Kuo Pau ki he Tokotaha Kotoa Pē ke Ne ‘Pukemaʻu ʻa e Folofolá ʻi he Loto-Māfana’!
1 ʻOku laui miliona ʻa e kakai ʻoku nau ako ʻa e Tohitapú mo e Kau Fakamoʻoni ʻa Sihová. ʻI he tuʻunga ke taau ki he moʻui taʻengatá, kuo pau ke nau ‘pukemaʻu ʻa e folofolá ʻi he loto-māfana,’ ʻo hangē ko ia naʻe fai ʻe he toko 3,000 naʻa nau fakatomala pea naʻa nau papitaiso ʻi he ʻaho ʻo e Penitekosi ʻo e 33 T.S. (Ng. 2:41, NW) Ko e hā ʻa e fatongia ʻoku tuku mai ʻe he meʻá ni kiate kitautolu he ʻaho ní?
2 ʻOku fiemaʻu ke tau tokoniʻi ʻetau kau ako Tohitapú ke nau fakatupulekina ʻa e anga-līʻoa kia Sihová. (1 Tim. 4:7-10) Ki he ʻuhinga ko iá, ko e fakalahi ʻo ʻEtau Ngāue Fakafaifekau ʻo e Puleʻanga ʻo Sune 1996, palakalafi 20, ʻoku fokotuʻu mai ai: “ʻI he lolotonga ʻo e taimi akó, vakaiʻi ha ngaahi faingamālie ke langa hake ai ʻa e houngaʻia ki he ngaahi ʻulungaanga ʻo Sihová. Fakahaaʻi hoʻo ngaahi ongoʻi loloto ki he ʻOtuá. Tokoniʻi ʻa e tokotaha akó ke ne fakakaukau ki hono fakatupulekina ha vahaʻangatae fakafoʻituitui māfana mo Sihova.”
3 Ko e Pole ʻOku Tau Fehangahangai mo Iá: Ko e kakai tokolahi, kuo tākiekina ʻe he lotu loí, ʻoku nau fiemālie pē ʻi he founga lotu ʻoku kaunga ki ai ʻa e taimi siʻisiʻi mo e feingá, ʻo ʻikai fiemaʻu ha faʻahinga liliu moʻoni ʻi heʻenau founga moʻuí. (2 Tim. 3:5) Ko e pole ʻoku fehangahangai mo kitautolú ko hono tokoniʻi ʻetau kau ako Tohitapú ke nau sio ko e lotu moʻoní ʻoku kaunga ki ai ʻa e meʻa lahi ange ia ʻi he fanongo pē ki he folofola ʻa e ʻOtuá. Kuo pau ke nau ngāueʻaki ʻi heʻenau moʻuí ʻa e meʻa ʻoku nau akó. (Sem. 1:22-25) Kapau ʻoku ʻi ai ha meʻa fekauʻaki mo honau ʻulungaanga fakafoʻituituí ʻoku ʻikai ke fakahōifua ki he ʻOtuá, ʻoku fiemaʻu ke nau ʻilo honau ngafá ke “tafoki” pea fai ʻa e meʻa ʻoku totonu ke fakahōifua kiate iá. (Ng. 3:19) Ke maʻu ʻa e moʻui taʻengatá, kuo pau ke nau ‘tōtōivi’ pea tuʻumaʻu ʻi he moʻoní.—Luke 13:24, 25.
4 ʻI hono fakamatalaʻi ʻa e ngaahi tafaʻaki kehekehe ʻo e ʻulungāngá, ʻeke ki hoʻo tokotaha ako Tohitapú pe ʻoku anga-fēfē ʻene vakai moʻoni ki he ngaahi meʻá ni pea mo e meʻa ʻoku totonu ke ne fai kapau ʻokú ne sio ki ha fiemaʻu ke fai ha ngaahi liliu ʻi heʻene moʻuí. Fakahanga ʻene tokangá ki he kautaha ko ia ʻokú ne ako ai ʻa e moʻoní, pea fakalototoʻaʻi ia ke maʻu maʻu pē ʻa e ngaahi fakataha ʻa e fakatahaʻangá.—Hep. 10:25.
5 Tau ʻai ko ʻetau taumuʻá ia ke aʻu ki he loto ʻo e tokotaha akó ʻaki ʻetau faiakó. Te tau fiefia ʻi heʻetau ueʻi ʻa e faʻahinga foʻoú ke pukemaʻu ʻa e folofola ʻa e ʻOtuá ʻi he loto-māfana pea papitaiso!—1 Tes. 2:13.