Malanga ki he “Faʻahinga Kakai Kotoa Pē”
1. ʻOku anga-fēfē hangē ʻa e kau ʻevangeliō ola leleí ko e kau ngāue fakameaʻa pōtoʻí?
1 ʻOku maʻu ʻe ha tokotaha ngāue fakameaʻa pōtoʻí ʻa e ngaahi meʻa ngāue lahi, pea ʻokú ne ʻiloʻi ʻa e taimi mo e founga ke ngāueʻaki taki taha ai kinautolu. ʻI he tuʻunga meimei tatau, ʻoku tau maʻu ʻa e ngaahi meʻangāue kehekehe ke tokoniʻi kitautolu ke fakahoko ʻetau ngāue ko e kau ʻevangeliō. Ko e fakatātā, kuo faʻu e ngaahi polosiua ʻi he ngaahi kaveinga kehekehe ke tokoniʻi kitautolu ke malanga ki he “ngaahi faʻahinga kakai kotoa pē.” (1 Kol. 9:22) Ko e fakalahi ʻo e Ko ʻEtau Ngāue Fakafaifekau ko ení ʻoku lisi ai e niʻihi ʻo e ngaahi polosiua ko ení, fakamatalaʻi ai ko hai naʻe fakataumuʻa ki aí, mo fokotuʻu mai ai ʻa e founga ʻe lava ke tuʻuaki ai ʻa e ngaahi polosiuá.
2. Ko fē nai e taimi te tau ngāueʻaki ai e ngaahi polosiuá he ngāue fakafaifekaú?
2 Taimi ke Ngāueʻaki Ai e Ngaahi Polosiuá: ʻE ngāueʻaki ʻe ha tokotaha ngāue fakameaʻa ha meʻangāue ʻi ha taimi pē ʻoku ʻaonga ai. ʻI he tuʻunga meimei tatau, ʻoku lava ke tau tuʻuaki ha polosiua ʻi he taimi pē ʻoku tau ongoʻi ʻe maʻu ʻaonga ai ha taha, ʻo ʻikai ʻi he lolotonga pē ʻo e ngaahi māhina ʻoku tuʻuaki ai e polosiuá. Ko e fakatātā, kapau ko e tohi ʻoku tuʻuakí ko e tohi Akoʻi ʻe he Tohi Tapú pea ʻoku tau malanga ʻi ha fonua ʻikai Kalisitiane ʻa ia ʻoku ʻikai loko mahuʻingaʻia e kakaí ʻi he Tohi Tapú, ʻe lelei nai ke tuʻuaki ha polosiua feʻungamālie pea toki fakafeʻiloaki atu leva ʻa e tohi Akoʻi ʻe he Tohi Tapú hili ʻetau ʻosi fakatupulekina e mahuʻingaʻia ʻa e tokotahá.
3. Ko e hā ʻoku totonu ai ke tau hoko ʻo pōtoʻi ʻi hono ngāueʻaki ʻetau ngaahi meʻangāue faifakamoʻoní?
3 ʻOku fakaongoongoleleiʻi ʻe he Tohi Tapú ʻa e faʻahinga ko ia ʻoku nau pōtoʻi ʻi heʻenau ngāué. (Pal. 22:29) Ko e moʻoni, ʻoku ʻikai ha ngāue ʻe mahuʻinga ange he ʻahó ni ʻi he ‘ngāue toputapu ʻo e ongoongo leleí.’ (Loma 15:16) Koeʻuhi ke hoko “ko ha tangata ngāue ʻoku ʻikai ha meʻa ke mā ai,” te tau feinga ke hoko ʻo pōtoʻi ʻi hono ngāueʻaki ʻetau ngaahi meʻangāué.—2 Tīm. 2:15.