Ko e Meʻa Mahuʻinga Lahi Taha ʻi he Hisitōlia ʻo e Faʻahinga ʻo e Tangatá

¹ Naʻe haʻu ʻa Sīsū ki he māmaní ʻi he fekau ʻa ʻene Tamaí ke faifakamoʻoni ki he moʻoní ʻa ia ʻe taki atu ai kitautolu ki he moʻui taʻengatá. (Sione 18:37) Ko ʻene anga-tonu ʻo aʻu ki heʻene pekiá naʻá ne ʻoatu ai ʻa e lāngilangi kia Sihova, pea fakamāʻoniʻoniʻi ʻa e huafa ʻo e ʻOtuá, pea tokonaki ha huhuʻi. (Sione 17:​4, 6) Ko e ʻuhinga ia ʻoku hoko ai ʻa e pekia ʻa Sīsū ko e meʻa mahuʻinga lahi taha ia ʻi he hisitōlia ʻo e faʻahinga ʻo e tangatá.

² Talu mei he fakatupu ʻo ʻĀtamá, ko e tangata haohaoa pē ʻe toko ua naʻá na moʻui ʻi he foʻi māmani ko ení. Ko ʻĀtamá naʻe ʻi ha tuʻunga ke ne ʻomai ha ngaahi tāpuaki fakaofo ki hono hako teʻeki ke fanauʻí. Ka, naʻá ne angatuʻu siokita, fakahalaiaʻi kinautolu ki ha moʻui loto-mamahi ʻa ia ʻe iku atu ki he maté. ʻI he taimi naʻe haʻu ai ʻa Sīsuú, naʻá ne fakahāhā ʻa e mateaki haohaoa mo e talangofua, ʻo ʻatā ai ha faingamālie ki he moʻui taʻengatá kiate kinautolu kotoa pē ʻe ngāueʻaki ʻa e tui.​—Sione 3:16; Loma 5:12.

³ ʻOku ʻikai ha toe meʻa ʻe fakatatau mo e pekia fakaefeilaulau ʻa Sīsuú. ʻOku liliu ai ʻa e ʻalunga ʻo e hisitōlia ʻo e faʻahinga ʻo e tangatá. Naʻe tokonaki ai ʻa e makatuʻunga ki he toetuʻu mei he maté ʻo e laui piliona ʻo e kakaí. Naʻe fakatoka ai ʻa e makatuʻunga ki ha Puleʻanga taʻengata ʻa ia te ne ʻomai ʻa e ngataʻanga ki he fulikivanú pea ngaohi ʻa e māmaní ko ha palataisi. ʻE toki tauʻatāina ai ʻa e kakaí mei he faʻahinga fakafeʻātungia kotoa pē pea mo e nofo pōpulá.​—Sāme 37:11; Ng. 24:15; Loma 8:​21, 22.

⁴ Ko e kotoa ʻo e ngaahi meʻá ni ʻoku tokoni ia kiate kitautolu ke tau houngaʻia ʻi he ʻuhinga naʻe fakahinohinoʻi ai ʻe Sīsū ʻene kau ʻaposetoló ke fakamanatu ʻene pekiá mo fai ʻa e kātoanga ʻo e Fakamanatú ʻi he taʻu taki taha. (Luke 22:19) ʻI he houngaʻia ʻi hono ʻuhingá, ʻoku tau hanga atu ke fakatahataha mo e ngaahi fakatahaʻanga ʻo e Kau Fakamoʻoni ʻa Sihová ʻi māmani lahi ʻi he hili ʻa e tō ʻa e laʻaá ʻi he Falaite, ʻEpeleli 14. Ki muʻa ʻi he taimi ko iá, ʻe lelei nai ke lau fakataha mo e fāmilí ʻa e ngaahi fakamatala ʻa e Tohi Tapú ʻo kau ki he ngaahi ʻaho fakaʻosi ʻo Sīsū ʻi he māmaní pea mo ʻene tuʻu loto-toʻa ki he moʻoní. (Kuo fokotuʻu atu ʻa e ngaahi konga tohí ʻi heʻetau 1995 Calendar, ʻo ʻEpeleli 9-14.) Naʻá ne fokotuʻu ha faʻifaʻitakiʻanga maʻatautolu ʻi he līʻoa ki hotau Tokotaha-Fakatupú. (1 Pita 2:21) Ke tau fai hotau lelei tahá ke fakaafeʻi hotau ngaahi kaungāmeʻá mo e fāmilí, pehē ki he kau ako Tohi Tapú pea mo e faʻahinga mahuʻingaʻiá, ki he fakatahataha mahuʻinga ko ʻení. Fakamatalaʻi ki muʻa ʻa e meʻa ʻe fai aí pea ki he ʻuhinga ʻo e uainé mo e maá.​—1 Kol. 11:​23-26.

⁵ Ko e kau mātuʻá ʻoku totonu ke nau fokotuʻutuʻu ki muʻa ke fakapapauʻi ko e Kingdom Hall ʻoku maau pea mo maʻa. ʻOku totonu ke fai ha ngaahi fokotuʻutuʻu ki ha tokotaha ke ne ʻomai ʻa e maá mo e uainé. Ko hono ʻave takai ʻo e maá mo e uainé ʻoku totonu ke fokotuʻutuʻu lelei. Ko e ngaahi fokotuʻu ʻaonga ki he anga ʻo ʻetau fakahāhā ʻa e fakaʻapaʻapa ki he Kai Efiafi ʻa e ʻEikí naʻe ʻoatu ia ʻi he Watchtower ʻo Fepueli 15, 1985, peesi 19. ʻE feʻungamālie ki he fakatahaʻangá ke fai ha fokotuʻutuʻu ki hono fakalahi ʻa e ngaahi ngāue fakamalangá he lolotonga ʻo e ngaahi ʻaho ki muʻa ʻo e kātoangá pea pehē ki ha ngaahi ʻaho siʻi mei iá.

⁶ ʻI he taʻu kuo ʻosí, ko ha toko 12,288,917 naʻa nau ʻi ai ʻi hono fakamanatu ʻa e meʻa mahuʻingá ni ʻi māmani lahi. Koeʻuhi ko e ʻaho mahuʻinga lahi taha ʻeni ʻi heʻetau tohi māhiná, ʻoku totonu kiate kitautolu kotoa ke tau ʻi ai.