ʻOku Fakaava Mai ha Matapā Lahi ki he Ngāué
1 ʻI he hoko ko ha tokotaha malanga faivelenga ʻo e ongoongo leleí, naʻe vēkeveke ʻa Paula ke kumi ʻa e ngaahi feituʻu naʻe lahi ange ai ʻa e fiemaʻú, ko e taha ai ko e kolo ko ʻEfesoó. Naʻá ne maʻu ha faʻahinga lavameʻa lelei ʻi heʻene malanga ʻi aí ʻo ne tohi ai ki hono kaungā Kalisitiané: “Kuo fakaava kiate au ha matapa lahi mo ʻaonga.” (1 Kol. 16:9) Naʻe hokohoko atu ʻa Paula ʻene ngāue ʻi he feituʻu ko iá pea mo tokoniʻi ʻa e kau ʻEfesō tokolahi ke nau hoko ko e kau tui.—Ng. 19:1-20, 26.
2 ʻI he ʻahó ni, ko ha matapā lahi ʻoku taki atu ki he ngāué kuo fakaava mai kiate kitautolu. ʻOku tau maʻu ha fakaafe ke tokoni ki he ngaahi fakatahaʻanga ʻoku ʻikai malava ke nau ngāueʻi lelei kotoa honau feituʻú ʻi he taʻu kotoa pē. Ko ia, ko ʻetau ngaahi feingá ʻe lava ko ha tokoni ia ʻoku fiemaʻu ʻi he ngaahi feituʻu ʻe niʻihi.—Fakafehoanaki mo 2 Kolinito 8:13-15.
3 ʻE Lava ke Ke Ngāue ʻi ha Feituʻu ʻOku Lahi Ai ʻa e Fiemaʻú? Kuó ke fakakaukau faʻa lotu ki he malava ke ngāue ʻi ha feituʻu kehe? Te ke malava nai ke hiki ʻo tokoniʻi ha fakatahaʻanga ʻe taha ʻi Tongá ni. Fēfē ke ke lea ki he ʻovasia fakafeituʻú fekauʻaki mo e meʻa ko iá pea sio pe ko e hā ʻene fakakaukaú? Pe mahalo pē ʻi loto ʻi he feituʻu ʻo ho fakatahaʻangá, ʻoku tupulaki lahi ai ʻa e kau tulí pe lea ʻi he lea mulí, ʻa ia ʻoku ʻikai ha taha ke ne tokangaʻi. Ke fakahoko ʻa e fiemaʻú ni, ʻe lava ke ke feinga mālohi ke ako ki heʻenau leá? ʻIkai ko ia pē foki, mahalo kuo ʻosi ʻi ai ha kulupu lea ia ʻe taha pe fakatahaʻanga ofi kuo nau ‘kole ki he ʻEikí ki ha kau ngaue ʻo e Puleʻangá.’ (Mt. 9:37, 38) Kapau ko ia, te ke malava ke ke tokoni?
4 ʻI he ngaahi hongofuluʻi taʻu ki muí ni maí, laui afe ʻa e ngaahi fāmili Kalisitiane kuo nau hiki ki ha ngaahi fonua kehe ke nau kau kakato ange ai ʻi he ngāue ututaʻú. Ko e ongo meʻa mali ʻe taha naʻá na fai ʻeni naʻá na pehē: “Naʻá ma fiemaʻu ke ma tauhi ʻa Sihova ʻi ha feituʻu ʻe lava ke ma tokoni lahi taha aí.” Kapau ʻokú ke maʻu ʻa e holi ko ʻení peá ke ʻilo ʻoku malava ke ke hiki ki ha feituʻu ʻi he fonua ko ʻení pe kapau ʻokú ke taau ke ngāue ʻi ha fonua kehe, ʻuluaki talanoa mo e kau mātuʻa ʻi hoʻo fakatahaʻangá ʻo fekauʻaki mo hoʻo ngaahi taumuʻá.
5 Kapau ʻokú ke saiʻia ke fakaʻekeʻeke ki he Sōsaietí fekauʻaki mo e feituʻu ʻoku fiemaʻu ki ai ha tokoní, ʻoatu ki he Kōmiti Ngāue ʻa e Fakatahaʻangá ha tohi ʻo fakamatalaʻi ai hoʻo fiemaʻu paú. Te nau fakahaaʻi ai ʻenau ngaahi fakamatalá pea ʻoatu ia ki he Sōsaietí. ʻI ha faʻahinga tuʻunga, kehe pē ko e matapā lahi ki he ngāué ʻoku kei fakaava, ʻofa ke tau hokohoko atu ʻa kitautolu kotoa ke femoʻuekina ʻi he ngāue ʻa Sihová.—1 Kol. 15:58.