ʻOku Fakalahi Atu ʻa e Lotu Moʻoní ʻi ʻIulope Hahake
1 Ko e kau Kalisitiane ʻi he ʻuluaki senitulí ko e kau malanga faivelenga ʻo e Puleʻangá. Naʻa nau fiefia ʻi he taimi naʻe hoko ai ʻa e ngaahi fakatahaʻangá ʻo ‘fakautuutu ʻa e tokolahí ʻi he ʻaho kotoa pe.’ (Ng. 16:5) Ko ʻenau malanga loto-toʻá naʻe aʻu ai ʻa e lotu moʻoní ki ʻĒsia, ʻAfilika, mo ʻIulope, ʻo iku ai ki ha utu-taʻu lahi ʻo e kau tuí.
2 ʻI he taimi ko ʻeni ʻo e ngataʻangá, ʻoku hokohoko atu ʻa e lotu moʻoní ke fakalahi atu ʻi he ngaahi fonua ʻo ʻIulope Hahaké. ʻI he ngaahi fonua ko ia naʻa tau ʻi he malumalu ai ʻo e ngaahi fakataputapui fakapuleʻangá talu mei he ngaahi taʻu 1990 tupú, ʻoku tau hokosia ai he taimí ni ʻa e ngaahi tupulaki fakaʻulia. ʻOku fakahā mai ʻe he 1999 Yearbook ko e ua ʻi he ngaahi fonua peheé, ʻa Lūsia mo ʻIukalaine, ʻoku līpooti taki taha mei ai ʻa e kau malanga laka hake ʻi he toko 100,000 ʻoku nau kau ki he ngāue fakafaifekaú. ʻI he ngaahi feituʻu ʻe 15 he Sovieti ʻIunioni ki muʻá, talu mei he 1991 kuo laka hake ʻi he faʻahinga ʻe toko 220,000 naʻa nau fakatapui kinautolu kia Sihova pea hoko ʻo papitaiso! Ko e tupulekina vave ko ʻení kuó ne ʻai ai ke fiemaʻu ke langa ke lahi ʻa e ngaahi Fale Fakatahaʻanga mo e ngaahi Holo ʻAsemipilī foʻou pea pehē ki hono fakalahi atu ha ngaahi ʻōfisi vaʻa lahi.
3 Hangē ko ia naʻe fanongonongo ʻi he ʻIunaite Seteté ʻi he ʻEtau Ngāue Fakafaifekau ʻo e Puleʻanga ʻo Maʻasi 1997, kuo ngāueʻaki ʻa e konga ʻo e Paʻanga Fale Fakatahaʻanga ʻa e Sōsaietí ʻi he ngaahi fonua lalahi angé ke tokonaki ai ʻa e ngaahi nō ki he ngaahi fakatahaʻanga ʻi he ngaahi fonua ʻoku ʻi ai ʻa e fuʻu fiemaʻu fakavavevave ki he ngaahi Fale Fakatahaʻanga lahi ange ka ʻoku fakangatangata ai ʻa e ngaahi tokoní, pea ʻi ai ʻa e ngaahi palopalema fakaʻikonōmika faingataʻa. ʻI he vahaʻa ʻo Maʻasi 1996 mo ʻOkatopa 1998, naʻe tali ai ʻe he Sōsaietí ʻa e kole nō Fale Fakatahaʻanga ʻe 359 mei he ngaahi ʻōfisi vaʻa ʻoku nau tokangaʻi ʻa e ngaahi fonua ʻe 11 ʻi ʻIulope Hahaké. Kuo ngāueʻaki ʻa e ngaahi paʻanga naʻe tānakí ke fakatau ha kelekele mo e ngaahi naunau ki hono langa ʻa e ngaahi Fale Fakatahaʻanga foʻoú, pea ke tokoniʻi ʻa e ngaahi fakatahaʻangá ke toe fakafoʻou ʻa e ngaahi fale kuo ʻosi ʻi aí. Ko e ngaahi fakatātā ʻoku hā hení ʻoku ʻomai ai kiate kitautolu ha fakakaukau ʻo e founga ʻoku maʻu ʻaonga ai ʻa e fanga tokoua ʻi ʻIulope Hahaké ʻi he ngaahi tokoni ki he Paʻanga Fale Fakatahaʻanga ʻa e Sōsaietí ʻi he ʻIunaite Seteté pea ʻi he ngaahi fonua kehé.
4 ʻI he lolotonga ʻo e 1998, naʻe hokosia ʻe Pulukālia ha tupu peseti ʻe 12, pea naʻe fiefia ʻa e fanga tokouá ʻi he taimi naʻe fakatapui ai honau ʻuluaki Fale Fakatahaʻangá ʻi ʻEpeleli ʻo e taʻu ko iá. Naʻe fiefia ʻa Kolotia ʻi ha tupu peseti ʻe 4, pea ʻi he lolotonga ní ko e fanga tokoua ʻi aí ʻoku nau langa ʻa e ngaahi Fale Fakatahaʻanga lahi ange ke fakalahi atu ʻa e lotu moʻoní. ʻI Hungali ko e ngaahi Fale Fakatahaʻanga ʻe 80 nai kuo ngāueʻaki ʻe he ngaahi fakatahaʻanga ʻe 144. ʻOku ʻuhinga ʻení ko e ngaahi fakatahaʻanga ʻe 235 ʻi he fonua ko iá, ko e peseti ʻe 61 ʻoku nau maʻu honau feituʻu faiʻanga lotu pē ʻonautolu. ʻI Masitōnia ko e polokalama langa Fale Fakatahaʻangá kuó ne fakaʻosi ʻa e ongo holo foʻou ʻe ua, pea ʻoku kei langa ʻa e ngaahi holo lahi ange. ʻI he faʻahitaʻu māfana ʻo e 1999, naʻe kakato ai ʻa e Fale Fakatahaʻanga ʻe ua ʻi he kolo lahi ko Skopje. Ko e holo ko ʻení ʻoku lahi ke ngāueʻaki ʻe he ngaahi fakatahaʻanga ʻo ʻikai toe siʻi hifo he onó. ʻI he taʻu kuo ʻosí ʻi Lūsia, ko ha ʻavalisi ko e toko 260 tupu naʻe papitaiso ʻi he uike taki taha! ʻI he muimui ki he faʻifaʻitakiʻanga ʻoku ngāueʻaki ʻi he ngaahi fonua kehé, kuo fokotuʻutuʻu he taimí ni ʻe he vaʻa ʻi Lūsiá ʻa e Ngaahi Kōmiti Langa Fakalotofonua ʻe 12 ʻi he kotoa ʻo honau feituʻu lahi, ke poupouʻi ʻa e ngaahi polokalama langa Fale Fakatahaʻanga ʻi he kahaʻú. ʻI he tafaʻaki faka-tokelau ʻo St. Petersburg, ʻoku langa ai ʻa e fuofua Holo ʻAsemipilī ʻa e fonua ko iá, ʻa ia ʻe nofoʻi ʻe he toko 1,600. ʻE toe fakakau atu ki he falé ʻa e ngaahi Fale Fakatahaʻanga ʻe nima ʻo taki sea ʻe 200. Ke tokangaʻi ʻa e ngaahi fiemaʻu fakalaumālie ʻa hotau fanga tokouá pea mo e faʻahinga mahuʻingaʻia tokolahi ʻi ʻIukalainé, kuo ʻosi fakakakato ʻa e ngaahi Fale Fakatahaʻanga ʻe 84 pea ʻoku kei langa ʻa e 80.
5 ʻIkai ʻoku ʻomai ʻe he tupulaki ko ʻeni ʻi ʻIulope Hahaké ʻa e fiefia ki hotau lotó? Pe ʻoku tau nofo ʻi fē, ko hono fakalahi ʻo e lotu moʻoní ʻokú ne fakamanatu mai kiate kitautolu ko e ʻOtuá ʻoku ʻikai ke filifilimānako pea ko ʻene kātaki fuoloá ʻe ʻuhinga ia ki he fakamoʻui ki ha “fuʻu kakai lahi.” (Fkh. 7:9; 2 Pita 3:9) Ko ha monū ē kiate kitautolu ke tau kiʻi kau atu ki hono tokoniʻi ʻa e tupulaki fakalaumālie ʻa e niʻihi kehé, naʻa mo e faʻahinga ʻi he ngaahi fonua mamaʻó! ʻOku fakapapauʻi mai kiate kitautolu ʻe he Palovepi 28:27 ʻo pehē “ko ia ʻoku ne foaki ki he masiva ʻe ʻikai te ne fusimoʻomo.” Ko ʻetau loto-lelei ke tokoni ke feau ʻa e ngaahi totongi langa ko ʻení ʻoku iku ai ki he “fakafeʻunga” ʻo e ngaahi meʻa fakamatelié, ʻo malava ai ke maʻu ʻe he tokotaha kotoa pē ʻa e fiefia ʻoku hoko mai mei hono fai ʻo e foakí pea mo e fiefia ʻoku tupu mei he sio ki he fakalahi atu ʻi māmani lahi ʻa e lotu moʻoní.—2 Kol. 8:14, 15; Ng. 20:35.
[Fakatātā ʻi he peesi 3]
Săcele, Lumēnia
[Fakatātā ʻi he peesi 3]
Maardu, ʻEsitōnia
[Fakatātā ʻi he peesi 3]
Sevnica, Solovēnia
[Fakatātā ʻi he peesi 3]
Tiszavasvári, Hungali
[Fakatātā ʻi he peesi 4]
Jūrmala, Lativia
[Fakatātā ʻi he peesi 4]
Tallinn, ʻEsitōnia
[Fakatātā ʻi he peesi 4, 5]
Taurage, Lituēnia
[Fakatātā ʻi he peesi 4, 5]
Belgrade, ʻIukosilāvia
[Fakatātā ʻi he peesi 5]
Prievidza, Solovākia
[Fakatātā ʻi he peesi 5]
Mátészalka, Hungali
[Fakatātā ʻi he peesi 6]
Vranov nad Topl’ou, Solovākia
[Fakatātā ʻi he peesi 6]
Ruma, ʻIukosilāvia
[Fakatātā ʻi he peesi 6]
Tornakalns, Lativia