Ko Fē Taimi Naʻe Kamata Fakatupu Ai ʻe he ʻOtuá ʻa e ʻUnivēsí?

Tali ʻa e Tohi Tapú

ʻOku ʻikai ke fakahaaʻi ʻe he Tohi Tapú ʻa e taimi pe ko e hā hono fuoloa naʻe kamata fakatupu ai ʻe he ʻOtuá ʻa e ʻunivēsí. ʻOku pehē pē ai: “ʻI he kamataʻangá naʻe fakatupu ʻe he ʻOtuá ʻa e langí mo e māmaní.” (Sēnesi 1:1) ʻOku ʻikai ke fakahaaʻi pau mai ʻe he Tohi Tapú ʻa e taimi ko ia naʻe hoko ai ʻa e “kamataʻangá.” Ka ko e fakahokohoko ʻo e ngaahi meʻa ʻi he tohi Sēnesí ʻoku fakahaaʻi ai naʻe hoko eni ki muʻa ʻi he vahaʻa taimi pe “ngaahi ʻaho” fakaefakatupu ʻe onó.

Ko ha ʻaho houa ʻe 24 ʻa e ʻaho fakatupu ʻe onó?

ʻIkai. ʻI he Tohi Tapú, ko e foʻi lea “ʻaho” ʻe lava ke ʻuhinga ia ki ha vahaʻa taimi kehekehe, ʻo fakatuʻunga ʻi he potutohí. Hangē nai ko ení, ʻoku fakamatalaʻi ʻi ha konga ʻe taha ʻo e fakamatalá ko e vahaʻa taimi fakakātoa ʻo e fakatupú naʻe fakahoko ia ʻi ha ʻaho ʻe taha, ʻoku fakahaaʻi ai ko e ʻahó ʻe lava ke ne fakafofongaʻi ha vahaʻa taimi lōloa.—Sēnesi 2:4.

Ko e hā ʻa e meʻa naʻe hoko ʻi he ngaahi ʻaho ʻe ono ʻo e fakatupú?

Naʻe liliu ʻe he ʻOtuá ʻa e māmani ‘maomaonganoa mo lalá’ ki ha palanite ʻe lava ke nofoʻi. (Sēnesi 1:2) Naʻá ne fakatupu leva ʻa e ngaahi meʻamoʻui ʻi he māmaní. ʻOku fakamatalaʻi ʻe he Tohi Tapú ʻa e fakahokohoko ʻe ono ʻo e ngaahi meʻa naʻe hoko lolotonga ʻa e ngaahi ʻaho pe vahaʻa taimi lōloa ʻo e fakatupú:

ʻAho 1: Naʻe ʻai ʻe he ʻOtuá ʻa e māmá ke aʻu hifo ki he funga ʻo e māmaní, ʻo malava ke hoko ai ʻa e ʻahó mo e poó.—Sēnesi 1:3-5.
ʻAho 2: Naʻe fakamavaheʻi ʻe he ʻOtuá ʻa e ngaahi vai ʻi lalo ʻi he ʻataá mei he ngaahi vai ʻi ʻolunga ʻi he ʻataá.—Sēnesi 1:6-8.
ʻAho 3: Naʻe ʻai ʻe he ʻOtuá ke hā mai ʻa e fonua mōmoá. Naʻá ne fakatupu foki ʻa e mohukú.—Sēnesi 1:9-13.
ʻAho 4: Naʻe ngaohi ʻe he ʻOtuá ʻa e laʻaá, māhiná mo e ngaahi fetuʻú ke hoko ko e ngaahi maamaʻanga ki he māmaní.—Sēnesi 1:14-19
ʻAho 5: Naʻe fakatupu ʻe he ʻOtuá ʻa e ngaahi meʻamoʻui ʻi he vaí mo e ngaahi meʻamoʻui ʻoku puna.—Sēnesi 1:20-23
ʻAho 6: Naʻe fakatupu ʻe he ʻOtuá ʻa e fanga manu totoló mo e tangatá.—Sēnesi 1:24-31.

ʻI he ʻosi ʻa e ʻaho hono onó, naʻe mālōlō ʻa e ʻOtuá mei heʻene ngāue fakaefakatupú.—Sēnesi 2:1, 2.

ʻOku tonu fakasaienisi ʻa e fakamatala ʻi he tohi Sēnesí?

Ko e fakamatala ʻa e Tohi Tapú ki he fakatupu ʻo e māmaní ʻoku ʻikai ke ne taukaveʻi ko ha aofangatuku fakaikiiki fakasaienisi ia. ʻI hono kehé, naʻe fakamatalaʻi ʻa e fakatupú ʻi ha founga ke faingofua ki he kau lautohí ke nau mahinoʻi ʻa e fakahokohoko ʻo e ngaahi meʻa naʻe fakatupu ʻe he ʻOtuá. Ko e fakamatala ki he fakatupú ʻoku ʻikai ke fepaki ia mo e ngaahi fakamoʻoni fakasaienisí. Naʻe tohi ʻe he tokotaha ako fakaʻasitalōnoma mo fakafīsiki ko Robert Jastrow: “Neongo ʻoku kehekehe ʻa e ngaahi fakaikiikí, ka ko e ʻasitalōnomá mo e fakamatala fakatohitapu ʻi he tohi Sēnesí ʻokú na faitatau ʻi he fakamatala ki he anga ʻo e kamata ʻo e moʻuí; ko e kamataʻanga ʻo e tangatá naʻe hoko ʻi ha taimi pau mo vave.”

Naʻe fakatupu ʻanefē ʻa e laʻaá, māhiná mo e ngaahi fetuʻú?

Ko e laʻaá, māhiná mo e ngaahi fetuʻú naʻe ʻosi ʻi ai pē ia he ko e konga “ia ʻo e langi” naʻe fakatupu he kamataʻangá. (Sēnesi 1:1) Kae kehe, ko e māmá naʻe ʻikai malava ke aʻu ia ki he funga ʻo e māmaní, koeʻuhi ko e matolu ʻo e kakapú. (Sēnesi 1:2) Neongo naʻe ʻuluaki hā mai pē ʻa e māmá ʻi he ʻuluaki ʻahó, ka naʻe teʻeki ai ke ʻiloʻi pe ʻoku haʻu mei fē ʻa e matavai ʻo e māmá. ʻI he ʻaho hono faá, ʻoku ngalingali naʻe maʻa ange ai ʻa e ʻatimosifiá. ʻOku pehē ʻe he Tohi Tapú ko e laʻaá, māhiná mo e ngaahi fetuʻú naʻe kamata ke “ulo mai ki he funga ʻo māmaní,” ngalingali ko e anga ia ‘o e vakai ‘a ha tokotaha mamata mei he māmaní.—Sēnesi 1:17.

Ko e hā ʻa e fuoloa ʻo e ʻi ai ʻa e foʻi māmaní ʻo fakatatau ki he Tohi Tapú?

ʻOku ʻikai lave ʻa e Tohi Tapú ki he fuoloa ʻo e ʻi ai ʻa e foʻi māmaní. ʻOku pehē ʻe he Sēnesi 1:1 ko e ʻunivēsí ʻo kau ai hotau foʻi māmaní, naʻe ʻi ai hono kamataʻanga. Ko e fakamatala ko ení ʻoku ʻikai ke fepaki ia mo e ngaahi moʻoni fakasaienisí pe fakafuofua ʻa e kau faisaienisí fekauʻaki mo e fuoloa ʻo e ʻi ai ʻa e foʻi māmaní.