Ko e Folofola ʻo e Puleʻangá​—Maʻu ʻa Hono ʻUhingá

¹ ʻI he talanoa fakatātā ʻo e tangata tūtuuʻí, naʻe pehē ʻe Sīsū ko e tenga naʻe tō “ki he kelekele lelei” naʻá ne fakatātaaʻi ʻa “ia oku ne fanogo ki he folofola, bea tokagaʻi” ʻa hono ʻuhingá. (Mt. 13:​23, PM) ʻI he ʻosi ʻo e fanongo ʻo fekauʻaki mo e Puleʻangá, kuo tau “tokagaʻi” ʻa hono ʻuhingá? Ko e hā ʻa hono lahi ʻene tākiekina ʻa ʻetau moʻuí? Kuo tau fakamuʻomuʻa ʻa e ngaahi meʻa mahuʻinga ʻo e Puleʻangá, ʻo hā ai ʻoku tau maʻu ʻa e ʻuhinga ʻo e pōpoakí?

² Ko e maʻu ʻa e ʻuhinga totonu ʻo e pōpoaki ʻo e Puleʻangá ʻoku fiemaʻu ʻa e ako fakafoʻituitui. ʻOku fiemaʻu ke tau vaheʻi ha taimi ke fakalaulauloto ai ki he meʻakai fakalaumālie kuo tokonaki maí. Ko e lau fakavavevave ʻo e Taua Leʻo ʻoku hangē ia ko hano folo fefeka ha meʻakai ifo mo fakatupu-sino. ʻOkú ke vaheʻi ha taimi ke fai ai ha tokanga fakaʻāuliliki ki he meʻakai fakalaumālié? Ke maʻu ʻa e ʻaonga lahi tahá, kuo pau ke ueʻi ia ʻe ha ʻuhinga mo e ʻuakai moʻoni fakalaumālie. Kapau ʻoku hala ʻa e meʻa ko ʻení, ʻe lava ʻe he ngaahi ngāue kehé ʻo fakasiʻisiʻi ʻa e ngaahi ʻaonga ʻo e ako fakafoʻituituí pe keina ʻa e taimi ʻoku tau fiemaʻu ki aí. Ko e tauhi maʻu ha taimi-tēpile ako leleí ʻoku ʻikai ke faingofua. Neongo ʻe fiemaʻu ʻa e mafamafatatau ʻi he ngaahi meʻa mahuʻingá, ka ko e koloaʻia fakalaumālie ʻe maʻu aí ʻoku ʻikai ala totongi ia.​—Pal. 3:​13-18; Kol. 1:27.

³ Ko Hono Vakaiʻi ʻa e Tohi Tapú ʻoku tokoni ia kiate kitautolu ʻi he ʻaho taki taha ke maʻu ai ʻa e ngaahi fakakaukau pau mo fakatupu-langa hake ʻo fekauʻaki mo e Puleʻangá. Ko kinautolu ʻoku nau “ongoʻi masiva honau laumalie” ʻoku nau teuteu ke vaheʻi ha miniti siʻi pē ʻi he ʻaho taki taha ke lau ai ʻa e potutohi fakaʻahó mo e ngaahi fakamatalá. (Mt. 5:3) Ko e ngaahi potutohi lahi ʻoku nau fakamatalaʻi ʻa e ngaahi tafaʻaki kehekehe ʻo e Puleʻangá. ʻO hangē ko ʻení, ʻi Nōvema 22, 1994, ko e potutohi naʻe ngāueʻakí ko Mātiu 13:4. Ko e fakamatalá naʻe lave ki he ʻamanaki ʻo e Puleʻangá pea mo fakatokanga mai kiate kitautolu ʻa e ngaahi fakatuʻutāmaki ʻo e feohi ʻoku ʻikai ke lelei mo e ngaahi kāingá mo e ngaahi kaungāʻapí. Ko hono moʻoní ʻi he ngaahi ʻapi Pēteli ʻi māmani lahí, ʻoku fai ai ʻa e fetalanoaʻaki miniti ʻe 15 ʻo e potutohi fakaʻahó ʻi he pongipongi ʻo e ʻaho ngāue taki taha, ʻoku fakamamafaʻi ai ʻa e ngaahi ʻaonga mo e mahuʻinga ʻo e lave fakataha ki he potutohi fakaʻahó. ʻOku fakakau ʻi ho fāmili ʻa e fetalanoaʻaki tatau ʻi hoʻomou founga tuʻumaʻu fakaʻahó?

⁴ ʻI hoʻo tupulekina ʻi he houngaʻia ki he Puleʻangá, ʻe ueʻi ia ʻe ha ʻuhinga lahi ange ke kau ʻi hono fakahā ʻa e pōpoaki ʻo e Puleʻangá ki he niʻihi kehé. Ko e Taua Leʻo mo e Awake! ʻoku tokonaki mai nai ai ha meʻa hangē ko ha meʻakai fakaeʻatamai ʻokú ne fafanga ʻa hotau ʻatamaí ʻaki ʻa e fakamatala foʻou mo fakaonopooni. ʻOkú na tokoniʻi kitautolu ke tauhi maʻu ʻa e manava-kāvakava ʻo e ʻilo ʻo lahi ʻa hono fiemaʻu ʻe he māmaní ʻa e Puleʻanga ʻo e ʻOtuá. ʻOkú na tokoniʻi kitautolu ke tau hoko ko e kau tangata fakalaumālie, pea ʻoku ʻiate kitautolu ʻa e “finangalo ʻo Kalaisi.” (1 Kol. 2:​15, 16) Ko e ngaahi meʻá ni hono kotoa ʻoku lava ke fakatupu mālohi ki heʻetau ʻamanakí mo e fakalahi ʻa ʻetau faivelengá ke fakahā ʻa e ʻamanaki ʻo e Puleʻangá ki he niʻihi kehé.​—1 Pita 3:15.

⁵ ʻOku mahuʻinga ʻaupito ke tau maʻu ʻa e ʻuhinga ʻo e pōpoaki ʻo e Puleʻangá. Ko e Puleʻangá ko e meʻa ia ʻe ngāueʻaki ʻe he ʻOtuá ke pouaki ʻa hono tuʻunga-haú, fakangata ʻa e anga-fulikivanú, mo fakahoko mai ha māmani foʻoú​—ha palataisí. Kuo fekau mai ʻe Sīsū kiate kitautolu ke fakamuʻomuʻa ia ʻi heʻetau moʻuí. Kuo pau ke tau hangē ha sipí ka tau nofo ʻi he malumalu ʻo ʻene pulé. (Mt. 6:​10, 33) Ngāueʻaongaʻaki kakato ʻa ho faingamālié ke maʻu ʻa hono ngaahi tāpuakí.