Fakaivifoʻou ʻa e Fakaongoongoleleí
1 “ʻIkai naʻá ku hoko ko ha taʻahine lelei he ʻahó ni?” ko e tangi ia ʻa e kiʻi taʻahiné ʻi he taimi mohé. Naʻe fakaʻohovaleʻi ʻene faʻeé ʻe he foʻi fehuʻi ko iá. Neongo ʻene fakatokangaʻi ʻa e tōtōivi ʻene kiʻi taʻahiné he feinga ke anga-lelei he ʻaho ko iá, naʻá ne taʻetokanga ke fakahā naʻa mo ha kiʻi foʻi lea fakahoungaʻi pē ā ʻe taha. Ko e loʻimata ʻo e kiʻi taʻahine ko iá ʻoku totonu ke hoko ia ko ha fakamanatu ko kitautolu kotoa—ʻa e taʻu siʻi mo e taʻumotuʻa—ʻoku tau fiemaʻu ʻa e fakaongoongoleleí. ʻOku tau fakaivifoʻou ʻa e faʻahinga takatakai ʻia kitautolú ʻi hono fakahāhā ʻo e houngaʻia ki he lelei ʻoku nau faí?—Pal. 25:11.
2 ʻOku ʻomai ʻe he kaungā Kalisitiané kiate kitautolu ʻa e ngaahi ʻuhinga lahi ke fakaongoongoleleiʻi ai kinautolu. Ko e kau mātuʻá, kau sevāniti fakafaifekaú, mo e kau tāimuʻá ʻoku nau ngāue mālohi ke fakahoko honau ngaahi fatongiá. (1 Tim. 4:10; 5:17) ʻOku fai ʻe he ngaahi mātuʻa manavahē-ʻOtuá ʻenau lelei tahá ke ʻohake ʻenau fānaú ʻi he ngaahi founga ʻa Sihová. (Ef. 6:4) ʻOku faitau mālohi ʻa e kau talavou Kalisitiané ke talitekeʻi ʻa e “laumalie ʻoku ʻo mamani.” (1 Kol. 2:12; Ef. 2:1-3) ʻOku tauhi faitōnunga ʻa e niʻihi kehé kia Sihova neongo ʻa e hoholo ke motuʻá, ngaahi palopalema fakaemoʻui leleí, pe ko e ngaahi ʻahiʻahi kehe. (2 Kol. 12:7) Ko e faʻahinga kotoa ko iá ʻoku nau tuha mo e fakaongoongoleleí. ʻOku tau ʻiloʻi ʻenau ngaahi feinga ʻoku taau ke fakahīkihikiʻí?
3 Fakafoʻituitui mo Fakahangatonu: ʻOku tau fiefia moʻoni kotoa ke fanongo ki he fakaongoongolelei mei he peletifōmú. Kae kehe, ʻoku aʻu ʻo toe fakaivifoʻou ange ʻa e fakaongoongoleleí ʻi hono fai fakahangatonu fakafoʻituitui mai kia kitautolú. Ko e fakatātaá, ʻi he vahe 16 ʻo ʻene tohi ki he kau Lomá, naʻe fai ai ʻe Paula ha ngaahi fakamatala fakahangatonu ʻo e houngaʻia fekauʻaki mo Fīpē, Pīsila mo ʻAkuila, Talaifina mo Talaifosa, mo Pēsisi, ʻi he haʻohaʻonga ʻo e niʻihi kehé. (Loma 16:1-4, 12) He fakaivifoʻou moʻoni ē kuo pau ne fai ʻe heʻene ngaahi leá ki he faʻahinga faitōnunga ko iá! Ko e fakahīkihiki peheé ʻoku fakapapauʻi ai ki hotau fanga tokouá mo e fanga tuofāfiné ʻoku fiemaʻu kinautolu pea ʻoku hoko ia ʻo ne tohoakiʻi fakatahataha mai ai kitautolu ke tau vāofi ange. Kuó ke fai ki muí ni ha fakaongoongolelei fakafoʻituitui mo fakahangatonu?—Ef. 4:29.
4 Mei he Lotó: Ke hoko ʻo fakaivifoʻou moʻoni, kuo pau ke moʻoni ʻa e fakaongoongoleleí. ʻOku lava ke tala ʻe he kakaí pe ʻoku tau lea mei he lotó pe ʻoku tau “lea fakalai” pē. (Pal. 28:23) ʻI heʻetau akoʻi kitautolu ke fakatokangaʻi ʻa e lelei ʻi he niʻihi kehé, ʻe ueʻi ai hotau lotó ke fai ʻa e fakaongoongoleleí. ʻOfa ke tau loto-fiefoaki ʻi hono fai ʻa e fakaongoongolelei moʻoní, ʻi he ʻiloʻi “ko e lea ʻoku fai ʻi hono taimi totonu, hono ʻikai lelei.”—Pal. 15:23.