Fiefia ʻi he Moʻuí ʻo Taʻengata! Ngāueʻaki Ia ke Fakaivimālohiʻi ʻa e Tui kia Sihova mo Sīsū

Ke fakahōifua ki he ʻOtuá, kuo pau ki he kau ako Tohi Tapú ke nau fakatupulekina ʻa e tui mālohi. (Hep. 11:6) ʻE lava ke tau tokoniʻi kinautolu ʻaki hono ngāueʻaki ʻa e tohi Fiefia ʻi he Moʻuí ʻo Taʻengata! ʻOku ʻi he tohi ako ko ení ʻa e ngaahi konga Tohi Tapu mahuʻinga, fakaʻuhinga māʻalaʻala, ngaahi fehuʻi ola lelei, ngaahi vitiō fakaueʻiloto mo e ngaahi fakatātā fakaʻofoʻofa. ʻI hono tokoniʻi ʻa e kau akó ke fakatupulekina ʻa e ngaahi ʻulungaanga faka-Kalisitiané pea maʻu ha vahaʻangatae mo e ʻOtuá, ʻoku tau langa ʻaki ai ʻa e ngaahi naunau velangataʻa.​—1 Kol. 3:12-15.

ʻOku faingataʻa ki he kakai ʻe niʻihi ke fakakaukau atu, ʻe lava ke nau kaumeʻa mo e ʻOtuá ʻa ia ʻoku ʻikai lava ke nau sio ki ai. Ko ia ʻoku fiemaʻu ke tau tokoniʻi kinautolu ke nau ʻiloʻi ʻa Sihova pea falala kiate ia.

SIO ʻI HE VITIŌ FAKAIVIMĀLOHIʻI ʻA E TUI KIA SIHOVÁ ʻO NGĀUEʻAKI ʻA E “FIEFIA ʻI HE MOʻUÍ ʻO TAʻENGATA!” PEA TALI LEVA ʻA E NGAAHI FEHUʻI KO ENÍ:

• ʻOku anga-fēfē ʻetau ʻiloʻi naʻe teuteu lelei ʻa e tuofefiné ki he akó?

• Naʻe anga-fēfē ʻene filifili lelei ʻa e ngaahi fehuʻí ke tokoniʻi ʻa e tokotaha akó, ke fakahaaʻi ʻene fakakaukaú mo ʻene ngaahi ongoʻi fekauʻaki mo e ʻAisea 41:10, 13?

• Naʻe anga-fēfē maongo ʻa e foʻi vitioó mo e veesi Tohi Tapú ki he tokotaha akó?

Ko e kakai tokolahi ʻoku ʻikai ke nau mahinoʻi ʻa e huhuʻí, pe ʻoku ʻikai ke nau vakai ki ai ko ha meʻaʻofa fakafoʻituitui ia mei he ʻOtuá kiate kinautolu. (Kal. 2:20) Ko ia ai, kuo pau ke tau tokoniʻi kinautolu ke langa hake ʻenau tui ki he feilaulau huhuʻi ʻa Sīsuú.

SIO ʻI HE VITIŌ FAKAIVIMĀLOHIʻI ʻA E TUI KIA SĪSUÚ ʻO NGĀUEʻAKI ʻA E “FIEFIA ʻI HE MOʻUÍ ʻO TAʻENGATA!” PEA TALI LEVA ʻA E NGAAHI FEHUʻI KO ENÍ:

• ʻOku anga-fēfē ʻetau ʻiloʻi naʻe teuteu lelei ʻa e tokouá ki he akó?

• Naʻe anga-fēfē ʻene feʻunuʻaki ʻa e fakamatala ʻi he konga “Ako Lahi Angé” ke tokoniʻi ʻa e tokotaha akó?

• Ko e hā ʻoku mahuʻinga ai ke lotu maʻá e tokotaha akó?