Ko Hono Maʻu ʻa e ʻAonga mei he Akoʻanga Fakafaifekau Fakateokalati ki he 1996—Konga 2
1 ʻI he hili siʻi pē ʻa hono kamata ʻo e Akoʻanga Fakafaifekau Fakateokalatí ʻi he 1943, naʻe fakamatalaʻi ʻe he taha ʻo e ngaahi vaʻa ʻa e Sōsaietí: “Naʻe lavameʻa ʻaupito ʻa e fokotuʻutuʻu leleí ni ʻi ha taimi nounou pē ʻi hono tokoniʻi ʻa e ngaahi tokoua tokolahi ʻa ia naʻa nau fakakaukau atu ʻe ʻikai te nau lava ke hoko ko e tokotaha malanga ke hoko ʻo lavameʻa ʻi he peletifoomú pea mo ola lelei ange ʻi he malaʻe malangá.” ʻOku hokohoko atu ʻa e akoʻangá ʻi hono tokonaki ʻa e ako mātuʻaki lelei ʻaupito, ʻa ia ʻoku fiemaʻu kiate kitautolu kotoa.
2 Lau Tohitapu: Ko e faʻahinga kuo vaheʻi ki ai ʻa e ngaahi konga ke malangá ʻoku ʻikai ko kinautolu pē ʻoku nau maʻu ʻa e ʻaonga mei he akoʻangá. ʻOku moʻoni, ko kitautolu kotoa kuo vaheʻi ki ai ha konga—ko e lau Tohitapu fakauiké. ʻOku fakahaaʻi ʻe he fakahokohoko ʻo e akoʻangá ʻa e ngaahi vahe ʻo e Tohitapú ʻe lau ʻi he uike taki taha. ʻOku ʻi ai ʻa e ngaahi konga Tohitapu ʻoku nau fakamanatu mai ʻa ia ʻoku fakamamafaʻi ai ʻa e mahuʻinga ʻo hono lau fakaʻaho ʻa e Tohitapú. (Siōs. 1:8; Sāme 1:2; Ng. 17:11) Ko hono lau ʻo e Tohitapú ʻoku mātuʻaki fiemaʻu ia ki he moʻui lelei fakalaumālié; ʻokú ne fafangaʻi ai ʻa e ʻatamaí pea mo e lotó. Kapau te tau lau ʻa e Tohitapú ʻi ha miniti ʻe nima ʻi he ʻaho, te tau malava ke ʻalu fakataha mo e fakahokohoko ʻa e akoʻangá ki he lau Tohitapú. ʻI he ngataʻanga ʻo e taʻú, te tau lau ʻa e ngaahi vahe ʻe 150 pe lahi ange ai ʻo e Folofola ʻa e ʻOtuá. Kapau te tau tuku ofi maʻu pē ʻa e Tohitapú, ʻe malava ke tau lau ha konga Tohitapu ʻe niʻihi ʻi he ʻaho kotoa pē.
3 Malanga Fakahinohino: Ke ueʻi ʻa e ngaahi tokouá ke mateaki, ngāue faivelenga, ko e tokotaha malanga ʻa ia ʻokú ne fai ʻa e malanga fakahinohinó ʻoku fiemaʻu ke ne ngāueʻaki ʻa e ngaahi founga faiako leleí, ke ʻoatu ʻa e mahinó, pea ke langa hake ʻa e houngaʻia kia Sihová, ko ʻene Folofolá, pea mo ʻene kautahá. Ko e kau mātuʻá pea mo e kau sevāniti fakafaifekaú ʻe lava ke nau fakahoko ʻeni ʻaki ʻa e teuteu lelei, fakahangataha ʻenau malangá ki he kaveingá, lea ʻi he tui pau, pea ʻai ke longomoʻui ʻa e fakamatalá. (Hep. 4:12) ʻOku mātuʻaki mahuʻinga ʻaupito ki he tokotaha malangá ke ne tauhi maʻu ki heʻene taimi kuo vaheʻí. Ko e tohi “All Scripture” ʻoku fonu ʻi he ngaahi konga Tohitapú pea ʻokú ne ʻomai ha ngaahi fakamatala Fakatohitapu fakalotomāfana moʻoni ʻa ia ʻe lava ke ʻaonga fakalaumālie kiate kitautolu.
4 Ngaahi Meʻa Mahuʻinga mei he Tohitapú: Ko e ngaahi tokoua kuo vaheʻi ki ai ʻa e konga ko ʻení ʻoku totonu ke nau filifili ha ngaahi veesi pau ʻa ia ʻe lava ke ngāueʻaki ʻi ha founga ʻaonga ki he lelei ʻa e fakatahaʻangá. ʻOku fiemaʻu ke lau ʻa e ngaahi vahe kuo vaheʻí, fakalaulauloto ki ai, pea fai ha fekumi ki he ngaahi veesi kuo filí ke maʻu ha ngaahi poini ʻa ia te ne fakamahinoʻi ʻa e ʻuhinga ʻo e ngaahi konga Tohitapú. ʻI mui ʻi he Watch Tower Publications Index, ʻoku ʻi ai ʻa e “ʻIniteki ʻo e Tohitapú,” ʻa ia ʻe lava ke tokoni ki hono maʻu ha fakamatala fekauʻaki mo e ngaahi veesi Tohitapu pau. Ko e ngaahi tokoua ʻoku nau fai ʻa e kongá ni ʻoku totonu ke nau ʻiloʻilo lelei pea fakaʻehiʻehi mei hono tānaki atu ha fakamatala ʻoku ʻikai kau ki ai. ʻOku totonu ke ʻoua te nau teuteu ha fakamatala lahi ʻa ia heʻikai ke lava ke fai ʻi he miniti pē ʻe ono.
5 Ko kitautolu kotoa ʻe lava ke tau maʻu ʻa e ʻaonga mei he Akoʻanga Fakafaifekau Fakateokalatí. ʻOku lava ke tokoni ia kiate kitautolu ke fakalakalaka ange ai ʻetau malangá pea mo e pōtoʻi faiakó. Ko hono ngāuekakatoʻaki ʻa e tokonakí ni ko e moʻoni ʻe tokoni ia kiate kitautolu ‘koeʻuhi ke ha ki he kakai kotoa ʻetau laka ki muʻá.’—1 Tīm. 4:15.