Fiefia ʻi he Tupulaki ʻOku ʻOmai ʻe he ʻOtuá
1 Ko e kau Kalisitiane ʻi he ʻuluaki senitulí ko e kau malanga faivelenga kinautolu ʻo e Puleʻangá. Naʻa nau fiefia ʻi he taimi naʻe ‘tupu tokolahi ai ʻa e ngaahi fakatahaʻangá ʻi he ʻaho ki he ʻaho.’ (Ng. 16:5, NW) Ko ʻenau malanga loto-toʻá naʻe fakalahi atu ia ki ʻĒsia, ʻIulope, mo ʻAfilika, ʻo iku ai ki ha utu-taʻu lahi ʻo e kau tuí.
2 Naʻe tala ki muʻa ʻe Sīsū ʻo pehē ʻi he ngaahi ʻaho fakamuí, ko e ngāue fakamalangá ʻe aʻu ki ‘mamani katoa . . . ki he ngāhi kakai kotoa pe’! (Mt. 24:14) ʻI he lolotonga ʻo e taʻu fakangāue 1996, naʻa tau maʻu hokohoko ai ha ngaahi līpooti ʻo e tupulekina fakaofo mo e ngaahi tumutumu foʻou ʻo e kau malangá mei he ngaahi fonua takatakai ʻi he kolopé. Kuo fokotuʻu ʻa e ngaahi fakatahaʻanga foʻou lahi. Ko e tupu vave ko ʻení kuó ne ʻai ai ke langa ha ngaahi Fale Fakatahaʻanga foʻou mo e ngaahi Fale ʻAsemipilī ʻe laui teau pea pehē foki ki hono fakalahi atu ha ngaahi fale ʻe niʻihi ʻo e vaʻá.
3 Ko ʻEtau Ngāue Fakafaifekau ʻo e Puleʻanga ʻo ʻAokosi 1996 ʻoku fakamatala ai ki he ngāue langa fakalahi ʻoku hoko ʻi ʻAfiliká. Ko e ngāue tatau pē ʻoku fai ʻi ʻAmelika Latiná. Ki he taʻu fakangāue 1996, ʻoku līpooti ai ʻi Mekisikou ha tumutumu fakaofo ko e kau malanga ʻe toko 470,098 pea mo ha ʻavalisi ko e ngaahi ako Tohitapu ʻe 600,751, ʻo fiemaʻu ai ke fokotuʻu ʻa e ngaahi fakatahaʻanga foʻou ʻe 466! Ko e fakalahi ʻo honau vaʻá ʻoku fokotuʻutuʻu ke fakaʻosi ʻi he fakaʻosinga ʻo e 1999. Ko e tupulekina tatau pē ʻi he ngaahi fonua lahi ʻe niʻihi ʻoku malava ai ke ʻikai tuku ʻa e ngaahi tafaʻaki kehekehe ʻo e polokalama langa fakateokalatí.
4 Ko e ngaahi fakamole ʻo e langá ʻoku mamafa ia ʻi he feituʻu kotoa pē, pea ko hotau ngaahi tokouá ʻi he ngaahi fonua lahi ʻoku ʻikai lahi haʻanau meʻa ke tokoni fakamatelie. Kae kehe, ʻi heʻenau faivelenga lahi ki he ngāue ʻa Sihová, ko e moʻoni ʻoku nau tupulekina fakalaumālie pea tupulekina mo honau tokolahí. ʻOku fakapapauʻi mai kiate kitautolu ʻe he Palōvepi 28:27 ʻo pehē ko ia “ʻoku ne foaki ki he masiva ʻe ʻikai te ne fusimoʻomo.” Ko ʻetau loto-lelei ke tokoni ki he ngaahi fakamole kehe ki he langá ʻoku maʻu ʻi he “fakafeʻunga” ʻo e ngaahi meʻa fakamatelié, ʻoku malava ai ʻe he tokotaha kotoa ke hokosia ʻa e fiefia ʻoku maʻu ʻi he foakí pea mo e fiefia ʻoku hoko ʻi he vakai atu ki he tupulaki ʻoku ʻomai ʻe Sihová!—2 Kol. 8:14, 15; Ng. 20:35.
[Fakatātā ʻi he peesi 4, 5]
Vaʻa ʻi Palakuei
[Fakatātā ʻi he peesi 4]
Vaʻa ʻi ʻEkuatoa
[Fakatātā ʻi he peesi 4, 5]
Fakalahi ʻo e Langa ʻi Mekisikou
[Fakatātā ʻi he peesi 4, 5]
Vaʻa ʻi he Lepupilika Tominikā
[Fakatātā ʻi he peesi 4]
Vaʻa ʻi Pelēsilá mo Hono Fakalahí
[Fakatātā ʻi he peesi 4, 5]
Langa ʻo e Vaʻa ʻi ʻUlukuei
[Fakatātā ʻi he peesi 5]
Ngaahi Fale Fakatahaʻanga fakamole siʻisiʻi fakapaʻanga ʻi ʻAmelika Latina
1. Pelēsila
2. Nikalākuā
3. Sili
4. Kolomupia
5. Mekisikou
6. Pelēsila
7. Pelū
8. Venisuela
9. Mekisikou