Langa Fale Fakatahaʻanga ʻi Hotau Ngaahi Feituʻu Motú
1 “Kuo tuʻi ʻa Sihova; ke hakahaka ai ʻa mamani; ke fuʻu fiefia ai ʻa e ʻu motu lahi.” ʻOku fakamatalaʻi feʻungamālie ʻe he Sāme 97:1 ʻa e ola kuo fakahoko ʻe he lotu moʻoní ki he laui miliona ʻo e kau nofo ʻi he māmaní, ʻo kau ai ʻa e faʻahinga ʻoku nofo ʻi he ʻotu motu mamaʻo ʻo e tahí. ʻOku ʻikai ke taʻekau ai mo e ʻotu motu ʻoku tokangaʻi ʻe he vaʻa ʻi Nuʻu Silá.
2 Ko e feituʻu vaʻa ʻo Nuʻu Silá ʻoku kau ki ai ʻa e ʻOtu Motu Kukí, ʻOtu Tongá, Motu Niueé, Motu Nōfokí mo e Motu Pitikení. Tuku kehe ʻa Pitikeni, ʻoku ngāue ʻa e fakatahaʻanga ʻe hiva mo e kulupu mavahe ʻe taha ʻi he ʻotu motu kotoa ko ení. Kuo vaheʻi ʻa e kau misinale mo e kau tāimuʻa makehe, ko e niʻihi mei Nuʻu Sila, ke nau tokoni ʻi he ngāue ʻi ʻAitutaki, Niuē pea mo Tonga. ʻI he fakakātoá, ko e tuliki makehe ko eni ʻo hotau feituʻu ngāué ʻoku ʻi ai ʻa e kau malanga ʻe toko 413, ko e toko 31 ai ʻoku nau ngāue ko e kau tāimuʻa tuʻumaʻu, toko 14 ko e kau tāimuʻa makehe mo e toko 8 ko e kau misinale. ʻOku fanongoa moʻoni ʻa e kaila fiefia ʻi he ʻotu motu ko eni ʻo e tahí.
3 Ko ha toe ʻuhinga ke fiefia ai ʻa e ʻotu motú ni ko hono langa ʻo e ngaahi Fale Fakatahaʻanga foʻou, fakataha mo e nofoʻanga feʻunga ki he kau tāimuʻa makehé ʻi he ngaahi tuʻunga ʻe niʻihi. Laka hake ʻi he taʻu ʻe tolu kuohilí, kuo langa, fakalahi pea mo fakaleleiʻi ai ʻa e ngaahi holo ʻi he ʻotu motu ʻo Nōfokí, Niuē, Tongatapu mo ʻEua. Ko e ngāue ʻi ʻEuá, ʻa ia ʻoku kau ki ai ha Fale Fakatahaʻanga foʻou mo e feleti ki ha ongo tāimuʻa makehe, naʻe kakato ia ʻi ʻAokosi ʻo e taʻu ní.
4 Kuo houngaʻia ʻa e fanga tokoua fakalotofonuá ʻi he loto-lelei kuo fakahāhā ʻe he kau ngāue pole pōtoʻi mei Nuʻu Sila mo Lalotongá, ʻi heʻenau kātaki ʻi he nofo ʻi he taimi ʻe niʻihi ʻi he ngaahi tuʻunga ngāue mo e nofoʻanga ʻikai loko lelei ʻo aʻu ki he vahaʻa taimi ko e uike ʻe fitu, koeʻuhí ke lava ʻo ʻi ai ʻa e ngaahi fale ko eni ʻoku fiemaʻu lahi ki he lotú. ʻI he tuipau ko Sihova ʻokú ne ‘langa ʻa e falé’ ʻoku fanongoa ai ʻa e ngaahi kaila fiefia ʻo e fakahīkihiki mei he kau ngāue polé kotoa fakataha mo hotau fanga tokoua ʻi he ʻotu motu ko iá ʻa ia kuo nau maʻu he taimí ni ha ngaahi Fale Fakatahaʻanga ke lotu ai, ka naʻe hala ki muʻá.—Sāme 127:1.
5 Ko e hā ʻa e ngaahi fiemaʻu ki he kahaʻú ʻa hotau fanga tokoua ʻi he ngaahi feituʻu mamaʻo ko eni ʻo hotau feituʻu ngāué? ʻOku fiemaʻu fakavavevave ha ngaahi Fale Fakatahaʻanga ki Haʻapai, Tonga, pea ki ʻAitutaki ʻi he ʻOtu Motu Kukí. Tānaki atu ki ai, ʻoku fiemaʻu ha fakalahi ʻo e Fale Fakatahaʻanga mo e ʻapi misinale ʻi he motu ko Vavaʻú ʻi Tonga. ʻI ha palani tōmuʻa kuo ʻosi fai, ʻoku ʻi ai ʻa e ʻamanaki ʻe lava ke fokotuʻutuʻu ʻa e taha ʻo e ngaahi langa ko ení ki ha taimi lolotonga ʻa e 2005.
6 Ko e langa ʻo e ngaahi Fale Fakatahaʻanga ʻi hotau ngaahi feituʻu motú ʻoku fiemaʻu ki ai ʻa e palani lahi ki muʻa. ʻI he tuʻunga lahi tahá, ʻoku maʻu ʻa e ngaahi naunau langá mo e naunau falé ʻi Nuʻu Sila pea toki fakaheka vaka ai ki he motu ko ia ʻe fakahoko ai ʻa e langá. ʻI he ngaahi tuʻunga ʻe niʻihi, ko e ngaahi koloa ʻoku feletí ʻe fiemaʻu ia ke toʻo mei he ngaahi koniteiná ʻi he motu lahí pea toki fakaheka vaka atu ai ki ha motu mavahe, ʻa ia ʻoku mātuʻaki fakangatangata ai ʻa e ngaahi utaʻanga ki hono fetuku ʻo e ngaahi naunau langá. Ko e fakaheka vaká mo e ngaahi tute hū maí ʻoku fakalahi ai ʻa e fakamole ki he ngaahi langá ni ʻo aʻu ki he peseti ʻe 30!
7 ʻOku maʻu mei fē ʻa e paʻanga ʻoku fiemaʻu ki he ngaahi ngāue peheé? Koeʻuhi ko e tuʻunga fakangatangata fakapaʻanga ʻa hotau fanga tokoua ʻi he ngaahi feituʻu ko eni ʻo e fiemaʻú, kuo tokonaki mai ai ʻe he ʻōfisi vaʻá ʻa e paʻanga ki he ngāue taki taha. Ko e ngaahi tokoni ʻoku maʻu ʻi he vaʻá ʻa ia ʻoku fakaʻilongaʻi ko e ‘ngaahi ngāue ʻi mulí,’ kuo toe tokoni ia ke ‘lave ʻa e meʻa hulú ki he meʻa taʻeaʻú.’ (2 Kol. 8:14) Ko e fokotuʻutuʻu foʻoú ni ʻa ia ʻoku fakaʻatā ai he taimí ni ʻa e ngaahi tokoní ke kau ai ʻa e ngaahi fiemaʻu fakavahaʻapuleʻangá, ʻe hokohoko atu hono fakapapauʻi ʻoku ʻi ai ha “fakafeʻunga” pe vahevahe tatau ʻo e ngaahi koloá. Ko hono poupouʻi nima-homo ʻa e fokotuʻutuʻu ko ení ʻe fakapapauʻi ai ʻa e taimi mo e lahi ʻo e ngaahi ngāue pehē ʻe lava ke fakahoko ʻi he kahaʻú.—2 Kol. 9:7.
8 ʻI he ʻi ai ʻa e ngaahi taimi-tēpile kuo palani ke tokangaʻi ai ʻa e ngaahi fiemaʻu makehe ko eni ʻa hotau ngaahi feituʻu motú, pea ʻi he fakatuʻotuʻa atu ki he ngaahi tokoni te ne ʻai ia ke hoko moʻoní, ʻoku tau tuipau ko e “ngaahi motu mo e nofo ai” ʻe vavé ni ke toe ʻi ai ʻa e ʻuhinga lahi ange ke nau “tuku kia Sihova ʻa e kololia, mo fakahaʻi . . . hono fakamaloʻia.”—Ai. 42:10, 12.
[Fakatātā ʻi he peesi 4]
Fale Fakatahaʻanga foʻou mo e Fale Nofoʻanga ʻi ʻEua
[Fakatātā ʻi he peesi 5]
Toe Holo ʻe taha mo e fakalahi ʻo e ʻŌfisi Liliu Lea ʻi Tongatapú
[Fakatātā ʻi he peesi 6]
Fakalahi ʻo e Fale Fakatahaʻanga ʻi Niueé, ʻo fakaʻatā ai ha nofoʻanga ki he kau tāimuʻa makehé