FAKAMATALAʻI ʻO E NGAAHI KONGA TOHI TAPÚ
Sione 3:16—“He Nae Ofa Behe ae Otua ki Mamani”
“He naʻe ʻofa lahi ʻaupito ʻa e ʻOtuá ki he māmaní ʻo ne foaki ai hono ʻAlo tofu-pē-taha-ne-fakatupú, koeʻuhi ko e tokotaha kotoa pē ʻokú ne ngāueʻi ʻa e tui kiate iá ke ʻoua naʻa ʻauha ka ne maʻu ʻa e moʻui taʻengatá.”—Sione 3:16, Liliu Tohi Tapu Māmani Foʻoú.
“He nae ofa behe ae Otua ki mamani, naa ne foaki hono Alo be taha nae fakatubu, koeuhi ko ia kotoabe e tui kiate ia ke oua naa auha, kae maʻu ae moui taegata.”—Sione 3:16, Paaki Motuʻa.
ʻUhinga ʻo e Sione 3:16
ʻOku ʻofa ʻa e ʻOtuá ʻiate kitautolu pea ʻokú ne loto ke tau moʻui ʻo taʻengata. ʻI he ʻuhinga ko ení, naʻá ne fekauʻi mai hono ʻAló ʻa Sīsū Kalaisi ki he māmaní. Lolotonga ʻa e ʻi māmani ʻa Sīsuú, naʻá ne lavaʻi ʻa e ngāue lahi. Ko e meʻa ʻe taha, naʻá ne akoʻi hono kau muimuí ʻo fekauʻaki mo hono ʻOtuá ko ʻene Tamaí. (1 Pita 1:3) Ko e meʻa ʻe taha, naʻá ne foaki ʻene moʻuí maʻá e faʻahinga ʻo e tangatá. Ke maʻu ʻa e moʻui taʻengatá, kuo pau ke tau tui kia Sīsū.
Ko e lahi ʻo e ʻofa ʻa e ʻOtuá ʻoku fakahaaʻi ia ʻi he ngaahi leá ni, naʻá ne foaki hono ʻAlo tofu-pē-taha-ne-fakatupú.a Ko Sīsū ko ha ʻAlo laulōtaha ia ʻo e ʻOtuá. Anga-fēfē? Ko Sīsū toko taha pē naʻe fakatupu fakahangatonu ʻe he ʻOtuá. (Kolose 1:17) Ko ia ko e “ʻuluaki fakatupu ia ʻi he meʻa fakatupu kotoa pē.” (Kolose 1:15) Naʻe hoko mai ʻa e ngaahi meʻa fakatupu kotoa pē, kau ai ʻa e kau ʻāngelo kehé, ʻo fakafou mai ʻia Sīsū Kalaisi. Neongo ia, naʻe loto-lelei ʻa Sihovab ko e ʻOtuá ke fekau mai hono ʻAlo ʻofaʻangá “ke ngāue fakasevāniti pea ke foaki ʻene moʻuí ko ha huhuʻi ko e fetongi ʻo e tokolahi.” (Mātiu 20:28) Naʻe faingataʻaʻia pea pekia ʻa Sīsū ke fakatauʻatāinaʻi kitautolu mei he angahalá mo e maté, ʻa ia naʻa tau maʻu tukufakaholo mei he ʻuluaki tangatá ʻa ʻĀtama.—Loma 5:8, 12.
Ko e ngāueʻi ʻa e tui kia Sīsuú ʻoku ʻi ai ʻa e meʻa lahi ange ʻoku kau ki ai ʻi he tui pē kiate iá pea mo e meʻa naʻá ne fakahoko maʻa kitautolu. Kuo pau ke tau fakamoʻoniʻi ʻetau tui ki he ʻAlo ʻo e ʻOtuá ʻaki ʻa e talangofua pea faʻifaʻitaki kiate ia. (Mātiu 7:24-27; 1 Pita 2:21) ʻOku pehē ʻe he Tohi Tapú: “Ko e tokotaha ʻokú ne ngāueʻi ʻa e tui ki he ʻAló ʻokú ne maʻu ʻa e moʻui taʻengatá; ko e tokotaha ʻokú ne talangataʻa ki he ʻAló heʻikai te ne maʻu ʻa e moʻuí.”—Sione 3:36.
Puipuituʻa ʻo e Sione 3:16
Naʻe leaʻaki ʻe Sīsū ʻa e ngaahi lea ko iá ʻi heʻene lea ki ha taki lotu Siu ko Nikotīmasi. (Sione 3:1, 2) ʻI he fetalanoaʻaki ko iá, naʻe fakahaaʻi ai ʻe Sīsū ʻa e ngaahi fakaikiiki fekauʻaki mo e Puleʻanga ʻo e ʻOtuác pea hoko ʻo “fanauʻi foʻou.” (Sione 3:3) Naʻá ne toe tomuʻa tala ʻa e founga te ne mate aí. “ʻE pehē pē ʻa e pau ke hiki hake [tautau he ʻakaú] ʻa e Foha ʻo e tangatá, koeʻuhi ko e tokotaha kotoa pē ʻoku tui kiate iá ke ne maʻu ʻa e moʻui taʻengatá.” (Sione 3:14, 15) Naʻá ne fakamamafaʻi leva ko e faingamālie ko eni ke maʻu ʻa e moʻuí naʻe ueʻi ia ʻe he ʻofa lahi ʻa e ʻOtuá ki he faʻahinga ʻo e tangatá. Naʻe fakaʻosiʻaki ʻe Sīsū ʻene fakamatala ki he founga ke maʻu ai ʻa e moʻuí, ʻoku fiemaʻu ke tau maʻu ʻa e tui pea fai ʻa e ngaahi ngāue ʻoku fakahōifua ki he ʻOtuá.—Sione 3:17-21.
a Ko e foʻi lea faka-Kalisi naʻe liliu ko e “tofu-pē-taha-ne-fakatupú” ko e monogenes, ʻa ia ʻoku fakamatalaʻi “ko ia tokotaha pē, . . . ko ia tokotaha pē ʻi hono faʻahingá, laulōtaha (ʻi hono faʻahingá).”—A Greek-English Lexicon of the New Testament and Other Early Christian Literature, p. 658.
b Ko Sihova ʻa e huafa fakafoʻituitui ʻo e ʻOtuá.—Saame 83:18.
c Ko e Puleʻanga ʻo e ʻOtuá naʻe toe ui ko e “Puleʻanga ʻo hēvaní,” ko ha founga-pule fakahēvani. (Mātiu 10:7; Fakahā 11:15) Naʻe fakanofo ʻe he ʻOtuá ʻa Kalaisi ke hoko ko e Tuʻi ʻo e Puleʻanga ko iá. Ko e Puleʻanga ʻo e ʻOtuá te ne fakahoko ʻa e taumuʻa ʻa e ʻOtuá ki he māmaní. (Taniela 2:44; Mātiu 6:10) Ki ha fakamatala lahi ange, sio ki he kupu “Ko e Hā ʻa e Puleʻanga ʻo e ʻOtuá?”