Lea ʻAki ʻa e Loto-Toʻa
1 ʻI he lolotonga ʻo e ngaahi taʻu ki mui ní ko e kau malanga ʻi he ngaahi feituʻu ʻe niʻihi ʻoku ʻilo ʻoku fakautuutu ʻa e faingataʻa ke lea ki he kakaí ʻi honau ʻapí. Ko e tokolahi ʻoku nau pehē ʻoku lahi hake ʻi he peseti ʻe 50 ʻo e kakai ʻi honau vāhenga ngāué ʻoku ʻikai te nau ʻi honau ʻapí ʻi he taimi ʻoku fai ai ʻa e ʻaʻahi mei he fale ki he falé. Ko hono olá, ʻoku lahi ʻa e taimi ʻoku fakamoleki aí ka ʻoku ʻikai hano ola.
2 ʻI he ngaahi taʻu kuo hilí naʻe maʻu ʻa e kakai tokolahi ʻi honau ʻapí ʻi he Sāpaté, ʻa ia naʻe vakai ki ai ko e ʻaho ʻo e mālōlō. Kuo liliu ʻa e ngaahi ʻulungaangá ia. ʻOku angaʻaki ʻi he ngaahi fonua lahi ʻi he ʻahó ni ʻe he kakaí ke ngāue ʻi he ngaahi ngāue fakaemāmaní, tokangaʻi ʻa e ngaahi fiemaʻu ʻa e fāmilí ʻo hangē ko e fai ʻo e fakataú, pe kau ʻi he fakafiefiá, ʻa ia ʻoku nau ʻalu foki ai mei honau ʻapí. Ko ia naʻa mo e ngaahi ʻaho Sāpaté, ko e fetuʻutaki mo e kakaí ʻi he fale ki he falé kuo hoko ia ko ha palopalema ʻi he ngaahi feituʻu ʻe niʻihi.
3 ʻI he ʻikai ke ʻi ʻapi ʻa e kakaí, ʻoku mahino ʻoku nau ʻi ha feituʻu kehe. Koeʻuhi ko ʻetau koló ia ke lea ki he kakaí, fēfē ke tau lea kiate kinautolu ʻoku tau fetaulakí—ʻi he halá, ʻi he māketí, pe ʻi he ngāueʻangá. Naʻe angaʻaki ʻe Paula ke fakaofiofi “kiate kinautolu te nau feʻiloaki,” ke fai ha fakamoʻoni kiate kinautolu. (Ng. 17:17) Ko ia naʻe fakamoʻoniʻi ʻeni ko ha founga ola lelei ʻo e faifakamoʻoní, pea ko ha founga ola lelei ia ʻo e faifakamoʻoní ʻi hotau ʻahó ni.
4 ʻI heʻetau ʻalu mei he fale ki he falé, ʻoku tau faʻa sio ki he kakai ʻoku nau ʻalu fāinoa holo pe mahalo ʻoku nau talitali ki ha taha. ʻI ha ʻaho lelei, ʻoku nau nofo nai ʻi he sea ʻi he paʻaké pe fufulu pe ngaahi ʻa ʻenau kaá. Ko ha malimali anga-fakakaungāʻapi pea mo ha lea fakafeʻiloaki anga-fakakaumeʻa ko e meʻa pē nai ia ʻoku tau fiemaʻú kae kamata ha fetalanoaʻaki. Kapau ʻoku nau nofo ofi mai pē, ʻoku lava ke tau pehē ki ai ʻoku ngalingali naʻe ʻikai ke ʻi ai ha taha ʻi honau ʻapí pea ʻoku tau fiefia ke maʻu ʻa e faingamālié ni ke lea ai kiate kinautolu. ʻI he tomuʻa fai ʻe kita ha meʻa ke fakahā ha loto-toʻa ange, ko e tokolahi kuo nau hokosia ʻa e ngaahi ola fakafiefia.
5 ʻOku Maʻu ʻa e Ngaahi Ola ʻi he Loto-Toʻá: Naʻe pehē ʻe ha tokoua ʻe taha ʻokú ne fakaofiofi ki he kakai ʻoku nau tuʻú, talitali ki ha pasi, luelue māmālie, pe tangutu pē ʻi heʻenau kaá. ʻAki ha malimali māfana mo e leʻo fiefia, ʻokú ne ʻai ai ia ke hangē pē ha kaungāʻapi anga-fakakaumeʻa ʻokú ne loto pē ke fai ha ʻaʻahi. ʻI he founga ko ʻení naʻe ʻikai ngata pē ʻi heʻene tufa ai ʻa e ngaahi tohi lahi ka kuó ne kamata foki ai ha ngaahi ako Tohitapu ʻe niʻihi.
6 Ko ha tokoua ʻe taha mo hono uaifí naʻá na ʻalu mei he matapā ki he matapā peá na fetaulaki mo ha fefine naʻe luelue mai naʻá ne toʻo ha kato meʻakai lahi. Naʻá na kamata ha fetalanoaʻaki mo ia, fakaongoongoleleiʻi ʻa e fefiné ki heʻene tōtōivi ʻi hono tokangaʻi ʻa e ngaahi fiemaʻu ʻa hono fāmilí. “Ka ko hai,” ko ʻena ʻeke angé ia, “ʻe lava ke ne tokonaki mai ʻa e ngaahi fiemaʻu ʻa e faʻahinga ʻo e tangatá?” Naʻe langaʻi hake ai ʻa e mahuʻingaʻia ʻa e fefiné. Naʻe iku ki ha fetalanoaʻaki taimi siʻi pea fakaafeʻi ki hono ʻapí, naʻe kamata ai ha ako Tohitapu.
7 Ko ia ko e taimi hono hoko ʻo hoʻo faifakamoʻoni mei he matapā ki he matapaá pea ke ʻilo ʻoku ʻikai ke ʻi ʻapi ʻa e kakaí ia, fēfē ke feinga ke loto-toʻa ange pea lea ki he kakai ʻokú ke fetaulaki mo ia—ʻi he halá pe ko ha feituʻu kehe? (1 Tes. 2:2) Te ke maʻu nai ai ha ngāue fakamalanga ola lelei ange, pea te ke hokosia ʻa e fiefia lahi ange ʻi hoʻo ngāué.