Kumi ki he Faʻahinga Akoʻingofuá
1 “ʻOku ʻikai lava ʻe ha taha ke haʻu kiate au, ka ʻi he tohoaki ia ʻe he Tamai naʻa ne fekau mai au.” (Sione 6:44) ʻOku hakule ʻe Sihova ʻa e lotó, te ne fakapaleʻi ʻa e faʻahinga akoʻingofuá mo fai ki he meʻa kuo nau akó. (Sel. 17:10; Sione 6:45) ʻOku tau maʻu ʻa e monū ʻo e hoko ko hono kaungāngāue ʻi he fekumi ki he faʻahinga anga-malū ʻoku nau fakaʻamu ki he māmani foʻoú.—Sāme 37:11; 1 Kol. 3:9.
2 Naʻe fakamatalaʻi ʻe Sīsū ʻa ʻene kau ākonga ko e kau “toutai tangata.” (Mt. 4:19) ʻI he taimi ʻe niʻihi ko e faʻahinga ngāue ko iá ʻoku fakaongosia, ka ʻoku maʻu ʻa e fiemālie lahi ʻi hono maʻu ha ngaahi ola leleí. ʻOku ʻikai ke tau ngāue ke maʻu ha lelei tāutaha, ʻoku tau fakahaofi moʻoni ʻa e “ika” mei ha fakaʻauha pau. Ko ha tangata toutai lavameʻa ʻoku pau ke ne ʻilo ʻa e meʻa te ne faí ke tohoakiʻi mai ʻaki ʻa e iká. ʻOku pehē pē, ʻoku pau ke tau tuʻuaki ʻa e pōpoaki ʻo e Puleʻangá ʻi ha founga fakamānako te ne langaʻi ʻa e mahuʻingaʻia ʻa kinautolu te nau fanongó. ʻOku moʻoni ʻeni tautautefito ʻi heʻetau fai ʻa e ngaahi toe ʻaʻahí. Ko e hā ʻoku lava ke tau leaʻakí?
3 Kapau naʻe hā ʻa e mahuʻingaʻia ʻi he ngaahi kupu ʻo e “Taua Leʻo” ʻoku kau ki he fakaʻikaiʻi ʻOtuá, te ke pehē nai:
◼ “Naʻá ta lave ki muʻa ʻo fekauʻaki mo e ʻuhinga ʻoku ʻikai ke toe tui ai ʻa e kakai ʻe niʻihi ki he lotú. Mahalo ʻokú ke fifili ki he ʻuhinga ʻoku mavahevahe mo faʻa fakakikihiʻi ai ʻa e kaveinga ki he lotú.” Tuku ke ne tali. Huke ki he peesi 322 ʻi he tohi Reasoning, ʻo ʻoatu ha ngaahi fakakaukau siʻi pē ʻi he kaveinga “Ko e Hā ʻOku Fuʻu Lahi Ai ʻa e Ngaahi Lotú?”
4 Te ke lava ʻo ngāueʻaki ha fakaofiofi meimei tatau ke kamata ha fetalanoaʻaki ʻi he kaveinga ʻo e lotú:
◼ “ʻOku ʻi ai ha faʻahinga founga ʻe lava ke tau fakapapauʻi ai ʻoku tau maʻu ʻa e lotu moʻoní? [Tuku ke ne tali.] ʻOku ongoʻi puputuʻu mo taʻepau ʻa e kakai tokolahi, koeʻuhi he ʻoku fuʻu lahi ʻa e ngaahi lotu kehekehé.” Huke ki he tohi Reasoning, peesi 328-329, ʻa ia ʻoku fakamatala ai ki he fehuʻi ko e “ʻOku lava fēfē ke ʻilo ʻe ha taha pe ko e lotu fē ʻoku moʻoní?” Fakamatala fuonounou ʻi he fehuʻi hono 5, “ʻOku feʻofaʻaki moʻoni ʻa hono ngaahi mēmipa?” Fakamatala ki he malava ke ako lahi ange ʻo fakafou ʻi he ako tāutaha ʻa e Tohi Tapú.
5 Kapau ʻoku ngali tokanga ʻa e tokotaha ʻapí ʻo fekauʻaki mo e ngaahi tuʻunga ʻo e māmaní, te ke fie ʻahiʻahi nai ʻeni:
◼ “ʻOku hā mahino ʻokú ke tokanga ʻo fekauʻaki mo e ngaahi tuʻunga kovi ʻoku tau fekuki mo ia ʻi he moʻuí pea mo e tauhi hotau ngaahi fāmilí. ʻOku fakahā ʻi he Tohi Tapú ʻa e talaʻofa fakaofo ʻe fakahoko ʻe he ʻOtua ʻi he kahaʻu ofi mai.” Lau ʻa e Palōvepi 2:21, 22, mo fakamatala ki he anga ʻo e talaʻofa ʻa Sihova ki ha māmani ʻo e melino tuʻuloa.
6 ʻI hono fai ʻa e ngaahi toe ʻaʻahí ʻi he ʻosi kamata ʻa e feingatau makehe mo e Ongoongo ʻo e Puleʻangá, kātaki ʻo fakapapauʻi ke tuku ha tatau ʻo e Ongoongo ʻo e Puleʻangá ki he ngaahi ʻapi naʻe ʻikai ke ʻi ai haʻanau tataú. Ko e meʻa te ke leaʻaki nai ʻi he ngaahi toe ʻaʻahi ki he niʻihi naʻe tuku ai ʻa e Ongoongo ʻo e Puleʻangá ʻe fakamatalaʻi ia ʻi he tatau ʻo e Ko ʻEtau Ngāue Fakafaifekau ʻo e Puleʻanga ʻo Mē.
7 Pea koeʻuhi ko e Folofola ʻa e ʻOtuá ko e “koto malohi,” ʻoku totonu ke tau feinga ke ngāueʻaki ia ʻi heʻetau ngaahi tuʻuakí. (Hep. 4:12) Fakapapauʻi ʻokú ke fakalototoʻaʻi ʻa e tokotaha ʻapí ke ne lau ʻa e Tohi Tapú. (Fakafehoanaki mo Ngāue 17:11.) Kapau te tau fai fakamākukanga ʻetau tafaʻakí, ʻe tāpuakiʻi ʻe Sihova ʻa ʻetau ngaahi feingá.