Polokalama ʻAsemipilī Fakasēketi Foʻou
1 Naʻe tomuʻa tala ʻe hotau ʻEikí ʻe mamahi ʻa ʻene kau ākongá. (Mt. 24:9) ʻOku totonu ke fēfē ʻetau vakai ki he ngaahi ʻahiʻahí? Ko e hā te ne ʻai ke tau malava ʻo kātekina ʻa e mamahí? Ko e polokalama ʻasemipilī fakasēketi ki he taʻu fakangāue 2004 te ne tali ʻa e ongo fehuʻi ko ení. Ko e kaveingá ko e “Fiefia i he Amanaki Lelei; bea Faa Kataki i he Mamahi.”—Loma 12:12, PM.
2 Malanga Fakakongokonga ʻe Ua: Ko e ʻuluaki malanga fakakongokongá, ʻoku fakakaveinga ko e “Fua ʻi he Kātakí,” ʻe lāulea ai ki he ngaahi founga ʻa ia ʻoku tau fua aí. ʻE fakaʻekeʻeke ai ʻa e kau malanga ʻe niʻihi ʻo fekauʻaki mo e founga ʻo ʻenau malanga mo faiako fakataha mo ha ongoʻi ʻo e fakavavevavé. ʻE loto tautefito ʻa e ngaahi mātuʻá ke nau tokanga ki he konga “Taimi ʻOku Akonekina Ai ʻe Sihová,” ʻa ia ʻe lāulea ai ki he founga ʻe lava ke fakaʻuhinga ai ʻa e ngaahi mātuʻá mo ʻenau fānaú. Ko e tokotaha malanga fakaʻosi ʻo e malanga fakakongokongá te ne fakamamafaʻi ʻa e meʻa kuo pau ke tau fai ke taʻofiʻaki ʻa e māmaní mei hono uesia māmālie pea fakatupunga kitautolu ke tau hoko ai ʻo taʻefuá.—Mk. 4:19.
3 Ko e “Lele ʻi he Lová Fakataha mo e Kātakí” ʻa e kaveinga ʻo e malanga fakakongokonga hono uá. ʻE fakahaaʻi mahino ai ʻa e founga ʻoku hangē ai ʻa e ʻalunga ʻo ʻetau moʻuí ko ha lová. Ko e hā ʻoku fiemaʻu ai ke tau lele ʻo fakatatau ki he ngaahi laó? ʻE lava fēfē ke tau lavameʻa ʻi hono huʻihuʻi atu ʻa e fakamamafa kotoa pē pea ʻikai helaʻia ʻi he lova ki he moʻuí? Ko e akonaki Fakatohitapu taimi totonu ʻa ia ʻe tokonaki maí te ne tokoniʻi ʻa kitautolu kotoa ke tau hokohoko atu ai ʻi he lele fakataha mo e kātakí.
4 ʻOmai ʻe he Kātakí ʻa e Hōifua ʻa e ʻOtuá: Ko e ngaahi malanga ʻe fakahoko ʻe he kau ʻovasia fefonongaʻakí ʻe fakamoʻoniʻi ʻa ʻene fakatupu tui mālohi ki he faʻahinga ʻoku nau fanongo pea ngāueʻaki ʻa e akonakí. Ko e taha ʻo e ngaahi malanga ʻa e ʻovasia fakavahé ʻoku fakakaveinga ia ko e “Iku ʻa e Kātakí ki ha Tuʻunga Fakahōifua.” Ko e malanga maʻá e kakaí ʻe tali ai ʻa e ongo fehuʻi: Ko e huafa ʻo hai ʻoku totonu ke ʻamanaki ki ai ʻa e ngaahi puleʻangá, pea ko e hā ʻoku kau ki he meʻa ko iá? Ko e malanga fakaʻosi, “ʻI he Kātakí Te Moʻu Maʻu Mai Ai Homou Laumālié,” ʻe lāulea ai ki he founga naʻe malava ai ʻa Sīsū ke ne kātakiʻi ʻa e fakamaau taʻetotonú ʻo ʻikai te ne hoko ʻo loto-koná.
5 Manatuʻi ke ʻomai ʻa hoʻo tohi Ako Fakafaifekau mo hoʻo Taua Leʻo ki he uike ko iá. Hiki ha ngaahi nouti ke tokoniʻi ai koe ke ke tokanga pea ke vakai ki ai ʻi he kahaʻú. Ko ha fakamanatu ʻo e polokalamá ʻe fai ia ʻamui ange ʻi he fakatahaʻangá.
6 Kuo teuteu ʻe Sihova tonu ha kātoanga kai ʻo e meʻakai fakalaumālie. Haʻu! Maʻu ʻinasi! Te tau kalanga fiefia kapau te tau ʻi ai ke maʻu ʻaonga mei he polokalamá fakakātoa.—Ai. 65:14.