Ngaahi Polosiua Maʻá e Kakai ʻo e Ngaahi Lotu ʻIkai Kalisitiané
Lasting Peace and Happiness—How to Find Them
ʻI he faifakamoʻoni ki ha tokotaha ako Siaina, te ke leaʻaki nai ʻo pehē:
“Ko ha hohaʻa anga-maheni kuó u maʻu ʻi he lotolotonga ʻo e kau akó ko ʻenau fiemaʻu kotoa ʻa e melinó mo e fiefiá. ʻOkú ke ongoʻi ʻoku mahuʻinga eni? [Tuku ke ne tali.] ʻIkai nai ʻe fakaofo ke sio ki hono fakahoko ʻo e ngaahi lea motuʻa ko ení?” Lau ʻa e Sāme 37:11, pea fakaʻaliʻali ʻa e polosiuá.—km 2/98 p. 5.
“Vakai! ʻOku Ou Fakafoʻou ʻa e Meʻa Kotoa Pe”
Te ke leaʻaki nai ki ha tokotaha taʻumotuʻa lotu Puta ʻo pehē:
“Mahalo ʻokú ke hohaʻa ʻo hangē pē ko aú ʻo fekauʻaki mo e lahi fakaʻulia ʻa e ngaahi fakakaukau ololalo lolotongá mo e uesia ʻoku fai ʻe he ngaahi meʻá ni ki heʻetau fānaú. Ko e hā ʻoku ʻi ai ai ha tupulaki pehē ʻi he ʻulungāanga taʻetāú ʻi he lotolotonga ʻo e toʻutupú? [Tuku ke ne tali.] Naʻá ke ʻiloʻi naʻe tomuʻa tala eni ʻi ha tohi naʻe kamata ke hiki ki muʻa fuoloa pea fokotuʻu ʻa e ngaahi lotu faka-Mosilemí, Kalisitiané mo e Hinituú? [Lau ʻa e 2 Timote 3:1-3.] Fakatokangaʻi ko e ngaahi tuʻunga ko ení ʻoku hoko lahi ia neongo ʻa hono maʻu ʻo e ʻiló. [Lau ʻa e 2Ti vahe 3 veesi 7.] Naʻe tokoniʻi au ʻe he tohi ko ení ke u mahinoʻi ʻa e moʻoni ʻoku ʻikai ʻaupito ke ʻilo ʻe he tokolahi taha ʻo e kakaí. Te ke saiʻia ke lau ia?”—km 8/99 p. 8.
Our Problems—Who Will Help Us Solve Them?
Ki ha tokotaha kei siʻi lotu Hinitū, te ke leaʻaki nai ʻo pehē:
“ʻOku ʻikai ha veiveiua ʻokú ke tui ki he ʻOtuá. ʻOkú ke fakakaukau ko e hā ʻa e taumuʻa ʻa e ʻOtuá kia kitautolú? [Tuku ke ne tali. Pea lau leva ʻa e Senesi 1:28.] ʻI he ngaahi feituʻu lahi, ko e māmaní ʻoku fuʻu tokolahi ai hono nofoʻí pea ʻoku fakahohaʻasi ia ʻe he ngaahi palopalemá. ʻOkú ke fakakaukau ʻe finangalo ʻa e Tokotaha-Fakatupú ke ne tokoniʻi kitautolu ke solova ʻetau ngaahi palopalemá?” Tuku ke ne tali. Pea fakaʻaliʻali leva ʻa e polosiuá.—km 9/99 p. 8.
The Guidance of God—Our Way to Paradise
ʻI he lea ki ha tokotaha Mosilemi, te ke leaʻaki nai ʻo pehē:
“ʻOku ou fai ha feinga makehe ke talanoa ki he kau Mosilemí. ʻOku ou mahinoʻi ʻoku tui ʻa e kau Mosilemí ki he ʻOtua moʻoni pē ʻe tahá pea mo e kotoa ʻo e kau palōfitá. ʻOku tonu ia? [Tuku ke ne tali.] ʻOku ou saiʻia ke talanoa mo koe fekauʻaki mo ha kikite motuʻa ʻoku tomuʻa tala ai ʻa hono liliu ʻo e māmaní ki ha palataisí. ʻE sai pē ke u lau atu kia koe ʻa e meʻa naʻe tohi ʻe he palōfitá? [Tuku ke ne tali. Pea lau leva ʻa e Aisea 11:6-9.] ʻOku ʻai au ʻe he kikite ko ení ke u fakakaukau ki ha fakalea mei he Kōlaní ʻa ia ʻoku maʻu ʻi he polosiua ko ení.” Huke ki he peesi 9, pea lau ʻa e fakalea ʻoku taipeʻi mata lalahí. Kapau ʻoku fakahaaʻi ha mahuʻingaʻia, hokohoko atu ʻa e fetalanoaʻakí ʻaki ʻa e lāulea ki he palakalafi 7-9 ʻi he peesi fehangahangai mo iá.—km 11/99 p. 8.
Why Should We Worship God in Love and Truth?
Ko e tuʻuaki ko ení ʻe fakamānako nai ia ki ha tokotaha lotu Hinitū ʻa ia ʻoku ʻi ai hano fāmili:
“ʻOku ou ʻaʻahi ki he kakai ʻa ia ʻoku nau hohaʻa fekauʻaki mo e tuʻunga ʻo e moʻui fakafāmilí ʻi he ngaahi fonua lahi he ʻahó ni. ʻOkú ke fakakaukau ko e hā ʻa e meʻa ʻe tokoni ke fakafāʻūtahaʻi ai ʻa e fāmilí? [Tuku ke ne tali.] ʻOku ʻiloʻi ʻe he kakai ʻe niʻihi ʻa e meʻa ʻoku leaʻaki ʻe he ngaahi konga tohi faka-Hinituú ʻo fekauʻaki mo e fāmilí, ka kuo teʻeki ai ke nau maʻu ʻa e faingamālie ke fakafehoanaki ai eni mo e meʻa ʻoku leaʻaki ʻe he Tohi Tapú ʻo fekauʻaki mo e kaveingá. ʻOku ou saiʻia ke vahevahe atu kia koe ʻa e fakakaukau ko ení. [Lau ʻa e Kolose 3:12-14.] ʻOku sivisiviʻi ʻe he polosiua ko ení ʻa e ngaahi tohi toputapu ʻa ʻInitiá pea pehē foki ki he Tohi Tapú.” Fakaʻaliʻali ʻa e polosiuá, pea fakamamafaʻi ʻa e peesi 8-9 mo e 20-1.—km 9/99 p. 8.
Will There Ever Be a World Without War?
ʻI he faifakamoʻoni ki ha tokotaha lotu Siu, te ke leaʻaki nai ʻo pehē:
“Ko e tokolahi taha ʻo kitautolú kuo tau maʻu ʻa e hokosia fakamamahi ʻo e mole ha taha naʻa tau ʻofa ai ʻi he maté. ʻOkú ke fakakaukau ko e hā ʻoku hoko kia kitautolu ʻi heʻetau maté?” Tuku ke ne tali. Pea fakahaaʻi leva ʻa e puha “Ko e Maté mo e Soulú—Ko e Hā Kinaua?” ʻi he peesi 22 ʻo e polosiuá. Lau ʻa e palakalafi 17 ʻi he peesi 23 ʻo fekauʻaki mo e toetuʻú. Lave ʻo pehē naʻe tukulotoa ʻe he pēteliake ko Siopé ʻa e ʻamanaki ʻo e toetuʻú. Fakaʻaliʻali ʻa e polosiuá, pea fokotuʻutuʻu ke toe foki ke lāulea ki he ngaahi konga Tohi Tapu ʻoku hā ʻi he ngataʻanga ʻo e palakalafi 17.—km 10/99 p. 8.