Puha Fehuʻi
◼ ʻOkú Ke Mateuteu ki ha Meʻa ʻE Hoko Fakafokifā?
ʻI he māmani ʻo onopōní, ko e “faingamalie mo e tuʻutamaki” ʻokú na faʻa fakataha ʻo faʻu ha meʻa ʻoku hoko fakafokifā fakafaitoʻo, kau ai ʻa e fakaʻaiʻai ke fai ha huhu toto. (Koh. 9:11) Ko ia ke malava ke tau mateuteu ki ha meʻa ʻe hoko, kuo tokonaki mai ʻe Sihova ʻa e tokoni ʻi he ngaahi founga lahi ʻo fakafou mai ʻi heʻene kautahá, ka ʻokú ne ʻamanekina mai kitautolu ke tau fai ʻetau tafaʻakí. ʻI laló ko ha lisi ia ke tokoni kiate koe.
• Toʻotoʻo maʻu pē he taimi kotoa ʻa e kaati Advance Medical Directive/Release lolotongá.
• Fakapapauʻi ʻoku toʻo ʻe hoʻo fānaú ʻa e Identity Card lolotongá.
• Fakamanatu ʻa e fakalahi ʻi he ʻEtau Ngāue Fakafaifekau ʻo e Puleʻanga ʻo Sepitema 1992, ʻahiʻahi ʻa e founga ke fakaʻuhinga ai mo e kau toketaá mo e kau fakamāú fekauʻaki mo e faitoʻo ki hoʻo kiʻi tamá.
• Fakamanatu ʻa e ngaahi kupu fekauʻaki mo e ngaahi konga ʻo e totó mo e ngaahi meʻa kehe ke fetongiʻaki ʻa e totó. (Fokotuʻu: The Watchtower, ʻOkatopa 1, 1994, peesi 31; Sune 1, 1990, peesi 30-31; Maʻasi 1, 1989, peesi 30-31; Awake!, ʻo Tīsema 8, 1994, peesi 23-27; ʻAokosi 8, 1993, peesi 22-25; Nōvema 22, 1991, peesi 10; pea mo e fakalahi ʻo ʻEtau Ngāue Fakafaifekau ʻo e Puleʻanga, Sepitema 1992 mo e Fepueli 1991. Tauhi kinautolu ʻi ha faile ke faingofua ke maʻu ia.)
• Fakapapauʻi totonu kapau ʻoku lava ke ke fakaʻatā hono ngāueʻaki ʻo e ngaahi mīsini ko ia ke nau ʻave takai ʻa e totó ʻi tuʻa mei he sinó pe kapau ʻoku malava ke ke tali ʻa e ngaahi meʻa ʻoku ʻi ai ʻa e ngaahi konga ʻo e totó. (Kapau ʻokú ke fakafonu ha foomu mafai fakalao tuʻuloa ki he tokangaʻi ʻo e moʻuí—ʻa ia ʻoku lelei—te ke sio ai ki he tokonaki ko ia ʻoku ʻomai ʻi he fōmú kiate koe ke ke fakahaaʻi hoʻo fili fakapapau pē ʻaʻau ki he faitoʻo ke faí.)
• Ki muʻa ke ʻalu ki he falemahakí, kapau ʻoku malava kotoa, ʻai ke ʻilo ʻe he kau mātuʻá koeʻuhí ke lava ke nau poupouʻi koe pea fetuʻutaki ki he Kōmiti Fetuʻutaki Fakafalemahaki (HLC) kapau ʻoku fiemaʻu. ʻI he meʻa fekauʻaki mo e fānau īkí, kole ki he kau mātuʻá ke nau fakahā ki muʻa ki he HLC.
ʻAi ke Mahino Hoʻo Fakafisi Fekauʻaki mo e Totó: ʻOku hā mei he ngaahi līpōtí ʻoku tatali ʻa e fanga tokoua mo e fanga tuofāfine ʻe niʻihi kae ʻoua kuo aʻu ki he miniti fakaʻosí pea toki tala ki he kau toketā faitoʻó ʻoku ʻikai te nau fiemaʻu ha toto. ʻOku taʻetotonu ʻeni ki he kau ngāue fakafaitoʻó pea ʻoku ʻai ai koe ki ha tuʻunga fakatuʻutāmaki ʻi hano fai ha huhu totó. Kapau ʻoku ʻilo ʻe he kau toketaá ʻa hoʻo ngaahi tuipaú pea mo hoʻo ngaahi fakaʻamú kuo poupouʻi ʻe ha ngaahi pepa kuo fai ha fakamoʻoni hingoa ai ʻa ia ʻoku fakahā ai ʻa hoʻo ngaahi fakahinohino paú, ʻe tokoni ia kiate kinautolu ke nau fai ʻa e faitoʻó ʻo ʻoua ʻe toe toloi pea ʻoku faʻa tānaki atu ai kiate kinautolu ha fili ke fai ha ngāue fakafaitoʻo ʻo ʻikai ʻaki ha toto.
Koeʻuhi ko e lava ke hoko fakafokifā ha meʻa fakafaitoʻo ʻi ha taimi pē, ʻo tautautefito ʻi he taimi ʻoku ʻikai te ke ʻamanekina aí, fai ha laka he taimí ni ke maluʻi koe mo hoʻo fānaú mei ha huhu toto.—Pal. 16:20; 22:3.