ʻOku Maʻu ʻe Hoʻo Fakatahaʻangá ha Feituʻu Ngāue Lahi?

¹ Mei he ngaahi kolo lalahi ʻi Siuteá ki he ngaahi kolo ʻuta ʻo Kālelí, naʻe fai ai ʻe Sīsū ha fakamoʻoni fakaʻāuliliki ʻi he kotoa ʻo e feituʻu ngāue lalahi ʻo ʻIsileli ʻo e kuonga muʻá. (Mk. 1:​38, 39; Luke 23:5) Ko kitautolu foki kuo pau ke tau talanoa ʻaki ʻa e ongoongo leleí ki he kakai tokolahi taha te tau malavá. (Mk. 13:10) Kae kehe, ʻe lava ke hoko ʻeni ko ha ngāue faingataʻa. Ko e hā hono ʻuhingá?

² Ko ha ngaahi fakatahaʻanga lahi ʻi Nuʻu Sila ʻoku nau maʻu ʻa e feituʻu ngāue ʻa ia ko e lahi tahá ko e kolo ʻutá, ʻo kāpui ai ʻa e ngaahi kilomita lahi. ʻOku ngāue nai ʻa e ngaahi fakatahaʻanga lea-mulí ʻi he ngaahi feituʻu kolomuʻa tokolahí, ʻi he kumi ʻa e kakai ʻa ē ʻoku lea ʻi heʻenau leá. Ko e hā ʻe lava ke tau fai ke tokoniʻi ai ʻa e kakai ʻoku nofo ʻi he ngaahi feituʻu ngāue lahi peheé ke nau ako ʻa e moʻoni fekauʻaki mo Sihova, Sīsū, pea mo e Puleʻangá?

³ Palani Fakalelei: ʻOku fiemaʻu ki he ʻovasia ngāué pea mo e sevāniti ki he feituʻu ngāué ke na tokangaʻi ʻa e ngaahi feinga ʻa e fakatahaʻangá ke fakahoko ʻa e tuʻunga lelei tahá. Mahalo ʻe lava ke fakataimitēpileʻi ha ngaahi Tokonaki makehe ʻa ia ʻoku malava ai ʻa e tokolahi tahá ʻo fakamoleki ha ʻaho kakato ki he ngāué. ʻI hono ngāueʻi ʻa e ngaahi feituʻu ngāue mamaʻó, palani ke fakamoleki ha ngaahi ʻaho lōloa ange ʻi he malaʻe ngāué ʻo kapau ʻe malava, ʻo ʻave ha kai hoʻatā ke maʻu ʻi he hoʻataá. Te mou fakataha nai ki he ngāue fakamalangá ki muʻa ange ia ʻi he taimi anga-mahení koeʻuhi ke fakaʻatā ai ha taimi ki he fononga ki he feituʻu ngāué pe fai ha fakataha ki he malaʻe ngāué ʻo ofi ki he feituʻu ke ngāueʻí. Tauhi ke tokosiʻi ʻa e kau malanga ʻi he kaá koeʻuhi ke maʻu ha ngaahi ʻapi lahi feʻunga ke ʻaʻahi ki ai. Fokotuʻutuʻu ke ngāueʻi ʻa e ngaahi feituʻu ʻutá he lolotonga ʻo e ngaahi faʻahitaʻu ʻoku lelei ai ʻa e ʻeá mo e ngaahi tuʻunga ʻo e halá.

⁴ ʻE lava ke fakahaofi ʻe he faʻahinga ʻoku nau ngāueʻi ʻa e ngaahi feituʻu ngāue lea-mulí ha taimi mahuʻinga ʻaki hono ʻai ke maʻu ha lisi fakamuimui taha ʻo e ngaahi hingoá mo e ngaahi tuʻasilá pea mo ha mape lolotonga. Fokotuʻutuʻu maau ʻa e ngaahi feituʻu ngāué koeʻuhí ke lava ʻa e kulupu ngāué ʻo ʻaʻahi ai ki he ngaahi tuʻasila kotoa pē ʻi ha feituʻu fakalūkufua.

⁵ Fakapapauʻi ke ʻave ha tatau feʻunga ʻo e ngaahi tohí. Kapau ko e feituʻu ngāué ʻoku tātātaha hono ngāueʻí, ʻe feʻungamālie nai ke tuku ha tuleki pe ko ha makasini motuʻa ange ʻi he ʻikai-ʻi-ʻapí. Kapau ʻoku ala maʻu ʻi hoʻo leá ʻa e tuleki Te Ke Saiʻia ke ʻIlo Lahi Ange ki he Tohitapú?, tuʻuaki ia ki he tokotaha kotoa pē te ke fetaulaki mo iá pea tuku ia ʻi he ʻikai-ʻi-ʻapí.

⁶ Fengāueʻaki Kakato: Ko hono ngāueʻi ha feituʻu ngāue lahi ʻoku fiemaʻu ʻa e fengāueʻaki ʻa e tokotaha kotoa pē ʻi he fakatahaʻangá. ʻI hano fiemaʻu ha fefonongaʻaki lahi, ko e faʻahinga ʻoku ʻalu fakatahá ʻe lava ke nau vahevahe ʻi he ngaahi totongi penisiní. ʻOku totonu ke ngāueʻaki ʻa e fakafuofua leleí ʻi he taimi ʻokú ke maʻu ai ha faʻahinga ʻi ʻapi ʻoku loto-lelei ke talanoa. Tokanga ai pē ki he fiemaʻu ke aʻu ki he tokotaha kotoa pē ʻi he feituʻu ngāué, pea fakakaukau ki he niʻihi ʻoku tatali ʻa ia ko e kulupu ia ʻi hoʻo kaá. Kapau ʻokú ke loto ke hokohoko atu ha fetalanoaʻaki mo ha taha mahuʻingaʻia ʻi ha taimi fuoloa, ʻe lava ke fai ha ngaahi fokotuʻutuʻu koeʻuhí ke hokohoko atu ʻa e toenga ʻo e kulupú ʻi he malaʻe ngāué?

⁷ Fai ha ngaahi fokotuʻutuʻu pau ke toe foki ki he kau mahuʻingaʻiá kotoa. Tuku kehe ʻa e tuʻasilá, feinga ke maʻu ʻa e fika telefoni ʻo e tokotaha mahuʻingaʻiá koeʻuhi ke ke lava ʻo fai ha fetuʻutaki pea fai ha fakamoʻoni lahi ange ʻi he telefoní. Kapau ʻoku ʻikai fakahingoa ʻa e ngaahi hala ʻutá pe ko e ngaahi falé ʻoku ʻikai ke fakafika, tā fakalelei ha mape pe tohi ha fakamatala ʻo e founga ke maʻu ai ha taha mahuʻingaʻia ʻi he toe ʻaʻahí.

⁸ Ko ha monū ē kiate kitautolu ke tau fakahoko ʻa e fakahinohino ʻa Sīsuú: “Ka mou ka aʻu ki ha kolo, pe ha vilisi, ʻeke pe ko hai ha taha ʻoku tāu”! (Mt. 10:11) Ko e moʻoni ʻe tāpuakiʻi ʻe Sihova hoʻo ngaahi feingá ʻi he foaki loto-lelei atu koe ki he ngāue fakapaleʻi lahi taha ko ʻení!