Puha Fehuʻi
◼ ʻOku totonu ke fēfē ʻetau tokanga ki he ngaahi ngāue ʻa e fakatahaʻangá?
Ko e lele maau ʻa ha fakatahaʻanga ʻa e kakai ʻa Sihová ko e ola ia ʻo e feinga fāʻūtaha. (1 Kol. 14:33, 40) Fakakaukau atu ki he meʻa ʻoku kau ki ha fakataha pē ʻe taha ʻa e fakatahaʻangá. Tuku kehe ʻa e polokalamá tonu, ʻoku lahi ʻa e ngāue ʻi he ki muʻa pea mo e hili ʻa e fakatahá ʻi hono tokangaʻi ʻe he fanga tokouá mo e fanga tuofāfiné ʻa e ngaahi ngāue kehekehe. Ko e ngaahi fatongia kehe ʻoku tokangaʻi ʻo ʻikai sio ki ai ʻa e niʻihi kehé ʻoku toe mahuʻinga foki mo ia. ʻE lava fēfē ke tau taki taha tokoni ki he fokotuʻutuʻu ko ení?
Fakafaingamālieʻi koe. Ko e faʻahinga ʻoku nau maʻu ha laumālie loto-leleí te nau ʻiloʻi ʻa e meʻa lahi ke fai. (Sāme 110:3) Fakahaaʻi ʻa e tokanga ki he kau puké mo e taʻumotuʻá. Tokoni ʻi hono fakamaʻa ʻa e Fale Fakatahaʻangá. ʻE lava ke tau fakahoko ʻa e ngaahi ngāue ʻaonga lahi ʻo ʻikai ha kole makehe ki ai. ʻOku tau fiemaʻu pē ha holi ke tokoni.
Tauhi anga-fakanānā. ʻOku fiefia ʻa e kakai anga-fakanānaá ʻi he tauhi ki he niʻihi kehé. (Luke 9:48) ʻE taʻofi kitautolu ʻe he anga-fakanānaá mei hono fai ʻa e meʻa lahi ange ʻi he meʻa ʻoku lava moʻoni ke tau fakahokó. ʻIkai ko ia pē, ʻe taʻofi kitautolu ʻe he anga-fakanānaá mei he fakalaka atu ʻi he ngaahi ngataʻanga ʻo ʻetau mafaí.—Pal. 11:2.
Hoko ʻo alafalalaʻanga. Naʻe fakalototoʻaʻi ʻa Mōsese ke ne fili ha “kakai fai moʻoni” pe alafalalaʻanga ke nau fakahoko ʻa e ngaahi tuʻunga fua fatongia ʻi ʻIsileli ʻo e kuonga muʻá. (Eki. 18:21) ʻOku fiemaʻu ʻa e anga tatau ko ení ʻi he ʻahó ni. Tokanga fakamākukanga ki he ngāue taki taha ʻokú ke maʻú. (Luke 16:10) Kapau ʻoku ʻikai lava ke ke fakahoko ha ngāue, fakapapauʻi ke fai ha ngaahi fokotuʻutuʻu feʻungamālie ki ha taha ke ne tokangaʻi ia ʻi he ʻikai te ke ʻi aí.
ʻOatu hoʻo lelei tahá. ʻOku ekinaki ki he kau Kalisitiané ke nau ngāue ʻaufuatō naʻa mo e ʻi he ngaahi meʻa fakamāmaní. (Kol. 3:22-24) ʻOku ʻi ai ʻa e ʻuhinga lahi ange ke fai pehē ʻi he ngāue ke laka ki muʻa ʻa e lotu moʻoní. Neongo kapau ʻoku hā māʻulalo pe taʻemahuʻinga ha ngāue, ko ha tāpuaki ē ki he fakatahaʻangá ʻa e taimi ʻoku fai lelei ai iá.
ʻOku tokonaki mai ʻe he ngāue taki taha ha faingamālie ke fakahāhā ai ʻetau ʻofa kia Sihova mo hotau fanga tokouá. (Mt. 22:37-39) ʻOfa ke tau tokangaʻi faitōnunga ha faʻahinga fatongia pē ʻoku tuku mai kia kitautolu.