Fakahā 21:4—“Te Ne Holoholo ʻa e Loʻimata Kotoa Pē”

“Te ne holoholo ʻa e loʻimata kotoa pē mei honau matá, pea ʻe ʻikai ke toe ʻi ai ha mate, pe ha mamahi pe ha tangi pe ha langa. Kuo mole atu ʻa e ngaahi meʻa muʻá.”​—Fakahā 21:4, Liliu Tohi Tapu Māmani Foʻoú.

“Te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”​—Fakahā 21:4, Paaki Foʻou.

ʻUhinga ʻo e Fakahā 21:4

ʻOku talaʻofa ʻe he ʻOtuá te ne toʻo atu ʻa e mamahi mo e faingataʻa ʻokú ne uesia ʻa e faʻahinga ʻo e tangatá ʻi he ʻaho ní pea pehē foki ki he tupuʻanga tefito ʻo e ngaahi palopalema ko ení.

“Te ne holoholo ʻa e loʻimata kotoa pē mei honau matá.” Ko e ngaahi lea ko ení ʻokú ne fakapapauʻi ʻa e talaʻofa ʻa Sihovaa naʻe hiki ʻe he palōfita ko ʻAiseá ʻa ia te Ne “holoholo . . . ʻa e loʻimatá mei he mata kotoa pē.” (‘Aisea 25:8; Fakahā 7:17) Ko e kupuʻi lea ko ení ʻokú ne fakahaaʻi mai ʻa e tokanga anga-ʻofa ʻa e ʻOtuá ki he faʻahinga kotoa ʻoku nau fakatō loʻimata koeʻuhí ko e mole ha taha ʻofeiná pe koeʻuhí ko ha toe faingataʻa kehe pē.

“ʻE ʻikai ke toe ʻi ai ha mate.” Ko e kupuʻi lea ko ení ʻe lava ke toe liliu ia ko e “puli atu ʻa mate” pe ko e “ʻosi ʻa e maté.” ʻOku talaʻofa ʻe he ʻOtuá te ne toʻo ʻosi atu ʻa e maté mo e faingataʻa ʻokú ne fakatupungá. ʻIkai ko ia pē, ka ʻe ʻi ai foki mo ha toetuʻu ʻo e maté. (1 Kolinitō 15:21, 22) Ko ia ai, ko e maté “ʻe toʻo ʻosi atu ia.”​—1 Kolinitō 15:26.

“ʻE ʻikai ke toe ʻi ai . . . ha mamahi pe ha tangi pe ha langa.” Ko e talaʻofa ʻa e ʻOtuá ʻoku ʻikai ʻuhinga iá heʻikai toe ongoʻi ʻe he faʻahinga ʻo e tangatá ʻa e langa pe mamahi kotoa pē, ʻo kau ha mamahi fakaesino pē ʻokú ne ʻomai ha fakatokanga fakaenatula fekauʻaki mo ha fakatuʻutāmaki pe ko ha lavea ʻe ala hoko. ʻI hono kehé, ko e talaʻofa ko ení ʻokú ne fakahaaʻi mai ko e kotoa ʻa e ngaahi mamahi fakaʻatamai, fakaeongo mo fakaesino ʻoku fakatupunga ʻe he angahaláb mo e taʻehaohaoá ʻe ʻikai ke toe ʻi ai.​—Loma 8:21, 22.

“Kuo mole atu ʻa e ngaahi meʻa muʻá.” Ko e konga ki mui ko eni ʻo e vēsí ʻokú ne fakahaaʻi mai ʻa e ngaahi liliu fakaofo ʻe hokosia ʻe he faʻahinga ʻo e tangatá. ʻOku pehē ʻe ha maʻuʻanga fakamatala ʻe taha: “Ko e founga moʻui motuʻá, ʻa ia ʻoku hoko ai ʻa e maté, mamahí, tangí mo e langá ko ha konga taʻealakalofi ʻo e tuʻunga ʻo e tangatá, ʻe fetongiʻaki ia ʻa e founga moʻui foʻou.” ʻE malava ai ki he faʻahinga ʻo e tangatá ke nau fiefia ʻi he moʻuí ʻi he māmaní ʻo taʻengata ʻi he ngaahi tuʻunga haohaoa, ʻo hangē naʻe muʻaki fakataumuʻa ki ai ʻe he ʻOtuá.​—Sēnesi 1:27, 28.

Puipuituʻa ʻo e Fakahā 21:4

ʻI he kamataʻanga ʻo e vahe 21, ʻoku fakamatalaʻi ʻe he ʻapositolo ko Sioné ʻa e meʻa naʻá ne sio ki ai ʻi ha vīsone: “Naʻá ku sio ki ha langi foʻou mo ha māmani foʻou.” (Fakahā 21:1) ʻOkú ne ngāueʻaki ha lea fakaefakatātā ke fakamatalaʻiʻaki ha liliu lahi ʻa ia ʻoku toe tomuʻa tala foki ʻi ha ngaahi veesi Tohi Tapu kehe. (ʻAisea 65:17; 66:22; 2 Pita 3:13) Ko e founga-pule fakahēvani ʻa e ʻOtuá pe ko e “langi foʻou,” te ne fetongi ʻa e ngaahi founga-pule fakaetangata kotoa pē pea pule ki ha “māmani foʻou,” ʻa ia ko ha sōsaieti foʻou ʻo e faʻahinga ʻo e tangatá ʻoku nau moʻui ʻi he māmaní.​—ʻAisea 65:21-23.

Ko e hā ʻokú ne fakahaaʻi ko e vīsoné ʻoku ʻuhinga ia ki he moʻui ʻi he māmaní? ʻUluakí, ko e talaʻofa ʻa e ʻOtuá ʻoku kamataʻaki ia ʻa e ngaahi lea: “Ko e tēniti ʻo e ʻOtuá ʻoku ʻi he faʻahinga ʻo e tangatá.” (Fakahā 21:3) Ko ia ko e talaʻofa ko ení ʻoku ʻikai ʻoange ia ki he kau ʻāngelo ʻi hēvaní, ka ki he faʻahinga ʻo e tangatá ʻi he māmaní. Uá, ʻoku fakamatalaʻi ʻi he vīsoné ha māmani ʻa ia “ʻe ʻikai ke toe ʻi ai ha mate.” (Fakahā 21:4) Kuo ʻikai ʻaupito ke ʻi ai ha mate ʻi hēvani, ka kuó ne uesia pē ʻa e kakai ʻi he māmaní. (Loma 5:14) Ko ia ai, ʻoku ʻuhinga lelei ke fakaʻosiʻaki ko e veesi ko ení ʻokú ne fakamatalaʻi ʻa e ngaahi tuʻunga ʻo e māmaní ʻi he kahaʻú.

Sio ʻi he vitiō nounou ko ení ke maʻu ha vakai fakalūkufua ki he tohi ʻa Fakahaá.