“Tuʻuaki ha Makasini Motuʻa Ange pe ko ha Polosiua Pē ʻOkú Ne Feau ʻa e Mahuʻingaʻia ʻa e Tokotahá”

Lolotonga ʻa e ngaahi māhina te tau tuʻuaki ai ʻa e tohi Akoʻi ʻe he Tohi Tapú pea mo ha ako ʻi he ʻuluaki ʻaʻahí, ʻoku fakalototoʻaʻi kitautolu ke “tuʻuaki ha makasini motuʻa ange pe ko ha polosiua pē ʻokú ne feau ʻa e mahuʻingaʻia ʻa e tokotahá” ʻi ha taimi pē kuo ʻosi maʻu ʻe he tokotaha-ʻapí ʻa e tohí kae ʻikai tali ʻa e tuʻuaki ʻo ha akó. Ko e hā hono ʻuhingá?

Ko e ngaahi polosiuá mo e ngaahi makasini motuʻa angé ʻoku nau lāulea ki ha ngaahi kaveinga kehekehe taimi tonu. ʻOku ʻi ai e meʻa ʻi he ngaahi tohi ko iá ʻe maongo nai ki he loto ʻo e tokotaha-ʻapí. Ko ia ai, ʻi hoʻo faʻo hoʻo kato faifakamoʻoní, fakakau ai ha polosiua kehekehe ʻe niʻihi mo ha ngaahi ʻīsiu motuʻa ange. Kapau ʻoku ʻikai te ke maʻu ha ngaahi makasini motuʻa ange, mahalo ʻe lava ke ke maʻu ha niʻihi mei he kānita makasiní. Kapau leva kuo ʻosi maʻu ʻe he tokotaha-ʻapí ia ʻa e tohi Akoʻi ʻe he Tohi Tapú pea ʻoku ʻikai loto ia ki ha ako Tohi Tapu, ʻe lava ke ke fakaʻaliʻali ki ai ha niʻihi ʻo e makasini pe ngaahi polosiua ʻokú ke maʻú pea fakaafeʻi ia ke ne toʻo ʻa e meʻa ʻokú ne mahuʻingaʻia aí. Hili iá, fai ha ngaahi fokotuʻutuʻu ke foki ʻo fakatupulekina ʻa e mahuʻingaʻiá. Mahalo ʻe iku atu ia ki ha ako Tohi Tapu.