Fanongonongo Fakaʻaho ʻa e Moʻoní ʻi he Faʻifaʻitaki Kia Sīsū

¹ Naʻe maʻu ʻe Sīsū ha ngāue pau ke fai ʻi he taimi naʻá ne haʻu ai ki he māmaní. Naʻe faingofua ʻaupito: ‘Ke fakamooni ki he mooni.’ (Sione 18:​37, PM) Naʻá ne fanongonongo ʻa e moʻoni fekauʻaki mo e ngaahi ʻulungaanga fakaofo pea mo e ngaahi taumuʻa ʻa ʻene Tamaí. Ko e ngāué ni naʻe hangē ha meʻakaí kiate ia; naʻá ne moʻuiʻaki ʻa e ngāue ko iá. (Sione 4:​34) Naʻe fakamatalaʻi ʻe Luke ʻo pehē ko Sīsuú “naʻa ne ʻi he Temipale ʻi he ʻaho kotoa pe, ʻo faiako.” (Luke 19:​47, fakaʻītali ʻamautolu.) Naʻe ngāuekakatoʻaki ʻe Sīsū ʻa e taimi naʻe ala maʻú. (Sione 9:4) Taimi nounou ki muʻa ke ne pekiá, naʻe malava ke ne fakahā ki heʻene Tamaí: “Kuo u fakalangilangiʻi koe ʻi mamani; he kuo u fakaʻosi ʻa e ngaue naʻa ke tuku kiate au ke u fai.”​—Sione 17:4.

² ʻI he taimi ʻoku fonu ai hotau lotó ʻi he houngaʻia ki he ngaahi meʻa kotoa pē kuo fai ʻe Sihová, ʻoku tau ongoʻi foki ʻoku kounaʻi kitautolu ke tau lea maʻu pē ʻo fekauʻaki mo Ia ʻi he ʻaho kotoa pē. Te tau hoko ai ʻo hangē ko e kau ākonga ʻa Sīsuú ʻa ia naʻa nau fanongonongo loto-toʻa: “He ʻe ʻikai te ma faʻa tuku ʻema lea ki he ngaahi meʻa naʻa ma sio ki ai mo fanongoa.” (Ng. 4:​20) Naʻe hokohoko ʻenau lea ʻo fekauʻaki mo Sihová, he ʻoku hā mei he fakamatalá ko e “ʻaho kotoa pē . . . naʻe ʻikai [te nau] tuku.” (Ng. 5:​42, fakaʻītali ʻamautolu.) ʻOku totonu ke tau ʻeke hifo kiate kitautolu, ‘Ko ha taha au ʻoku ou faʻifaʻitaki ki heʻeku Faiako, ko Sīsuú?’

³ Malanga mo e Fakavavevave: Naʻe tala ki muʻa ʻe Sīsū ʻo pehē ʻi he taimi ʻe fanongonongo ai ʻa e pōpoaki ʻo e Puleʻangá ki he māmaní kotoa, “e toki hoko mai ae ikuaga.” (Mt. 24:​14, PM) ʻOku totonu ke ueʻi heni kitautolu ʻe he mahuʻinga pea mo e fakavavevave ʻo ʻetau ngāué. Koeʻuhi ko e moʻui ʻe laui miliona ʻoku ʻi he tuʻunga fakatuʻutāmakí, ʻoku tau ʻiloʻi ai ʻoku ʻikai ha toe meʻa ʻe mahuʻinga pe ʻaonga ange ʻi he meʻá ni ke fai. Koeʻuhi ʻoku ofi ke ngata ʻa e ngaahi meʻa ʻoku tuʻu ní, ʻoku toe siʻi ʻaupito ʻa e taimi ʻoku toé ke fakakakato ai ʻa e ngāué ni!

⁴ ʻOku fakahā ʻe he ngaahi lipootí ko Sihová ʻokú ne fakavaveʻi ʻa hono fakatahatahaʻi ʻo e faʻahinga hangē ha sipí. (ʻAi. 60:22) ʻI he konga lahi ʻo e māmaní, ʻoku ʻaukolo moʻoni ʻa e kakaí ki he moʻoní, ʻo fanongonongo fiefia hangē ko ʻení: “Te tau ō mo kimoutolu; he kuo mau fanongo ʻoku ʻiate kimoutolu ʻa e ʻOtua”! (Sāk. 8:​23) Mahulu ange mei ha toe taimi ʻi he kuohilí, ʻoku moʻoni ʻa e ngaahi lea ʻa Sīsuú: “Kuo lahi ʻa e taʻu kuo motuʻu, ka ʻoku kaungatamaki ʻa e kau ngaue; ko ia mou kole ki he ʻEiki ʻoku aʻana ʻa e taʻu, ke ne kouna atu mo ha kau ngaue ke utu ʻene taʻu.” (Mt. 9:​37, 38) ʻIkai nai ʻoku fakalotoʻi ai kitautolu ke tau faivelenga ʻo hangē ko e kau ākonga ʻa Sīsuú ʻa ia “naʻa nau maʻunganofo ki he Temipale heʻenau fakamālōʻia ʻa e ʻOtua”?​—Luke 24:53, fakaʻītali ʻamautolu.

⁵ ʻAi ke ʻIloa Fakaʻaho ʻa e Moʻoní: ʻI he ʻaho kotoa pē, ʻoku totonu ke tau lamalama ha ngaahi founga ke ʻoatu ai ʻa e moʻoní ki he niʻihi kehé. ʻOku ala maʻu ʻa e ngaahi faingamālie. Te ke fakamoleki nai ha ngaahi miniti siʻi ke telefoni ai ki ha kaumeʻa pe ko ha maheni ʻa ia ʻokú ke ʻiloʻi nai ʻe ʻatamai-fiefanongo? Pe fēfē ke fai ha tohi ki he faʻahinga ʻa ia ʻoku ʻikai faʻa maʻu atu ki ʻapí? Kuó ke fakakaukau ʻo kau ki hano tuʻuaki ha tuleki ki he tokotaha ʻoku ʻaʻana ʻa e fale koloá ʻi he taimi ʻokú ke fai ai hoʻo fakataú? Ngalingali, ʻoku lava ke ke fakakaukau ki he toe ngaahi faingamālie kehe ʻokú ke maʻu ʻi he ʻaho kotoa pē ke fakahā atu ai hoʻo ʻamanakí ki he niʻihi kehé. Kapau ʻokú ke fai ha feinga pea fakahāhā ha kiʻi lototoʻa, ʻe tokoniʻi koe ʻe Sihova.​—1 Tes. 2:2.

⁶ Ko ia, ʻi heʻetau kamata ʻa e ngaahi ngāue ʻo e ʻaho taki taha, ʻoku totonu ke tau ʻeke hifo kiate kitautolu, ‘Te u kamata nai ke ʻoatu ʻeku ʻamanakí ki ha niʻihi kehe kapau ʻe ʻi ai ha faingamālie he ʻahó ni?’ Faʻifaʻitaki ki he fakakaukau ʻa Sīsuú, ʻa ia naʻá ne fakamatalaʻi ʻa e ʻuhinga naʻe fekau mai ai ia ki māmaní: “Kuo pau ke u ʻave ʻa e ongoongolelei ki he ngaahi kolo kehe foki, ʻo tala ʻa e Puleʻanga ʻo e ʻOtua.” (Luke 4:​43, fakaʻītali ʻamautolu.) Kapau ʻoku tau fiemaʻu ke tau hangē ko ʻetau Faiakó, te tau fai ʻa e meʻa tatau.​—Luke 6:​40.