Fana ʻi he ʻApiakó—Ko e Hā ʻa e Lau ʻa e Tohi Tapú?

ʻI Mē 24, 2022, naʻe hoko ha fakatamaki fakalilifu ʻi he kiʻi kolo ko Uvalde, Texas, ʻAmelika. Fakatatau ki he The New York Times, “ko ha tangata ʻosi fakamahafu naʻá ne tāmateʻi ha fānau ʻe toko 19 mo ha faiako ʻe toko ua . . . ʻi he ʻApiako Lautohi Robb.”

Ko e meʻa fakamamahí, ko e ngaahi meʻa fakalilifu ko ení ʻoku anga-maheni pē ʻene hokó. Naʻe līpooti ʻi he USA Today ʻi ʻAmelika ʻataʻatā pē, “naʻe ʻi ai ʻa e fana ʻe 249 ʻi he ʻapiakó ʻi he taʻu kuo ʻosí​—ʻo lahi ange ia ʻi ha toe taʻu talu mei he 1970.”

Ko e hā ʻoku hoko ai ʻa e ngaahi meʻa anga-fakamamahi ko ení? ʻE lava fēfē ke tau fekuki mo e ngaahi tōʻonga fulikivanu ko iá? ʻOku ʻi ai koā ha ʻamanaki ʻe ngata ʻa e fakamālohí? ʻOku ʻomai ʻe he Tohi Tapú ʻa e talí.

Ko e hā kuo hoko ai ʻa e māmaní ʻo fakamālohi angé?

•  ʻOku fakamatalaʻi ʻe he Tohi Tapú ʻa hotau taimí ko e “ngaahi ʻaho fakaʻosí” ʻa ia ko e kakai tokolahi heʻikai ke nau “maʻu ʻa e ʻofa fakanatulá” pea hoko ʻo “anga-kakaha,” ʻo kau ai ʻa e ngaahi tōʻonga anga-fakamanu. Ko e faʻahinga ʻoku nau fakahāhā ʻa e ngaahi ʻulungaanga ko iá “te nau ʻalu mei he kovi ki he kovi ange.” (2 Tīmote 3:1-5, 13) Ke ako lahi ange, lau ʻa e kupu “Naʻe Tomuʻa Tala ʻe he Tohi Tapú ʻa e Anga ʻo e Fakakaukau mo e Tōʻonga ʻa e Kakaí he ʻAho Ní?”

ʻOku fifili ʻa e kakai tokolahi, ‘Ko e hā ʻoku ʻikai taʻofi ai ʻe he ʻOtuá ʻa e hoko ʻa e ngaahi fakatamaki fakalilifú hangē ko e fana ʻi he ʻapiakó?’ Ke vakai ki he tali ʻa e Tohi Tapú, lau ʻa e kupu “ʻOku Hoko ʻa e Ngaahi Meʻa ʻOku Koví ki he Kakai Leleí​—Ko e Hā Hono ʻUhingá?”

ʻE lava fēfē ke tau fekuki mo e ngaahi tōʻonga fulikivanu ko iá?

•  “Ko e ngaahi meʻa kotoa pē naʻe tohi ʻi muʻá naʻe tohi ko hotau fakahinohino, koeʻuhí ke tau lava . . . fakafou ʻi he fakafiemālie mei he Folofolá ke tau maʻu ai ha ʻamanaki.”​—Loma 15:4.

Ko e ngaahi tefitoʻi moʻoni Fakatohitapú ʻe lava ke ne tokoniʻi koe ke fekuki mo e māmani fakamālohi ko ení. Sio ki he makasini Awake! ʻoku fakakaveinga “ʻE Toe Ngata Koā ʻa e Fakamālohí?” ki ha fakamatala lahi ange.

Ki ha fokotuʻu ki he founga ʻe lava ke tokoniʻi ai ʻe he ngaahi mātuʻá ʻenau fānaú ke fekuki mo e ngaahi ongoongo fakailifiá, lau ʻa e kupu “Ngaahi Ongoongo Fakamamahí mo Hoʻo Fānaú.”

ʻE toe ngata koā ʻa e fakamālohí?

•  “Te ne fakahaofi kinautolu mei he fakafeʻātungiá pea mei he fakamālohí.”​—Saame 72:14.

•  “Te nau tuki ʻenau ngaahi heletaá ke hoko ko e ngaahi mataʻi-palau pea mo ʻenau ngaahi taó ke hoko ko e ngaahi hele ʻauhani. ʻE ʻikai hiki ʻe ha puleʻanga ha heletā ki ha puleʻanga, pea ʻe ʻikai te nau toe ako tau.”​—Maika 4:3.

Ko e ʻOtuá te ne fai ʻa e meʻa ʻoku ʻikai malava ke fai ʻe he faʻahinga ʻo e tangatá. Ko hono Puleʻanga fakahēvaní te ne toʻo ʻosi atu ʻa e kotoa ʻo e ngaahi meʻataú pea fakangata ʻa e fakamālohí kotoa. Ke ako lahi ange fekauʻaki mo e meʻa ʻe fakahoko ʻe he Puleʻanga ʻo e ʻOtuá, lau ʻa e kupu “ʻI he Malumalu ʻo e Puleʻanga ʻo e ʻOtuá ko e ‘Melinó ʻE Hulu Fau.’”