Maika 6:8—“ʻAʻeva Anga-Fakanānā mo Ho ʻOtuá”

“Kuó ne fakahā kiate koe, ʻe tangata, ʻa e meʻa ʻoku leleí. Pea ko e hā ʻa e meʻa ʻoku fiemaʻu ʻe Sihova meiate koé? ʻOku ʻikai mo ha toe meʻa ka ko hono fakahoko ʻa e fakamaau totonú, mo koloaʻaki ʻa e mateakí, pea ke ʻaʻeva anga-fakanānā mo ho ʻOtuá!”—Maika 6:8, Liliu Tohi Tapu Māmani Foʻoú.

“Kuo ne fakaha kiate koe, tangata, ʻa e meʻa ʻoku lelei; ʻio, ko e ha ʻa e meʻa ʻoku ʻeke ʻe Sihova kiate koe? Ka ko e fai fakalao, mo e manako ki he mēsi, pea ke taka angavaivai ʻi hoʻo feangai mo ho ʻOtua.”—Maika 6:8, Paaki Foʻou.

ʻUhinga ʻo e Maika 6:8

Ko e palōfita ko Maiká ʻokú ne fakamatalaʻi ʻoku ʻikai ke fuʻu faingataʻa ki he faʻahinga ʻo e tangatá ke nau fakahōifuaʻi ʻa Sihovaa ko e ʻOtuá. (1 Sione 5:3) Ko e meʻa ʻoku ʻamanekina mai ʻe he ʻOtuá meiate kitautolú ʻoku fakamatalaʻi ia ʻi he veesi ko ení ʻi ha lea mohu ʻuhinga ʻe tolu. Ko e ongo ʻuluaki leá ʻoku kaunga ia ki he fakafeangai ʻa ha taha mo e niʻihi kehé, pea ko e lea hono tolú ʻoku kaunga ia ki hono vahaʻangatae mo e ʻOtuá.

“Fakahoko ʻa e fakamaau totonú.” ʻOku fiemaʻu ʻe he ʻOtuá ki heʻene kau lotú ke nau fai ʻa e meʻa ʻoku totonu mo tāú. ʻOku kau ki heni ʻa e fakakaukau mo ngāue ʻo fehoanaki mo e ngaahi tuʻunga ʻa e ʻOtuá ki he tonú mo e halá. (Teutalōnome 32:4) Ko e fakatātaá, ko e faʻahinga ʻoku nau muimui ki he ngaahi tuʻunga ʻa e ʻOtuá ʻoku nau fai honau lelei tahá ke fakafeangai ki he kakai kotoa pē ʻi he faitotonu mo e taʻefilifilimānako, neongo honau puipuituʻá, fonuá pe tuʻunga fakasōsialé.—Livitiko 19:15; ʻAisea 1:17; Hepelū 13:18.

“Koloaʻaki ʻa e mateakí.” Ko e kupuʻi lea ko ení ʻoku lava ke toe liliu ia ko e “ʻofa ʻi he ʻofa mateakí.” (Maika 6:8, fakamatala ʻi lalo) ʻI he muʻaki lea faka-Hepeluú ko e foʻi lea “mateakí” ʻoku ʻikai ngata pē ʻi heʻene ʻuhinga ki he faitōnunga ʻa ha taha ʻi hono vahaʻangatae mo ha taha ka ʻoku toe ʻuhinga foki ki hono fakahāhā ʻa e anga-leleí mo e mēsí ki ha toe taha, ʻo fakalaka atu ia ʻi he ngaahi tuʻunga ʻo e laó. ʻOku fiemaʻu ʻe he ʻOtuá mei he faʻahinga ʻoku nau loto ke fakahōifuaʻi iá ke ʻoua ʻe ngata pē ʻi heʻenau fakahāhā ʻa e anga-leleí mo e mēsí ka ke nau toe koloaʻaki pe ʻofa ʻi he ngaahi ʻulungaanga ko ení. ʻOku ʻuhinga ení ʻoku totonu ke fiefia ʻene kau lotú ʻi he tokoni ki he niʻihi kehé, tautefito ki he faʻahinga ʻoku nau fiemaʻu ʻa e tokoní. Ko e fiefiá ʻoku haʻu ia mei he foaki atú.—Ngāue 20:35.

“ʻAʻeva anga-fakanānā mo ho ʻOtuá.” ʻI he Tohi Tapú, ko e kupuʻi lea ko e “ʻaʻeva” ʻoku lava ke ʻuhinga ia ke “muimui ʻi ha ʻalunga pau ʻi he moʻuí.” ʻOku ʻaʻeva ha tokotaha mo e ʻOtuá fakafou ʻi heʻene muimui ki he ʻalunga moʻui ʻoku fakahōifua kiate Iá. Ko ha faʻifaʻitakiʻanga lelei ʻe taha ko Noa. Naʻá ne “ʻaʻeva . . . mo e ʻOtua moʻoní” koeʻuhí naʻá ne māʻoniʻoni ʻi he fofonga ʻo e ʻOtuá pea “naʻá ne fakamoʻoniʻi ʻa ʻene taʻemele ʻi he haʻohaʻonga ʻo hono ngaahi toʻumeʻá.” (Sēnesi 6:9) ʻI he ʻahó ni, ʻoku tau ‘ʻaʻeva mo e ʻOtuá’ ʻaki ʻa e moʻui ʻo fakatatau ki heʻene ngaahi akonaki ʻoku fakamatalaʻi ʻi heʻene Folofolá, ʻa e Tohi Tapú. ʻOku fiemaʻu heni ke tau tali anga-fakanānā hotau ngaahi fakangatangatá pea fakahaaʻi ʻoku tau fakafalala ki he ʻOtuá ʻi he meʻa kotoa pē.—Sione 17:3; Ngāue 17:28; Fakahā 4:11.

Puipuituʻa ʻo e Maika 6:8

Ko Maiká ko ha palōfita ia ʻi ʻIsileli ʻo e kuonga muʻá ʻi he lolotonga ʻa e senituli hono valu K.M. ʻI he taimi ko iá, ko e fonuá naʻe fonu ʻi he lotu ʻaitolí, kākaá mo e fakafeʻātungiá. (Maika 1:7; 3:1-3, 9-11; 6:10-12) Ko e tokolahi taha ʻo e kau ʻIsilelí naʻa nau tukunoaʻi ʻa e ngaahi fiemaʻu ʻa e ʻOtuá, ʻa ia naʻe fakahaaʻi ʻi he Lao naʻe ʻoange kia Mōsesé, ʻoku ui ko e Lao ʻa Mōsesé. ʻI he taimi tatau, ko e tokolahi ʻoku nau maʻuhala ʻe lava ke nau maʻu ʻa e hōifua ʻa e ʻOtuá ʻaki hono fai pē ha ouau fakalotu mo ʻoatu ha ngaahi feilaulau.—Palōveepi 21:3; Hōsea 6:6; Maika 6:6, 7.

ʻI he laui senituli hili ʻa e taimi ʻo Maiká, naʻe toe fakahaaʻi ʻe Sīsū ko ʻene Tamaí ʻokú ne fiefia ʻi he faʻahinga ʻoku nau fakahāhā ʻa e ʻofá, fakamaau totonú mo e mēsí ka ʻoku ʻikai ke Ne fiefia ʻi he faʻahinga ʻoku nau hā fakangalingali atu ʻoku nau anga-līʻoá. (Mātiu 9:13; 22:37-39; 23:23) Ko e ngaahi lea ʻa Sīsuú ʻokú ne tokoniʻi kitautolu ke tau mahinoʻi ʻa e meʻa ʻoku ʻamanekina mai ʻe he ʻOtuá mei heʻene kau lotú ʻi he ʻahó ni.

Sio ʻi he vitiō nounou ko ení ke maʻu ha vakai fakalūkufua ki he tohi ʻa Maiká.