate kitautolu hono kotoa ke tau hoko ai ko e kau Kalisitiane lelei ange.
5 Te ke saiʻia nai ke ngāueʻaki ha meʻa ʻo hangē ko ʻení:
◼ “ʻI he lave ʻa ha tokotaha kia Sīsū Kalaisí, ʻoku fakakaukau ʻa e kakai tokolahi ko ha kiʻi valevale pe ko ha tangata faingataʻaʻia ia ʻoku ʻamanaki mate. Ko ʻenau fakakaukau kia Sīsuú ʻoku fekauʻaki pē ia mo hono fanauʻí mo ʻene pekiá. Ka ko e hā ʻoku lolotonga faí ni ʻe Sīsuú pea ko e hā te ne fai ki he faʻahinga ʻo e tangatá ʻi he kahaʻu ofi maí?” Huke ki he talanoa 114 mo e talanoa 115 ʻi he tohi ʻo e Ngaahi Talanoa Faka-Tohitapú, pea lau ʻa e Fakahā 21:3, 4. Fakamatala ki he founga ʻe maʻu ai ʻa e tohí pea ngāueʻaki ia ki he ako fakafoʻituituí.
6 ʻOua naʻa ngalo ke tauhi ha lēkooti ʻo e kau fiefanongó mo e tohi naʻe tukú koeʻuhi ke ke lava ʻo toe ʻaʻahi ki ai. Lolotonga ʻa e taimi ʻoku kei toé, tau kumi faivelenga ki he kakai loto-totonú ʻo tokoniʻi kinautolu ke nau hoko ko e kau muimui ʻo hotau Fakamoʻui, ko Sīsū Kalaisí.—Mt. 16:24.