Aʻu ki he Ngaahi Hoa Mali ʻIkai ko ha Fakamoʻoní
1 Ko ha fakatupunga fiefia lahi ia ʻi he taimi ʻoku fāʻūtaha ai ha ongo meʻa mali ʻi he lotu moʻoní. Kae kehe, ʻi he ngaahi fāmili lahi ko e taha pē ʻo e ongo meʻa malí kuó ne tali ʻa e hala ʻo e moʻoní. ʻE anga-fēfē ʻetau aʻu ki he ngaahi hoa mali ʻikai ko ha Fakamoʻoní pea fakalototoʻaʻi kinautolu ke nau lotu kia Sihova fakataha mo kitautolú?—1 Tim. 2:1-4.
2 Mahinoʻi ʻEnau Fakakaukaú: Neongo ʻe hoko ʻo fakafepaki nai ʻa e ngaahi hoa mali ʻikai Fakamoʻoni ʻe niʻihi, ko e taimi lahi ko e palopalemá ʻoku taha pē ko e taʻemahuʻingaʻiá pe taʻefemahinoʻakí. ʻE ongoʻi nai ʻe ha taha ʻokú ne tuēnoa pe hoko ʻo fuaʻa ki he mahuʻingaʻia fakalaumālie foʻou ʻa hono hoa malí. “ʻI he tokotaha ʻi ʻapí, naʻá ku ongoʻi liʻekina,” ko e manatu ia ʻa ha husepāniti ʻe taha. “Naʻá ku ongoʻi hangē kuo liʻaki au ʻe hoku uaifí mo e fānaú,” ko e lea ia ʻa ha tokotaha. ʻOku fakakaukau nai ʻa e kau tangata ʻe niʻihi kuo mole atu honau fāmilí ki ha lotu. (Sio ki he Watchtower ʻo ʻAokosi 15, 1990, peesi 20-23.) Ko e ʻuhinga ia ʻoku lelei taha ai, kapau ʻe malava, ki he husepānití ke ne kau fakataha mo hono uaifí ʻi he fokotuʻutuʻu ʻo e ako Tohitapu ʻi ʻapí mei he kamataʻangá.
3 Ngāue ko ha Timi: Ko ha ongo meʻa mali Fakamoʻoni ʻe taha naʻá na ola lelei ʻi heʻena ngāue fakataha ʻi hono tokoniʻi mai ʻa e kakai ʻosi malí ki he moʻoní. ʻI he hili ʻa hono fokotuʻu ʻe he tuofefiné ha ako mo e uaifí, ʻe ʻaʻahi leva ʻa e tokouá ki he husepānití. Te ne faʻa malava ai ke kamata ha ako mo e husepānití.
4 Ke Anga-Fakakaumeʻa mo Anga-Talitali Kakai: ʻE lava ke tokoni ʻa e ngaahi fāmili ʻi he fakatahaʻangá ʻaki ʻenau mahuʻingaʻia ʻi he ngaahi fāmili ʻoku ʻikai nai ke nau fāʻūtaha ʻi he lotu moʻoní. Ko ha kiʻi ʻaʻahi anga-fakakaumeʻa ʻe tokoni ia ki he hoa mali ʻikai ko ha Fakamoʻoní ke ne sio ko e Kau Fakamoʻoni ʻa Sihová ko e kau Kalisitiane ʻoku nau loto-māfana, mo tokanga, ʻo nau tokanga fekauʻaki mo e lelei ʻa ha taha.
5 Mei he taimi ki he taimi, ʻe lava ʻe he kau mātuʻá ke nau fakamanatu ʻa e ngaahi feinga fakamuimui ko ia kuo faí ke aʻu ai ki he ngaahi hoa mali ʻikai ko ha Fakamoʻoní pea fakapapauʻi mo e meʻa lahi ange ʻe malava ke fai ʻi he ʻamanaki atu ke ikunaʻi mai ʻaki kinautolu kia Sihová.—1 Pita 3:1.