Ko e Ngaahi Polokalama Fakataha-Lahi ʻOku Tau “Fanongo mo Mamata Aí”

Laka hake ʻi he taʻu ʻe 130, ko e Kau Fakamoʻoni ʻa Sihova ʻi onopōní ʻoku nau fakatahataha ʻi he ngaahi fakataha-lahí ʻi he taʻu taki taha. Ko e ngaahi polokalama ko ení ʻoku kau ki ai ʻa e ngaahi malanga kehekehe laka hake ʻi he 40 fakataha mo e ngaahi fasi, fakaʻekeʻeke mo e vitiō. Ke maongo pea maʻu ʻaonga ʻa e kau fanongó mei he polokalamá, kuo pau ke ʻi ha tuʻunga lelei ia ke nau lava ʻo “fanongo mo mamata aí.” (Luke 2:20) Kuo anga-fēfē hono ngāueʻaki hoʻomou paʻanga tokoní ke maʻu ʻaonga mei ai ʻa e tokotaha kotoa mei he ngaahi fakataha-lahi ko ení, ʻo tatau ai pē pe ʻoku tau nofó ʻi fē?

Fokotuʻutuʻu ʻa e Ngaahi Naunau Fakaleʻolahi/Vitiō ʻo Fakatatau ki he Feituʻu ʻo e Fakataha-Lahí

ʻOku lahi ʻa e ngaahi sitētiume mo e ngaahi malaʻe vaʻinga ʻi onopooni ʻi he ngaahi fonua ʻi he Uēsité kuo ʻosi ʻi ai pē ʻenau ngaahi naunau fakaleʻolahi/vitiō. Ko ia ʻi he taimi ʻoku tau totongi ai ha fale ki he fakataha-lahí, ko e hā ʻoku tau faʻa fokotuʻu ai ʻetau meʻangāue pē ʻa kitautolú? Ko David, ʻokú ne ngāue ʻi he Potungāue Broadcasting ʻi he ʻUluʻi ʻApitangá, ʻokú ne pehē: “ʻOku siʻisiʻi pē ʻa e ngaahi fale ʻoku tisaini ke malava ʻa e kau fanongó ʻo fanongo lelei ki ha polokalama lea ʻataʻatā pē ʻo laka hake ʻi he houa ʻe onó. Ko e fakatātaá, ko e ngaahi fale faiʻanga sipoti ʻe niʻihi, ʻoku nau ngāueʻaki ʻa e sisitemi fakaʻilekitulōnika ke fakahoko ai ʻa e ngaahi fanongonongo pe tā ha fasi nounou. Ko ʻenau ngaahi TV ʻoku fakahaaʻi ai ʻa e lahi ʻo e kai ʻi he vaʻingá, ngaahi tuʻuaki mo hono toe huluʻi ha konga ʻo e vaʻingá. ʻI hono kehé, ʻoku mau loto ke mamata ʻa e kau fanongó ʻi he ngaahi vitiō loloa ange pea fanongo mo mahinoʻi lelei ʻa e lea kotoa pē ʻoku fai mei he siteisí.”

Ko e ngaahi feituʻu faiʻanga fakataha-lahi taki taha ʻoku kehekehe, ko ia kuo pau ke fokotuʻutuʻu ʻa e ngaahi naunau fakaleʻolahi/vitiō ʻo fakatatau ki he tuʻunga taki taha. ʻI hono fili pē ʻa e feituʻú, ko e Potungāue Broadcasting ʻi hotau ʻōfisi vaʻá ʻoku nau fili ʻa e feituʻu ʻe nofo ai ʻa e kau fanongó ʻo makatuʻunga ʻi he fakafuofua ki he tokolahi ʻa e kau maʻu fakatahá mo e lahi ʻo e falé. ʻOku fikaʻi leva ʻe he fanga tokouá ʻa e feituʻu ʻe tuʻu ai ʻa e ngaahi sipiká mo e TV pea tā ha palani ki he founga ke fokotuʻu ai iá, pea lisi leva ʻa e meʻangāue kotoa pē ʻoku fiemaʻú ke fakapapauʻi ʻe malava ki he tokotaha kotoa ke sio pea fanongo ki he polokalamá.

ʻOku toe fihi ange hono fokotuʻu ʻa e ngaahi naunau fakaleʻolahi/vitiō ʻi he ngaahi fakataha-lahi ko ia ʻoku fakahoko ʻi he ngaahi lea lahi. Kapau ko e polokalamá ʻe liliu ki ha lea kehe, ko e hiki-leʻó mo e vitioó kuo pau ke sio mo fanongo ai ʻa e tokotaha fakatonu-leá pea te ne ʻoatu ia ʻi ha sēnolo letiō ki he faʻahinga ʻoku nau mahinoʻi ʻa e lea ko iá. ʻOku tau houngaʻia ʻi he ngaahi polokalama fakakomipiutá, he ʻoku malava ai ke huluʻi ʻa e ngaahi vitioó ʻi he taimi tatau ki he kotoa ʻa e kau maʻu fakatahá, naʻa mo hano liliu ia ki ha lea kehekehe ʻe valu. “Ko e ngaahi sisitemi ko ení ʻoku fuʻu fihi ʻaupito,” ko e lau ia ʻa David, “pea ko e kau ngāue pole ʻoku nau ngāue aí ʻoku fiemaʻu ke akoʻi lelei ʻaupito kinautolu.”

Ko e lahi taha ʻo e ngaahi ʻōfisi vaʻá ʻoku nau tokonaki ʻa e ngaahi naunau fakaleʻolahi/vitiō ke ngāueʻaki ʻi he taʻu kotoa pē. ʻI heʻene peheé, ʻoku fokotuʻutuʻu ʻe he fanga tokouá ʻa hono feʻaveʻaki ʻa e ngaahi meʻangāue ko ení ki he ngaahi fakataha-lahí. Naʻe fakamoleki ʻe he vaʻa ʻi ʻAmeliká pē ʻa e tola ʻe $200,000a tupu ʻi he taʻu taki taha ke fakafolau ʻa e ngaahi naunau ki he fakataha-lahí. Neongo ia, ʻoku siʻi ange ai ʻa e fakamolé ki hono fakatau pea tokangaʻi ʻa e ngaahi meʻangāue lahi. Ko Steven, naʻá ne tokoni ki hono tokangaʻi ʻa e naunau fakaleʻolahi/vitiō ʻi he fakataha lahi ʻi Kānatá, ʻokú ne pehē, “Ko ʻemau timí naʻa nau fai honau lelei tahá ke fakapapauʻi naʻe faʻo fakalelei ʻa e ngaahi foʻi natí, polotá, uaeá pea mo e ngaahi kongokonga kotoa naʻe ʻomai ke mau tokangaʻí ke maau ki he fakataha-lahi hokó.”

Maʻu pea Tauhi ʻa e Meʻangāué

Ko hono totongi ke ngāueʻaki fakataimi ʻa e naunau fakaleʻolahi/vitiō ʻoku fuʻu mamafa ʻaupito pea ko e ngaahi meʻangāue ko iá ʻoku ʻikai ke ʻi ha tuʻunga lelei. ʻI he ʻuhinga ko iá, ʻoku tau fakatau ai ʻa e ngaahi meʻangāue ʻoku tau fiemaʻú. ʻI he lolotonga ní, ko e TV lalahi ʻoku mita ʻe 5 hono loloá pea mita ʻe tolu hono māukupú ʻoku feʻunga ia mo e tola ʻe $24,000, naʻa mo e uaea mita ʻe 15 ki he maika ʻe tahá ʻoku feʻunga mo e tola ʻe $20. Ko ia ai, ʻoku ngāue fakataha ʻa e Potungāue Broadcasting mo e Potungāue Fakataú ke “fikaʻi ʻa e fakamolé” ki muʻa ia ke fakatau ha meʻangāue. (Luke 14:28) Ko e fakatātaá, ʻoku nau ʻeke hifo, ko e kakai ʻe toko fiha te nau maʻu ʻaonga mei he meʻangāue ko iá? Ko e fakatau ʻa e meʻangāue foʻoú ʻa e founga lelei taha ke feau ai ʻa e fiemaʻú? ʻOku ʻi ai ha feituʻu feʻunga ke tauhi ai ʻa e naunaú, pea ʻoku tau maʻu ha meʻangāue mo ha kau ngāue pole kuo teuʻi ke nau tokangaʻi ia?

Ke tauhi ke tolonga ʻa e naunau fakaleʻolahi/vitioó pea fakahaofi ʻa e paʻanga tokoní, ʻoku mau fakahoko maʻu pē ʻa hono fakaleleiʻi mo tokangaʻi ʻa e ngaahi naunau ko ení. ʻOku mau fakafolau ʻa e ngaahi naunau ko ení ʻi ha puha fefeka mo malu ʻaupito ke ʻoua ʻe maumau, pea ko e ngaahi puha foki ko ení ʻoku lava pē ʻo ngaahi kapau ʻe maumau.

Ko ha Faifakamoʻoni Lelei mo ha Polokalama ʻAta Lelei mo Ongo Lelei

Naʻe maongo ki he kakai ʻikai Fakamoʻoní ʻa e tuʻunga māʻolunga ʻo e ongo mo e ʻata ʻo e vitiō ʻi heʻetau ngaahi fakataha-lahí. Ko e fakatātaá, ʻi ha fakataha-lahi ʻe taha, naʻe fakaofoʻia ha tokotaha naʻá ne ngāue ʻi he taha ʻo e kautaha fakamafola lea tuʻu-ki-muʻa ʻi he māmaní ʻi he tuʻunga ʻo e meʻa ʻoku tau faʻú mo ala maʻú. “Naʻá ne ʻohovale ʻi he ʻiloʻi ko e ngaahi mēmipa ʻo ʻemau timí ko e kau ngāue pole kotoa pea ʻoku ʻikai ko ha kau palōfesinale,” ko e lea ia ʻa Jonathan, ʻa ia naʻá ne tokoni ki hono fokotuʻu mo tokangaʻi ʻa e naunau fakaleʻolahi/vitiō ʻi he fakataha-lahí. “Naʻá ne pehē ko ʻenau kautahá ʻe fiemaʻu ʻa e ʻaho ʻe nima ke fokotuʻu ai ʻa e meʻa naʻa tau fokotuʻu ʻi he ʻaho ʻe taha mo e kongá.” ʻI ha fakataha-lahi ʻe taha, ko e pule falé naʻá ne pehē, “Kuo ʻosi ʻi heni ki muʻa ʻa e kau palōfesinale ʻi he mūsiká mo e vitioó, ka kuo teʻeki ai ke u sio ʻi ha kakai hangē ko kimoutolú ʻoku nau ngāue ʻi ha tuʻunga fakapalōfesinale mo taukei pehē!”

Kuo anga-fēfē hoʻo maʻu ʻaonga mei he sisitemi fakaleʻolahi/vitiō ʻi he fakataha-lahí? Mahalo te ke ongoʻi tatau mo David ʻokú ne nofo ʻi ʻIngilani. ʻOkú ne pehē: “Ko hoku taʻu 88 eni pea kuó u maʻu maʻu pē ʻa e ngaahi fakataha-lahí. Neongo ia, ʻoku faingofua ange ʻi he taimí ni ke tokangataha kakato ki he polokalamá. Koeʻuhi ko e ngaahi vitiō fakaʻofoʻofa ko ení, ʻoku vave ange ai ʻa e lele ʻa e polokalamá pea ko e pōpoakí ʻoku ʻomai ia ʻi ha founga ʻoku toe mahino ange mo hokohoko lelei.” Ko Micheal, ʻoku nofo ʻi Naisīlia, ʻokú ne pehē, “Koeʻuhi ko e faingofua ange ko ia ki hotau fanga tokouá ke fanongo mo sio ʻi he ngaahi vitioó, ʻoku malava ai ke nau tokangataha ki he polokalamá.”

ʻI hoʻo maʻu ʻa e Fakataha-Lahi Fakavahe “Talaki ʻa e Ongoongo Leleí”! ʻi he taʻu ní, vaheʻi ha taimi ke fakakaukau ki he ngaahi ngāue kotoa kuo fakahokó ke malava ai ke ke fanongo mo sio ʻi he polokalamá. ʻOku mau houngaʻia ʻi hoʻomou ngaahi lī meʻaʻofá ʻo kau ai ʻa e tokoni ʻoku mou fai ʻi he donate.jw.org, kuo tokoni ia ke malava ai eni. Mālō ʻaupito.