Fakamanatu ʻa e Pekia ʻOku Maʻu Ai ʻa e ʻAmanaki ko e Moʻui Taʻengatá

¹ ʻI he hili ʻa e tō hifo ʻa e laʻaá ʻi ʻEpeleli 6, 1993 te tau fakamanatu ai ʻa e pekia ʻa e Fakafofonga Pule ʻo e moʻuí. (Ngāue 3:15) Ko e moʻoni, ʻoku mātuʻaki feʻunga ʻaupito ke fakamanatuʻi ʻa e moʻui mo e pekia ʻa Sīsū Kalaisí. Ko ʻetau ʻamanaki ki he moʻui taʻengatá ʻoku fakatuʻunga ia ʻi he taʻataʻa ʻo Sīsū naʻe lilingí.

² ʻOku fakahaaʻi ʻi he Fakamanatú ʻa e mahuʻinga ʻo e pekia ʻa Kalaisi ʻi hono fakahoko ʻo e taumuʻa ʻa Sihová. ʻOku kau ʻi he taumuʻa ko iá ʻa hono tokonaki ha feilaulau haohaoa fakaetangata naʻe fiemaʻu ke huhuʻiʻaki ʻa e hako ʻo ʻĀtamá, ʻo ʻatā ai ki he kakai ʻe laui piliona ke nau tui mo moʻui taʻengata ʻi he māmani palataisi.​—Sione 3:16.

³ Ko e kau ʻofa kotoa ki he moʻoní mo e moʻuí ʻoku nau tokateu atu ki he fakamanatu ʻo e ʻOhomohe ʻa e ʻEikí ʻi he talangofua ki he fekau ʻa Sīsuú. (Luke 22:19) Ko e hā ʻe lava ke tau fai fakafoʻituitui ke fakahā ʻa ʻetau houngaʻia ki he tokonaki ʻo e feilaulau huhuʻi ʻa Kalaisí? ʻI hono tokaʻi ʻa e mahuʻinga ʻo e fakamanatu ko ʻení, ʻoku mātuʻaki mahuʻinga ʻa e fokotuʻutuʻu lelei. Ko e hā ʻa e ngaahi teuteu kuó ke fai ki he fakataha makehe ko ʻení?

⁴ Fiemaʻu Ke Teuteu Ki Muʻa: Ko e moʻoni, te tau fakapapauʻi ʻe kau ki ai ʻa e mēmipa kotoa pē ʻo e fāmilí. ʻOku totonu ke tau teuteu fakaefakakaukau foki ʻaki ʻa ʻetau lau mo fakalaulauloto ki he ngaahi konga Tohitapu ʻoku hā ʻi he 1993 Calendar ki ʻEpeleli 1-6. ʻE feʻunga ke fakakau ʻa e fakamatala ki he mahuʻinga ʻo e Fakamanatú ʻi heʻetau ako fakafoʻituitui mo e ako Tohitapu fakafāmili ki muʻa ʻi ʻEpeleli 6. Palani ke ke haʻu ki muʻa ʻoku teʻeki ai ke kamata, pea ke kiʻi nofo hifo ʻi he ʻosi ʻa e Fakamanatú koeʻuhi ke ke talitali ʻa e kau foʻou nai ko ʻenau toki ʻuluaki kau mai ʻeni ki ai.

⁵ ʻI he ngaahi uike ki muʻa ʻi he Fakamanatú, fakaafeʻi ʻa e faʻahinga mahuʻingaʻia kotoa pē ʻokú ke ʻiló ki he kātoangá ni. ʻI hono ngāueʻaki ʻa e ngaahi tohi fakaafe kuo pulusí, manatuʻi ke fakahā ki he faʻahinga mahuʻingaʻiá ʻa e feituʻu mo e taimi ʻe fai fakalotofonua ai ʻa e fakamanatú. Teuteu ha fakahokohoko ʻo e faʻahinga ʻokú ke fie fakaafeʻí. ʻOku ʻi ai ha meʻalele ʻa kinautolu hono kotoa pē ʻoku nau fie haʻú? Kapau ʻoku ʻikai, ko e hā te ke lava ʻo fai ke tokoni kiate kinautolu? Kapau ʻe hao mai ha tokotaha ʻi hoʻo kaá, fēfē ke ke ʻeke ki he kau mātuʻá pe ʻoku ʻi ai ha tokotaha ʻe lava ke mou haʻu mo ia?

⁶ ʻOku fiemaʻu ʻa e kau mātuʻá ke nau fai ha teuteu makehe ki muʻa, koeʻuhi he ko e meʻa mahuʻinga lahi taha pe ʻeni ʻo e taʻú pea ʻoku ʻamanekina ʻe tokolahi. (1 Kolinitō 14:40) ʻI ha uike ʻe taha ki muʻa ʻi ʻEpeleli 6, ʻe fokotuʻutuʻu ʻe he kau mātuʻá ha fakataha makehe mo e ngaahi tokoua ʻa ia te nau tokoni ʻi he fakamanatú, ʻo fakapapauʻi ʻoku nau maʻu ʻa e mahino ki he ngaahi fokotuʻutuʻu ki he tangutuʻanga mo e anga ʻo hono tufa ʻo e mā mo e uainé. Kapau kuo vaheʻi koe ke ke tokoni he lolotonga ʻa e fakamanatú ko ha tokotaha fakanofonofo pe tokotaha tufa ʻo e mā mo e uainé, fakapapauʻi ke ke muimui ofi ki he ngaahi fakahinohino ʻa e kau mātuʻá ʻo fekauʻaki mo e ngaahi meʻa ko ʻení. ʻI hono vakaiʻi ʻa e ngaahi fakamanatu ʻi he puha ʻi he peesi 7, ʻe fakapapauʻi ai ʻe he kau mātuʻá ko e ngaahi fokotuʻutuʻu kotoa pē ki he kau fakanofonofó, kau tufa ʻo e mā mo e uainé, mo e tokotaha malangá kuo maau lelei ia ki muʻa.

⁷ Ko e tokosiʻi pē ʻo e ngaahi tokoua ʻo Kalaisí ʻoku kei toe ʻi māmani ʻi he ʻaho ní, pea ʻi he kahaʻu ofi maí ni, ko e fakamanatu ʻo e ʻOhomohe ʻa e ʻEikí ʻe ʻosi atu ia. (1 Kolinitō 11:​25, 26) Pe ko e hā ʻa hono fuoloa ʻa hotau monū ke fai ʻa e meʻá ni, ʻofa ke tau fai maʻu ai pē ʻa e fakamanatu ʻo e pekia ʻoku maʻu ai ʻa e ʻamanaki ko e moʻui taʻengatá.