Taimi-Tēpile Fakafāmilí​—Ko e Konga Tohi Fakaʻahó

¹ ʻOku fai ʻe he ngaahi mātuʻa ʻofá ʻa e feinga lahi ʻi he ʻaho taki taha ke tokonaki ai ʻa e meʻakai lelei maʻa ʻenau fānaú. ʻOku toe mahuʻinga ange ke tokonaki kia kinautolu ʻa e meʻakai fakalaumālie mei he Folofola ʻa e ʻOtuá. (Mt. 4:4) Ko e founga ʻe taha ʻe lava ke ke tokoniʻi ai hoʻo fānaú ke nau fakatupulekina ha holi feʻunga ki he meʻakai fakalaumālié pea “tupu ai ke aʻusia ʻa e fakamoʻui” ko hono vaheʻi ha taimi ʻi he ʻaho taki taha ke lāulea fakafāmili ai ki he konga tohi fakaʻahó mo e ngaahi fakamatalá. (1 Pita 2:2) Ko fē ʻa e taimi te ke fakakau nai ai ʻeni ʻi hoʻo taimi-tēpile fakafāmilí?

² ʻI he Ngaahi Houa Kaí: Ko hono kamataʻi ho ʻahó ʻaki ha fetalanoaʻaki ʻi he konga tohí ʻe lava ke tokoniʻi ai ho fāmilí ke nau manatuʻi ʻa Sihova ʻi he ʻahó kotoa. (Sāme 16:8) Ko ha faʻē ʻe taha naʻá ne ʻai ko ha taumuʻa ia ke lau pea fetalanoaʻaki ʻi he konga tohí mo e ngaahi fakamatalá mo ʻene tamasiʻí he lolotonga ʻa ʻene kai pongipongí pea ke fai ha lotu fakataha mo ia ki muʻa peá ne ʻalu ki he akó. Naʻe fakaivimālohiʻi ai ia ke ne tuʻu ʻo ʻikai ngaofengofua ʻi he fehangahangai mo e mateakiʻi fonuá, ke ne talitekeʻi ʻa e ngaahi fakaʻaiʻai ki he ʻulungāanga taʻetāú pea ke ne fai ha fakamoʻoni loto-toʻa ʻo tatau pē ki he kaungāakó mo e kau faiakó. Neongo ko ia tokotaha pē ʻa e Fakamoʻoni ʻi he ʻapiakó, naʻe ʻikai ʻaupito te ne ongoʻi tuēnoa.

³ Kapau ʻoku ʻikai ke ola lelei ʻa e fetalanoaʻaki ki he konga tohí ʻi he pongipongí, te mou lāulea fakafāmili nai ki ai ʻi ha taimi ʻamui ange he ʻahó, mahalo pē ʻi he lolotonga ʻa e kai efiafí. ʻOku toe lāulea ʻa e niʻihi ki he ngaahi hokosia mei he ngāue fakafaifekaú mo e ngaahi poini naʻa nau fiefia ai mei heʻenau lau Tohi Tapu fakafoʻituituí ʻi he taimi ko ení. Ko e tokolahi ʻoku nau manatu ʻofa ki he ngaahi taimi ko iá lolotonga ʻa e kai efiafí ko e taha ia ʻo e ngaahi taimi fakafiefia lahi taha ne nau fakamoleki fakataha ko ha fāmilí.

⁴ ʻI he Taimi Poʻulí: Ki he ngaahi fāmili ʻe niʻihi, ko e taimi lelei taha ke lāulea ai ki he potutohi fakaʻahó ko e ki muʻa pē pea mālōlō ʻi he taimi poʻulí. ʻOku lava ke toe hoko eni ko ha taimi lelei ke lotu fakataha ai. ʻI he fanongo fakaʻaho ʻa hoʻo fānaú ki hoʻo lea ʻo fekauʻaki mo Sihová pea lotu kiate iá, ʻokú ne hoko ai ko ha tokotaha moʻoni kia kinautolu.

⁵ ʻOfa ke tāpuakiʻi ʻe Sihova ʻa hoʻo ngaahi feinga ko ia ke fakahūhū ʻa e moʻoní ki hoʻo fānaú ʻi hoʻo ngāueleleiʻaki ʻa e Ko Hono Vakaiʻi Fakaʻaho ʻa e Tohi Tapú.