Aʻu ki he Loto ʻo e Toko Taha ʻOkú Ke Ako ʻa e Tohi Tapú mo Iá
1 ʻOkú ke loto ke ngāueʻaki ʻe he toko taha ʻokú ke ako ʻa e Tohi Tapú mo iá ʻa e meʻa ʻokú ne akó? Ke ne maʻu ha ʻaonga mei he ʻilo ʻokú ne maʻú kuo pau ke ne fai ʻa e meʻa ko iá. Ke ueʻi ʻa e loto ʻo e toko taha ʻokú ke ako ʻa e Tohi Tapú mo iá ke ne fai ha ngāué, kuo pau ke ke aʻu ki hono lotó. ʻI he malanga ueʻi loto ʻa Pita ʻi he ʻaho Penitekosi ʻo e 33 T.S., naʻe toko 3,000 ʻa e kakai “naʻe hūkia honau loto,” “pea naʻa nau tali ʻene lea” mo papitaiso ʻi he ʻaho ko iá. (Ng. 2:37, 41) ʻE lava fēfē ke ke aʻu ki he loto ʻo e toko taha ʻokú ke ako ʻa e Tohi Tapú mo iá?
2 Teuteu Fakamākukanga: ʻOua ʻe feinga ke lahi ʻa e meʻa ʻoku fai ʻa e ako ki aí kae siʻisiʻi ʻa e taimi ʻe toe ke fai ai ha feinga ke fakalotoʻi ʻa e toko taha akó ʻaki ʻa e fakamatala ko iá. Fakapapauʻi ki muʻa ʻa e ngaahi poini te ke hanga ʻo fakamamafaʻí, pea ke ʻai ke pau ʻoku mahino kiate koe ʻa e ngaahi konga Tohi Tapú pea ke ngāueleleiʻaki. Fakakaukau ange ki muʻa ki ha ngaahi fehuʻi ʻe malanga hake nai ʻi he fakakaukau ʻa e toko taha akó koeʻuhi ko e ʻātakai naʻe tupu hake mo iá. Kapau ʻokú ke maheni lelei mo e toko taha ʻokú ke ako mo iá, ʻe tokoni ʻa e ʻilo ko ení ke ke mateuteu mo ha ngaahi fakamatala ʻe feʻunga mālie kiate iá.
3 Faʻifaʻitaki ki he Founga Faiako ʻa Sīsuú: Naʻe ngāueʻaki ʻe Sīsū ʻa e ngaahi talanoa fakatātā ke fakafaingofuaʻi ʻa e ngaahi poini faingataʻá mo tokoni ai ki heʻene kau akó ke nau maʻu ʻa e mahino pea mo maʻu ʻa e ongoʻi ʻi honau lotó ʻo kau ki ha faʻahinga tuʻunga. (Luke 10:29-37) Pea ʻoku pehē pē, te ke malava ke fakahoko ʻa e akonaki leleí ki he loto ʻo e toko taha ʻokú ke ako ʻa e Tohi Tapú mo iá ʻaki hoʻo ʻai ke faingofua ʻa hoʻo ngaahi talanoa fakatātaá, ʻo ngāueʻaki ʻa e ngaahi meʻa ʻoku faʻa hoko ʻi he moʻuí, mo ngāueʻaki tonu ia ki he tuʻunga ʻoku ʻi ai ʻa e toko taha akó.
4 ʻOku mātuʻaki ʻaonga ʻa e ngaahi fehuʻí ke aʻu ai ki he loto ʻo e kau ako Tohi Tapú, ʻo hangē ko ia naʻe toutou fakahāhā ʻe Sīsuú. (Luke 10:36) Ka ʻoua ʻe fiemālie pē ʻi he lau ʻe he toko taha akó ʻa e talí mei he tohí. Ngāueʻaki ha ngaahi fehuʻi ke fakahanga ʻene fakakaukaú ke aʻu ki ha fakamulituku ʻa ia naʻe ʻikai te ne fakakaukau nai ki ai ki muʻa. ʻOku tokoni foki ʻa e founga ko ení ki he toko taha akó ke ne fakatupulekina ʻa e mafai fakaefakakaukaú. ʻEke ʻa e ngaahi fehuʻi ke ne fakahā ʻene fakakaukaú ke ʻiloʻi pe ʻoku fēfē ʻene tui ki ha faʻahinga meʻa. Te ke toki ʻiloʻi leva ʻa e tafaʻaki ʻoku fie maʻu ke fai ai ʻa e tokoní, pea te ke lava leva ke fai ha tokoni ʻoku feʻunga kiate iá.
5 Kapau ʻoku ʻikai ke fakalakalaka ha toko taha ako Tohi Tapu, ʻoku fie maʻu ke ke ʻai ke ne fie tala mai pe ko e hā ʻa e ngaahi ʻuhingá. Ke fai ʻa e meʻá ni ʻe fie maʻu nai ke toe ʻaʻahi ʻi he taimi kehe ia ʻo ʻikai ko e taimi ʻoku faʻa fai ai ʻa e akó. Ko e hā ʻokú ne toumoua ai ke fai ha meʻa? ʻOku ʻi ai ha meʻa mei he Tohi Tapú ʻoku ʻikai ke mahino kiate ia? ʻOkú ne fakataʻetaʻefiefai ʻa e ngaahi liliu ʻi he founga ʻo ʻene moʻuí? Kapau ko e toko taha ako Tohi Tapú ʻoku kei ‘toumouá,’ tokoniʻi ia ke ne fakatokangaʻi ʻa e fakatuʻutāmaki ʻo e fai pehē.—1 Tuʻi 18:21.
6 Naʻe ʻiloʻi ʻe he ʻaposetolo ko Paulá ko hono akoʻi ʻo e ngaahi moʻoni ʻo e Tohi Tapú ki he kakai ʻoku fie fanongó ko e ngāue fakahaofi moʻui, ko ia naʻá ne akonaki ki he kau Kalisitiané kotoa ke nau ‘toutou tokanga ki he meʻa ʻoku nau ako ʻakí.’ (1 Tīm. 4:16) Ko kinautolu ʻokú ke ako ʻa e Tohi Tapú mo kinautolú kuo pau ke ʻoua ʻe ngata pē ʻenau ʻilo ʻa e ngaahi moʻoniʻi meʻa ʻo kau ki he Tohi Tapú mo e ngaahi meʻa ʻoku hoko ʻi māmaní. Kuo pau ke nau maʻu mo e ʻilo kānokano ʻo kau kia Sihova mo Sīsū pea ke tokoniʻi kinautolu ke fakatupulekina ʻa e vahaʻangatae māfana mo kinaua. Ko hono toki fai pē ʻa e meʻá ni ʻe ueʻi ai kinautolu ke fakahāhā ʻenau tuí ʻaki ʻa e ngaahi ngāué. (Sēm. 2:17, 21, 22) ʻI he aʻu ki he loto ʻo e toko taha akó, ʻe toki ueʻi leva ia ke fou ʻi he hala ʻa ia ʻe fakalāngilangiʻi ai ʻa Sihova mo maluʻi ai ʻene moʻuí.—Pal. 2:20-22.