Malanga mo ʻIloʻilo
1 Ke maʻu ʻa e ʻiloʻiló ʻoku fiemaʻu ke tau mahinoʻi ha meʻa ʻo fekauʻaki mo e faʻahinga te tau malanga ki aí. Ko e hā hono ʻuhingá? Koeʻuhi he ko ʻetau lavameʻa ʻi he aʻu ki he loto ʻo e kakaí ʻoku fakatuʻunga ia ʻi heʻetau pōtoʻi ʻi hono ʻoatu ʻa e pōpoaki ʻo e Puleʻangá ʻi ha founga ʻoku fakamānako kiate kinautolú. ʻI he lolotonga ʻo e māhina ko Sanualí, te tau tuʻuaki atu ai ʻa e ngaahi tohi iiki ʻa ia ko e Nofo ʻAmanaki ki he Maama Foʻou Maʻoniʻoni, ʻOku ʻI Ai Ha ʻOtua ʻOku Tokanga Mai?, mo e “Vakai! ʻOku Ou Fakafoʻou ʻa e Meʻa Kotoa Pe.” Ko e ngaahi fokotuʻu ʻoku hoko maí ʻe ala tokoni nai.
2 Kapau ʻokú ke fili ke tuʻuaki ʻa e kiʻi tohi ko e “Vakai! ʻOku Ou Fakafoʻou ʻa e Meʻa Kotoa Pe” te ke lava ʻo lave ki he fakatātā ʻi he takafí peá ke pehē:
◼ “Ko e fakatātaá ni ko ha tā ʻe he tokotaha tā-fakatātaá ʻa e meʻa ʻoku akoʻi ʻe he Tohitapú ʻo fekauʻaki mo e taumuʻa ʻa e ʻOtuá ki he māmaní. Ko e hā ʻa e meʻa ʻokú ke fakakaukau atu ʻoku fiemaʻu kiate koe pea mo ho fāmilí ke moʻui ʻi ha māmani palataisí? [Tuku ke ne tali.] ʻOku fakahā mai ʻe he Tohitapú ko e melino moʻoní pea mo e maluʻangá ʻe vavé ni ke hoko ia ko ha moʻoniʻi meʻa ʻi māmani kātoa pea ʻe toe fakafoki mai ʻa e Palataisí. [Lau Sāme 37:10, 11.] Ko e kiʻi tohí ni te ne fakahā atu kiate koe ʻa e meʻa ʻoku fiemaʻu ke ke fai ke maʻu ai ʻa e ʻaonga mei he meʻa ʻe fai ʻe he ʻOtuá. ʻOku ou saiʻia ke tuku ʻa e tatau ko ʻení ʻiate koe.” Kapau ʻe ʻi ai ha tali lelei, te ke fakamatala nounou nai ʻa e fokotuʻutuʻu ʻo e tokoni meʻaʻofa.
3 ʻI he taimi te ke ngāueʻaki ai ʻa e kiʻi tohi “Nofo ʻAmanaki ki he Maama Foʻou Maʻoniʻoni,” te ke leaʻaki nai ha meʻa hangē ko ʻení:
◼ “Kuó ke loto-tatau ko e tangata ʻo onopooní ʻoku fehangahangai mo e ngaahi pole ʻa ia naʻe ʻikai ke ʻiloa ia ʻe he ngaahi toʻutangata ki muʻá? [Tuku ke ne tali.] ʻI hoʻo fakakaukaú, ko e hā ʻoku hoko ai ʻení? [Fakamālōʻiaʻi ʻa e talí. Huke ki he 2 Tīmote 3:1-3 pea lau.] Ko e ongo kupuʻi lea “talangataʻa ki he matuʻa” mo e “taeʻofa-ki-hoʻota” ʻokú na fakamatalaʻi tonu ʻa e tokolahi ʻi hotau ʻahó ni. Kae kehe, ko e ʻOtua tatau pē ʻa ia naʻá ne kikiteʻi ʻa e ongo palopalemá ni kuó ne toe ʻomai kiate kitautolu ʻa e tataki lelei ki he meʻa ʻe hoko ʻi he kahaʻú.” Lau ʻa e palakalafi 3 ʻi he peesi 5. Tuʻuaki taʻetotongi ʻa e ngaahi tohi iiki ʻe tolú, pea toki lave ki he fokotuʻutuʻu ʻo e tokoni meʻaʻofái.
4 Ko ha fakafeʻiloaki ʻe taha ʻe lava ke ngāueʻaki mo e kiʻi tohi “ʻOku ʻI Ai Ha ʻOtua ʻOku Tokanga Mai?,” ʻo kamataʻaki ʻa e fehuʻí ni:
◼ “Ko e kakai tokolahi ʻi he ʻahó ni ʻoku nau tui ʻoku ʻikai ke mahuʻingaʻia moʻoni ʻa e ʻOtuá ia ʻiate kitautolu faʻahinga ʻo e tangata ʻi he māmaní pea heʻikai te ne fai ʻe ia ha meʻa ʻo kau ki he ngaahi palopalema ʻoku ʻi aí ni. Ko e anga nai ia ʻo hoʻo ongoʻí? [Tuku ke ne tali.] Tuku muʻa ke u lau atu kiate koe ʻa e meʻa ʻoku lave ki ai ʻa e tohi tokoni ko ʻeni ki hono ako ʻo e Tohitapú ʻo kau ki he taumuʻa ʻa e ʻOtuá ki he tangatá pea mo e māmaní. [Lau ʻa e palakalafi 37 ʻi he peesi 28, ʻoku lave ki he Fakahā 21:3, 4.] ʻOku ou fakapapauʻi atu kiate koe, ʻoku ʻi ai ʻa e ʻuhinga lelei ki hono kātakiʻi ʻe he ʻOtuá ʻa e ngaahi palopalema ʻoku kei ʻi aí ni ʻi he māmaní. Kapau te ke fie ako ke ʻilo pe ko e hā ia, kātaki ʻo lau ʻa e kiʻi tohí ni.” Kapau ʻe fie lau ʻe he tokotaha-ʻapí ʻa e kiʻi tohí, tuku ia pea lave ki he fokotuʻutuʻu ʻo e tokoni meʻaʻofá.
5 Kapau te ke saiʻia ke fai ha tuʻuaki nounou ʻo ngāueʻaki ha taha ʻo e ngaahi tohi iikí te ke lava ʻo ʻeke nai:
◼ “Ko e hā ʻe hoko ki hotau foʻi māmaní? Ko e tokolahi ʻoku nau fifili fekauʻaki mo e meʻá ni. ʻOkú ke fakakaukau ʻe hoko moʻoni ko ha palataisi ia?” Fakamālōʻiaʻi ʻa e tali ʻa e tokotaha-ʻapí, pea toki lau ʻa e Sāme 37:11, 29. Tuʻuaki ke tuku ʻa e ngaahi tohi iiki ʻe tolú, pea fakamatala ki he fokotuʻutuʻu ʻo e tokoni meʻaʻofá.
6 Ko e ʻiloʻilo leleí te ne fakaivia kitautolu ke tau ʻiloʻi ʻa e ngaahi fiemaʻu mo e ngaahi meʻa mahuʻinga ki he kakai ʻoku tau fetaulakí. ʻOku fakapapauʻi mai ʻeni kiate kitautolu ʻe he Palōvepi 16:23, ʻo pehē: “Ko e ʻatamai ʻo e poto ʻoku ne fakapoto hono ngutu: Pea ko e meʻa ʻoku ne maʻu ʻe aʻu ki hono loungutu.”