‘Fakatonuhiaʻi ʻa e Potó ʻi Heʻene Ngaahi Ngāue ʻOku Faí’

1. ʻOku fēfē vakai mai ʻa e niʻihi ki heʻetau ngāué?

¹ ʻOku tau fetaulaki nai ʻi ha ngaahi taimi mo ha tali ʻikai lelei mei he faʻahinga ʻi he ngaahi ʻapí ʻa ia ʻoku ʻikai te nau mahinoʻi kitautolu pe kuo fai ha fakamatala hala kia kinautolu fekauʻaki mo e Kau Fakamoʻoni ʻa Sihová. Mahalo pē kuo tākiekina ʻenau fakakaukaú ʻe he ngaahi līpooti tomuʻa fehiʻa ʻa e mītiá. ʻI he feituʻu ʻe niʻihi kuo aʻu ʻo fakaʻilongaʻi ai kitautolu “ko ha lotu mavahe fakatuʻutāmaki.” ʻOku totonu ke fēfē ʻetau fakafeangai ki he fakaanga peheé?

2. Ko e hā te ne tokoniʻi kitautolu ke tau hao mei he loto-siʻí ʻi he fehangahangai mo e fakaangá?

² Tauhi Maʻu ha Fakakaukau Pau: Ko Sīsū mo e kau sevāniti kehe ʻa Sihova ʻi he ʻuluaki senitulí naʻe faʻa ʻikai ke mahinoʻi kinautolu pea lauʻikoviʻi. (Ng. 28:22) Neongo ia, naʻe ʻikai te nau fakaʻatā ʻa e fakaangá ke ʻai ai ke nau ongoʻi mā ʻi heʻenau ngāue fakafaifekaú. Naʻe pehē ʻe Sīsū: ‘Kuo pau ai pē ke fakatonuhiaʻi ʻa e potó ʻi heʻene ngaahi ngāue ʻoku faí.’ (Mt. 11:18, 19, Ko e Taulua) Naʻá ne hokohoko atu hono fai ʻa e finangalo ʻo ʻene Tamaí ʻi he faivelenga, ʻo tuipau ko e mahuʻinga ʻo e ongoongo leleí ʻe hā mahino ia ki he kau kumi ki he moʻoní. ʻE lava ke tau hao mei he loto-siʻí ʻi he manatuʻi ko e ʻAlo tonu ʻo e ʻOtuá naʻá ne hokosia ʻa e ngaohikovia meimei tatau.

3. Ko e hā ʻoku ʻikai totonu ai ke fakaʻohovaleʻi kitautolu ʻe he ngaahi fakamatala ʻikai leleí mo e fakafepakí?

³ Naʻe fakahaaʻi ʻe Sīsū ʻe fehiʻa ʻa e māmaní ki hono kau muimuí ʻo hangē tofu pē ko ʻene fehiʻa ʻiate iá. (Sione 15:18-20) Ko ia ai, ko e ngaahi fakamatala ʻikai lelei mo e fakafepaki he ʻaho ní ʻoku ʻikai totonu ke ne fakaʻohovaleʻi kitautolu. Ko hono moʻoní, ʻoku totonu ke tau ʻamanekina ʻe hoko ʻo failahia ange ʻa e ngaahi meʻa peheé ʻi heʻetau ʻunu ke ofi ange ki he ngata ʻa e ngaahi ʻaho fakaʻosí pea mo e fakalalahi ange ʻa e ʻita ʻa Sētané. (Fkh. 12:12) ʻE lava ke tau fiefia ʻi he hā mahino ko eni ʻoku toe siʻi ʻa e māmani ʻo Sētané.

4. Kapau te tau fetaulaki mo ha fakafeangai ʻikai lelei ki he ongoongo leleí, ʻoku totonu ke fēfē ʻetau talí?

⁴ Tali ʻi he Anga-ʻOfa: ʻI heʻetau maʻu ha fakafeangai ʻikai leleí, ʻoku totonu ke tau tali maʻu pē ʻaki ʻa e anga-ʻofa mo e anga-malū. (Pal. 15:1; Kol. 4:5, 6) Kapau ʻe ʻatā ʻa e tuʻungá, te tau malava nai ke fakamatala ki ha tokotaha-ʻapi loto-moʻoni ʻoku lahi ʻa e fakamatala hala fekauʻaki mo e Kau Fakamoʻoni ʻa Sihová pe ʻeke ange kiate ia ʻa e ʻuhinga ʻokú ne ongoʻi pehē aí. Ko ʻetau fakafeangai anga-maluú ʻe fakatupunga nai ai ke ne ʻeke ʻa e meʻa kuó ne fanongo ai fekauʻaki mo e Kau Fakamoʻoni ʻa Sihová pea fanongo ʻi he taimi hono hoko ʻe ʻaʻahi atu ai ha Fakamoʻoní. Kae kehe, kapau ʻoku ʻita lahi ha tokotaha-ʻapi, ʻe lelei tahá ke tau kole fakamolemole pea mavahe. ʻOku lava ke tau fakapapauʻi tatau ai pē pe ko e hā ʻa e vakai mai kia kitautolu ʻa e niʻihi kehé, ʻoku fakamahuʻingaʻi ʻe Sihova ʻa ʻetau ngāue fakafaifekaú.—Ai. 52:7.