2 Kolinitō 12:9​—“ʻOku Fuʻu Lahi ʻEku Kelesi ki Hoʻo Meʻa”

“Ko ʻeku ʻofa maʻataʻataá ʻoku feʻungaʻānoa ia kiate koe, he ko hoku mālohí ʻoku fakahaohaoaʻi ia ʻi hoʻo hoko ʻo vaivaí.”​—2 Kolinitō 12:9, Liliu Tohi Tapu Māmani Foʻoú.

“ʻOku fuʻu lahi ʻeku kelesi ki hoʻo meʻa; he ʻoku toki ha hono ivi kotoa he tuʻu ʻi he vaivai.”​—2 Kolinitō 12:9, Paaki Foʻou.

ʻUhinga ʻo e 2 Kolinitō 12:9

ʻOku talaʻofa ʻe he ʻOtuá te ne ʻoange ki he ʻapositolo ko Paulá ʻa e mālohi ʻokú ne fiemaʻu ke fekuki ai mo hono ngaahi ʻahiʻahí mo e ngātangá.

“Ko ʻeku ʻofa maʻataʻataá ʻoku feʻungaʻānoa ia kiate koe.” Ko e tali ʻa e ʻOtuá ki he toutou lotu ʻa Paulá ʻe lava ke toe liliu ia “ko ʻeku anga-leleí ʻa e meʻa pē ʻokú ke fiemaʻú.” Ko hono toe fakalea ʻe taha, ko e ʻofa maʻataʻatā ʻa e ʻOtuá ʻe feʻunga pē ia ke ne tokoniʻi ʻa Paula ke fekuki mo hono ngaahi ʻahiʻahí. ʻO anga-fēfē? Ko e foʻi lea naʻe liliu ko e “ʻofa maʻataʻataá” pe “kelesi,” ʻokú ne fakamatalaʻi ha meʻaʻofa taʻetotongi mo ʻikai tuha ke maʻu ʻe ha taha ʻa ia ʻoku foaki nima-homo ʻe he ʻOtuá. ʻOku fakahaaʻi ʻi he ngaahi tohi ʻa Paulá naʻá ne maʻu ʻaonga lahi mei he ʻofa maʻataʻatā ʻa e ʻOtuá. Neongo ko Paulá ko ha tokotaha fakatanga ki muʻa, naʻe ʻoange ʻe he ʻOtuá kiate ia ʻa e mālohi naʻá ne fiemaʻu ke liliu ai hono ʻulungāngá pea ke tokoniʻi ʻa e niʻihi kehé ke nau hoko ko e kau Kalisitiane. (1 Kolinitō 15:9, 10; 1 Tīmote 1:12-14) Naʻe lava ke falala pau ʻa Paula ki he tokoni ʻa e ʻOtuá ke ne ikuʻi ai ha faʻahinga palopalema pē pe pole naʻá ne fehangahangai mo ia.

“He ko hoku mālohí ʻoku fakahaohaoaʻi ia ʻi hoʻo hoko ʻo vaivaí.” ʻOku fakamanatu ʻe he ʻEiki ko Sihováa kia Paula ko Hono mālohí ʻoku hā mahino taha ia ʻi he taimi ʻoku ngāue ai fakafou ʻi he faʻahinga vaivai mo e taʻehaohaoa ʻo e tangatá. (2 Kolinitō 4:7; 12:8) ʻI hono ʻiloʻi ʻe he kau Kalisitiané honau ngaahi ngātangá pea hanga kia Sihova ki ha tokoni, ʻoku nau fakaʻatā ai ʻa e mālohi ʻo e ʻOtuá ke ngāue kakato ʻiate kinautolu. (ʻEfesō 3:16; Filipai 4:13) ʻI he ʻuhinga ko iá, ko e mālohi ʻo e ʻOtuá ʻoku fakaeʻa ia ʻi he vaivai ʻa e tangatá.

Puipuituʻa ʻo e 2 Kolinitō 12:9

Naʻe tohi ʻe Paula ha tohi fakamānavaʻi ki he kau Kalisitiane ʻi Kolinitoó ʻi he 55 T.S. nai. ʻI he konga ki mui ʻo e tohi ko iá, naʻá ne taukapoʻi ai hono mafai ko ha ʻapositoló. Naʻe ueʻi ia ke ne fai pehē koeʻuhí naʻe fakaangaʻi ia ʻe he niʻihi naʻa nau taukaveʻi ko e kau faiako kinautolu, mahalo naʻa nau fakamāuʻi ia koeʻuhi ko hono fōtungá pe ko e ʻikai ke ne pōtoʻi ʻi he leá.​—2 Kolinitō 10:7-10; 11:5, 6, 13; 12:11.

ʻI heʻene taukapó, ʻoku fakamatalaʻi ʻe Paula naʻe ʻikai malava ke ne fakahoko ʻene ngāue fakafaifekaú mo kātekina ʻa e ngaahi ʻahiʻahi lahi ʻi hono mālohi pē ʻoʻoná. (2 Kolinitō 6:4; 11:23-27; 12:12) ʻI he vahe 12, ʻokú ne lea fakaefakatātā fekauʻaki mo ha “tolounua ʻi he kakanó,” ʻoku ngalingali ko ha faingataʻa naʻá ne toutou fakatupunga ha mamahi fakaesino pe fakaeongo kiate ia. (2 Kolinitō 12:7) Neongo naʻe ʻikai fakamatalaʻi ʻe Paula ʻa e faingataʻa naʻá ne fehangahangai mo iá, naʻá ne fakapapauʻi ke kātekina ia ʻi he tokoni ʻa e ʻOtuá.

Ko e kau Kalisitiane ʻi he ʻaho ní te nau fehangahangai foki mo e ngaahi faingataʻa mo e fakatanga. ʻOku nau maʻu ʻa e fakafiemālie ʻi hono ʻiloʻi ko e mālohi ʻo e ʻOtuá ʻe lava ke ne ʻai kinautolu ke ikuʻi ha faʻahinga pole pē te nau fehangahangai nai mo ia. Hangē ko Paulá, ʻe lava ke nau lea mo e falala pau: “ʻI heʻeku vaivaí, ʻoku ou toki mālohi leva.”​—2 Kolinitō 12:10.

Sio ʻi he vitiō nounou ko ení ke maʻu ha vakai fakalūkufua ki he tohi ʻa 2 Kolinitoó.