Luke 1:37—“He ʻOku ʻIkai ha Meʻa Kuo Folofolaʻaki ʻe he ʻOtuá ʻe Taʻemalava”

“He ʻoku ʻikai ha meʻa kuo folofolaʻaki ʻe he ʻOtuá ʻe taʻemalava.”​—Luke 1:37, Liliu Tohi Tapu Māmani Foʻoú.

“He oku ikai ha mea e faigataa ki he Otua.”​—Luke 1:37, Paaki Motuʻa.

ʻUhinga ʻo e Luke 1:37

Ko e ʻOtua Māfimafi-Aoniú ʻe lava ke ne fai ha ngaahi meʻa ʻoku taʻemalava ʻi he vakai ʻa e tangatá. ʻOku ʻikai ha meʻa ʻe lava ke ne taʻofi ia mei hono fakahoko ʻa e meʻa ʻokú ne folofolaʻakí pe talaʻofá.

Ko e muʻaki lea ki he “folofolaʻaki” ʻe lava ke ʻuhinga ia ki ha “lea”​—ʻi he tuʻunga ko ení, ʻa e ʻOtuá. ʻE lava foki ke toe ʻuhinga ia ki he ola ʻo e meʻa kuo folofolaʻaki ʻe Sihovaa ko e ʻOtuá. Koeʻuhi ko e folofola ʻa e ʻOtuá ʻoku hoko moʻoni maʻu pē ia, ʻe lava ke toe liliu ai ʻa e Luke 1:37 ke pehē: “He ko e ngaahi talaʻofa ʻa e ʻOtuá heʻikai ʻaupito ke taʻefakahoko ia” pe “He ʻoku ʻikai ha meʻa ʻe taʻemalava ki he ʻOtuá.” Ko e ngaahi liliu ko eni ʻo e muʻaki lea faka-Kalisí ʻokú ne fakahaaʻi mai ʻa e moʻoni tefito ko ení: Heʻikai ha meʻa ʻoku folofolaʻaki pe talaʻofa ʻe he ʻOtuá ʻe taʻefakahoko, he ʻoku ʻikai ha meʻa ʻoku taʻemalava kiate ia.​—ʻAisea 55:10, 11.

Ko e ngaahi fakalea meimei tatau fekauʻaki mo e ngaahi talaʻofa ʻa e ʻOtuá ʻoku hā ia ʻi he kotoa ʻo e Tohi Tapú. Ko e fakatātaá, ko Sihova, fakafou ʻi heʻene ʻāngeló, naʻá ne tomuʻa tala ko e uaifi taʻefanau ʻo ʻĒpalahamé, ʻa Sela, te ne hoko ʻo feitama neongo ʻene taʻumotuʻá. Naʻe toe pehē ʻe he ʻOtuá: “ʻOku ʻi ai koā ha meʻa ʻe fuʻu lahi fau kia Sihova?” (Sēnesi 18:13, 14) Hili ʻa e fakalaulauloto ki he ngaahi fakatupu ʻa e ʻOtuá, naʻe fakahaaʻi ʻe he pēteliake ko Siopé: “ʻOku ʻikai ha meʻa ʻokú ke finangalo ke fai ʻe taʻemalava kiate koe.” (Siope 42:2) Pea ʻi he taimi naʻe fakahaaʻi ai ʻe he kau muimui ʻo Sīsuú ʻenau hohaʻa fekauʻaki mo ʻenau malava ke aʻusia ʻa e ngaahi tuʻunga ʻa e ʻOtuá ki he fakamoʻuí, naʻe fakamanatu ange ʻe Sīsū kiate kinautolu “ki he ʻOtuá ʻoku malava ʻa e meʻa kotoa pē.”​—Mātiu 19:25, 26.b

Puipuituʻa ʻo e Luke 1:37

Ko ha ʻāngelo ko Kepaleli naʻá ne leaʻaki ʻa e ngaahi lea ʻo e Luke 1:37 ki ha tāupoʻou Siu ko hono hingoá ko Mele. Naʻe toki fakahaaʻi ange pē ʻe Kepaleli te ne fāʻeleʻi ʻa e “ʻAlo ʻo e Fungani Māʻolungá” pea ʻoku totonu ke ne “fakahingoa ia ko Sīsū.” Te ne hoko ko e Tuʻi ʻo e Puleʻanga ʻo e ʻOtuá, ʻa ia ʻe pule ʻo taʻengatá.​—Luke 1:26-33; Fakahā 11:15.

Naʻe ʻeke ʻe Mele pe ʻe anga-fēfē ʻa e malava ʻa e meʻá ni koeʻuhí naʻá ne taʻemali pea “kuo teʻeki ai ke [ne] mohe mo ha tangata.” (Luke 1:34, 35) Naʻe tali ange ʻe Kepaleli ʻe ngāueʻaki ʻe he ʻOtuá Hono laumālie māʻoniʻoní pe ivi ngāué. ʻI he taimi ko iá, ko Sīsū naʻá ne hoko ko ha foha laumālie ʻo e ʻOtuá ʻi hēvani. Ko ia naʻe ngāueʻaki ʻe Sihova hono laumālie māʻoniʻoní ke ʻohifo ʻa e moʻui hono ʻAló mei hēvani ki he manava ʻo Melé. (Sione 1:14; Filipai 2:5-7) Ko ia naʻá ne hoko ʻo feitama fakaemana. Ke fakaivimālohiʻi ʻene tui ki he mālohi ʻo e ʻOtuá, naʻe tala ange ʻe he ʻāngeló kiate ia ko hono kāinga ko ʻIlisapesí kuó ne lolotonga tuʻituʻia ʻi ha foha “ʻi heʻene taʻumotuʻá.” Ko ʻIlisapesi mo hono husepānití, ʻa Sākalaia naʻe ʻikai haʻana fānau koeʻuhí naʻe paʻa ʻa ʻIlisapesi. (Luke 1:36) Naʻe hoko hona fohá ko Sione Papitaiso, ʻa ia ko ʻene ngāue fakafaifekaú naʻe ʻosi tomuʻa folofolaʻaki ʻe Sihova ki muʻa.​—Luke 1:10-16; 3:1-6.

Naʻe leaʻaki leva ʻe he ʻāngelo ko Kepalelí ʻa e ngaahi lea ʻi he Luke 1:37, mahalo naʻe ʻi heʻene fakakaukaú fakatouʻosi ʻa Mele mo ʻIlisapesi. Ko e ngaahi lea tatau ko iá ʻokú ne fakapapauʻi ki he kau lotu ʻa Sihova ʻi he ʻaho ní te ne hokohoko atu ke tauhi ʻene ngaahi talaʻofá. ʻOku kau ai ʻene talaʻofa ke fetongi ʻa e ngaahi founga-pule fakaetangatá ʻaki ʻa e pule māʻoniʻoni hono ʻAló, ʻa Sīsū Kalaisi, ko e Tuʻi ʻo e Puleʻanga fakahēvani ʻo e ʻOtuá.​—Taniela 2:44; 7:13, 14.

Sio ʻi he vitiō nounou ko ení ke maʻu ha vakai fakalūkufua ki he tohi ʻa Luké.