“Nofo Melino mo e Tangata Kotoa Pē”
1. Ko e hā ʻa e akonaki Fakatohitapu ʻoku totonu ke tau ngāueʻakí ʻi heʻetau fetaulaki mo e tokotaha-ʻapi ʻoku ʻitá?
1 Ko e kakai ʻa Sihová ʻoku nau ʻofa ki he melinó pea ko ʻetau ngāue fakafaifekaú ko ha tafaʻaki ia ʻo e fakamelinó. (ʻAi. 52:7) Neongo ia ʻi ha ngaahi taimi, ʻoku tau fetaulaki mo e kakai ʻoku nau ʻita koeʻuhi ko ʻetau ʻaʻahi atu ki honau matapaá. Ko e hā te ne tokoniʻi kitautolu ke hoko ʻo fakamelino ʻi he ngaahi tuʻunga peheé?—Loma 12:18.
2. Ko e hā ʻoku mahuʻinga ai kiate kitautolu ke hoko ʻo ʻiloʻiló?
2 Hoko ʻo ʻIloʻilo: Neongo ko e niʻihi ʻoku nau fakafeangai ʻita koeʻuhi ʻoku nau fakafepaki ki he moʻoní, ko e niʻihi ko e ʻuhinga ʻenau ʻitá ʻoku ʻikai fekauʻaki ia mo ʻetau pōpoakí. Mahalo ʻoku tau ʻaʻahi atu ʻi he taimi ʻoku ʻikai feʻungamālie. Ko e tokotaha-ʻapí ʻokú ne ʻita nai ia ʻi ha ngaahi palopalema fakafoʻituitui. Neongo kapau ko e ongoongo leleí ʻoku ʻai ia ke ne ʻitá, ʻoku totonu ke tau manatuʻi ko ʻene talí ʻoku hangehangē koeʻuhí kuo takihalaʻi ia. (2 Kol. 4:4) Ko e hoko ʻo ʻiloʻiló te ne tokoniʻi kitautolu ke tau mokomoko ai pē pea ʻiloʻi ʻoku ʻikai ʻita mai ia kia kita.—Pal. 19:11.
3. ʻE anga-fēfē nai haʻatau fakahāhā ʻa e fakaʻapaʻapá ki he tokotaha-ʻapí?
3 Fakahāhā ʻa e Fakaʻapaʻapa: Ko e tokolahi ʻi he feituʻu malangá ʻoku nau pikimaʻu ki heʻenau tuí. (2 Kol. 10:4) ʻOku nau maʻu ʻa e totonu ke fili pē pe te nau fanongo pe ʻikai. ʻOua ʻaupito te tau fakasiʻisiʻia ʻa e tui ʻa e tokotaha-ʻapí pe ʻoatu ʻa e fakakaukau ʻoku tau māʻolunga ange. Kapau te ne pehē mai ke tau mavahe, ʻoku totonu ke tau tali anga-fakaʻapaʻapa.
4. Ko e hā ʻa e ʻuhinga ke lea anga-ʻofa aí?
4 Lea Anga-ʻOfa: Neongo kapau ʻoku nau lea kovi mai, ko ʻetau talí ʻoku totonu ke anga-malū mo anga-ʻofa. (Kol. 4:6, 1 Pita 2:23) ʻI he ʻikai ke hoko ʻo fakakikihí, feinga ke ʻi ai ha meʻa ke mo loto-tatau ai. Mahalo ʻe lava ke ʻeke fakapotopoto ange fekauʻaki mo e ngaahi ʻuhinga ʻo e fakafepaki ʻa e tokotaha-ʻapí. Neongo ia, ke hoko ʻo fakaʻehiʻehi mei hano fakatupuʻitaʻi lahi angé, ʻi he ngaahi taimi, ʻoku lelei tahá ke ʻoua ʻe feinga ke hokohoko atu ʻa e fetalanoaʻakí.—Pal. 9:7; 17:14.
5. Ko e hā ʻa e ngaahi ʻaonga ʻoku maʻu mei he fakamelino ʻi he ngāue fakafaifekaú?
5 Kapau ʻoku tau fakamelino, mahalo ʻe manatuʻi ʻe he tokotaha-ʻapí ʻetau tōʻongá pea fanongo ʻi he taimi hono hoko ʻe feinga ai ha taha ke faifakamoʻoni kiate iá. (Loma 12:20, 21) Neongo kapau ʻoku hā papau ʻene talitekeʻí, mahalo ʻi ha ʻaho te ne hoko ko hotau tokoua. (Kal. 1:13,14) Tatau ai pē pe te ne hoko ʻo mahuʻingaʻia ʻi he moʻoní, te tau fakalāngilangiʻi ai ʻa Sihova pea ʻai ke fakaʻofoʻofa ʻetau akonakí kapau te tau tauhi maʻu ʻetau mapuleʻi-kitá pea fakahāhā ʻa e fakamelinó.—2 Kol. 6:3.