ʻAi ke Malu ʻa e Ngaahi Fale Fakatahaʻangá Lolotonga ʻa e COVID-19

“Kuo fili ʻa e Kulupu Pulé ke fakalototoʻaʻi ʻa e ngaahi fakatahaʻangá kotoa ke kamata fakahoko ʻa e ngaahi fakatahá mata ki he mata ʻi he uike ʻo ʻEpeleli 1, tuku kehe kapau ʻoku ʻi ai ha ngaahi fakangatangata fakapuleʻanga.” Ko e fanongonongo ko iá ʻa ia naʻe tuku atu ʻi he jw.org ʻi he konga ki muʻa ʻo Maʻasi 2022, naʻe fakafiefia ki he Kau Fakamoʻoni ʻa Sihova takatakai he māmaní. Ka naʻe teʻeki ke ʻosi ʻa e mahaki fakaʻauha COVID-19.a Ko e hā ʻa e ngaahi liliu, ngaahi naunau mo e meʻangāue naʻe fiemaʻu ke maluʻi ai ʻa e kau maʻu fakatahá mei he vailasí? Hili ha taʻu nai ʻe ua ʻo e ʻikai fai ha fakataha mata ki he mata, ʻe maau hotau ngaahi Fale Fakatahaʻangá?

Ko hono moʻoní, ko hotau fanga tokouá naʻa nau ʻosi teuteu ʻi ha laui māhina ke toe hoko atu ʻa e ngaahi fakatahá ʻi he Fale Fakatahaʻangá.

Kehekehe ʻa e Ngaahi Fiemaʻú, Kehekehe ʻa e Ngaahi Fakaleleiʻangá

Hili ha māhina pē ʻe taha mei hono taʻofi ʻa e ngaahi fakataha mata ki he matá ʻi he 2020, ko e Potungāue Tisaini/Langa ʻi Māmani Lahi (WDC), ʻi Warwick, Niu ʻIoké, naʻe kamata ke nau sivisiviʻi ʻa e founga ʻe uesia ai ʻe he COVID-19 ʻetau ngāueʻaki hotau ngaahi Fale Fakatahaʻangá pea mo e ngaahi meʻa naʻe fiemaʻu ke ʻai ai hotau ngaahi feituʻu faiʻanga fakatahá ke malu.

Ko e meʻa naʻe fiemaʻu ʻi he tafaʻaki ʻe taha ʻo e māmaní naʻe faʻa kehe ia mei he meʻa naʻe fiemaʻu ʻi ha feituʻu ʻe taha. Ko Matthew De Sanctis, ʻoku ngāue ʻi he WDC, ʻokú ne fakamatala: “ʻI he ngaahi fonua ʻe niʻihi, ko e ʻīsiu ʻe taha ko e siʻisiʻi ʻa e ngaahi naunau ki he fanofanó. ʻI he taimi ʻoku ʻikai ai ke ʻi ai ha vai ʻi he Fale Fakatahaʻangá, ʻoku fiemaʻu ke fakatau mai ʻa e vaí pe ke taki mai mei ha vaitafe pe ko ha vaitupu ofi ʻi he koló. ʻI he ngaahi fonua kehe, naʻe liliu ʻe he ngaahi puleʻanga ʻe niʻihi ʻenau fiemaʻu ki hono ngāueʻaki ʻo e mīsini fakamokomoko-ʻeá, ngaahi founga ke feʻaluʻaki ai ʻa e ʻeá, pea fokotuʻu mo e ngaahi fakaʻilonga fekauʻaki mo e moʻui leleí mo e haisiní.”

Naʻe anga-fēfē fekuki ʻa hotau fanga tokouá mo e ngaahi pole ko iá? Naʻa nau ʻiloʻi ko e ngaahi Fale Fakatahaʻanga lahi, “ʻoku ola lelei ʻaupito hono ngāueʻaki ai ʻa e founga mo e naunau faingofua mo maʻamaʻa,” ko e lau ia ʻa Matthew. Ko e fakatātaá, ʻi Pāpua Niu Kini, naʻe fokotuʻu ai ʻa e ngaahi meʻa fanofano ʻo ngāueʻaki ʻa e kane pelesitiki lita ʻe 20 (kālani ʻe 5.3) ʻo ʻai mo hono ngaahi meʻa kiiʻi. Naʻe malava ai ʻa hotau fanga tokouá ke fakanaunau ha Fale Fakatahaʻanga ʻi he feituʻu ʻutá ʻo feʻunga mo ha tola ʻAmelika pē ʻe $40. ʻI he ngaahi Fale Fakatahaʻanga ʻi ʻAfiliká, laka hake ʻi he ngaahi naunau lelei ʻaupito ki he fanofanó ʻe 6,000 naʻe fakatau mai mei ha kautaha ʻi ʻĒsia.

Ko e ngaahi feʻunuʻaki ʻe niʻihi naʻe kau ai hono fokotuʻu pe fakaleleiʻi ʻa e ngaahi ī mo e ngaahi naunau kehe ke tokoni ki he feʻaluʻaki ʻa e ʻeá ʻi he Fale Fakatahaʻangá. Ko e ngaahi fakatahaʻanga lahi naʻa nau fakatau mai ʻa e ngaahi meʻa tuʻuʻanga maika lōloa koeʻuhi ke ʻoua ʻe toe paasi holo ʻa e foʻi maiká. Naʻe fai mo e ngaahi feinga ke fakamaʻa maʻu pē ʻa e ngaahi feituʻu ʻoku ala maʻu pē ki ai ʻa e kakaí, hangē ko e ngaahi kauʻimatapaá mo e ngaahi meʻa kīʻí, ʻa ia ʻe lava ke mafola ai ʻa e vailasí. ʻI he ngaahi falemālōlō ʻo e ngaahi fakatahaʻanga ʻe niʻihi, naʻa nau fokotuʻu ai ʻa e ngaahi tepi vai ʻotomētiki. ʻI Sili, ko hono fokotuʻu ʻo e ngaahi naunau ko ení naʻe fakaʻavalisi hono fakamolé ki he tola ʻAmelika ʻe $1,400 ki he Fale Fakatahaʻanga taki taha.

Lolotonga hono fakamuʻomuʻa ʻa e ʻai ke malu ʻa e ngaahi Fale Fakatahaʻangá, naʻe toe feinga foki hotau fanga tokouá ke fakasiʻisiʻi ʻa e mole ʻa e paʻanga tokoní. Ko e fakatātaá, ʻi he ngaahi fonua ʻe niʻihi, naʻa nau ngāueleleiʻaki hono toʻo ʻe he puleʻangá ʻa e totongi tukuhau ki he ngaahi naunau fanofanó mo e meʻa toʻo maiká. Ko e ngaahi ʻōfisi vaʻá naʻa nau ngāue fakataha ke fakahaofi ʻa e paʻangá ʻaki hono fakatau mai ʻa e ngaahi naunau lahi ange ʻi he anga-mahení. Ko e ngaahi vaʻá mo e Potungāue Fakataú naʻa nau faʻa fokotuʻutuʻu ke fakatau hangatonu mai ʻa e ngaahi naunaú mei he ngaahi kautaha ʻoku nau faʻu iá, ʻo ʻikai ngata pē hono holoki ai ʻa e totongí ka ʻe toe vave foki mo ʻene aʻu maí.

“Naʻe ʻAi Ai Ke U Ongoʻi Malu”

Ko e ngaahi fokotuʻutuʻu ke ʻai ke malu ange ʻa e ngaahi Fale Fakatahaʻangá kuo hao ai mo fiemālie ʻa e faʻahinga naʻe kamata ke nau maʻu ʻa e ngaahi fakatahá mata ki he matá. Ko Dulcine, ko ha tuofefine ʻi Pelū, ʻokú ne pehē naʻá ne “kiʻi ilifia” ʻi heʻene ʻiloʻi te tau foki ki he Fale Fakatahaʻangá. “Naʻá ku puke ʻi he COVID-19 ʻi he hili pē ʻa e kamata ʻa e mahaki fakaʻauhá,” ko ʻene leá ia. “Ko ia naʻe ʻikai ke u ongoʻi fiemālie ke ʻalu ki he Fale Fakatahaʻangá, ʻi hono ʻiloʻi ʻe lava ke u toe maʻu ai ʻa e vailasí. Ka ʻi heʻeku aʻu ki he Fale Fakatahaʻangá, naʻá ku fakatokangaʻi kuo fokotuʻu ʻe he kau mātuʻá ʻa e ngaahi founga fakaʻehiʻehi lahi, hangē ko hono ngāueʻaki ʻa e ngaahi naunau ki he fanofanó pea mo e ngaahi tuʻuʻanga maika lōloa, pehē foki ki ha polokalama ke fakamaʻa ʻa e holó ʻi he ki muʻa mo e tuku ʻa e fakataha taki taha. Ko e kotoa ení naʻe ʻai ai ke u ongoʻi malu.”b

Ko Sara, ko ha tuofefine ʻi Semipia, naʻá ne fehangahangai mo ha pole kehe. ʻOkú ne fakamatala: “ʻI he laui māhina kuo maliu atú, naʻe mate hoku husepānití ʻi he COVID-19. Naʻá ku hohaʻa pe te u ongoʻi fēfē ʻi heʻeku fuofua maʻu ʻa e fakataha mata ki he matá ʻo ʻikai ke ne ʻi ai.” Naʻe fēfē ʻa e tuʻungá ʻi heʻene maʻu iá? ʻOkú ne pehē: “Ko e ngaahi fakataha mata ki he matá kuó ne fakamoʻoniʻi mai kiate au ʻoku kau ʻa Sihova mo kitautolu ʻi he lolotonga ʻo e ngaahi ʻaho fakaʻosi ko ení. ʻI he taimí ni ʻo laka ange ʻi ha toe taimi ki muʻa, ʻoku ou ongoʻi ʻoku ou maʻu ʻa e fakalototoʻa, ʻofa mo e poupou ʻoku ou fiemaʻú mei he kau mātuʻá mo e toenga hoku fanga tokouá mo e fanga tuofāfiné.”

Ko hotau ngaahi kaungālotu ʻofeina takatakai he māmaní ʻoku nau houngaʻia ʻi he faingamālie ke foki ki honau ngaahi Fale Fakatahaʻangá. Fakamālō atu ki hoʻo ngaahi tokoní, ʻa ia ko e lahi tahá naʻe fai ia fakafou ʻi he donate.jw.org. Ko e ngaahi tokoni ko ení naʻá ne tokoniʻi kitautolu ke fakapapauʻi ko e ngaahi senitā ʻo e lotu maʻá ʻoku hoko ko e ngaahi feituʻu ʻoku fakafiemālie mo malu ke fakataha fakatahataha ai.