FEKUKI MO E HIKIHIKI ʻA E TOTONGI ʻO E KOLOÁ

Maʻu ha Vakai Fakatuʻamelie

ʻOku hiki tō ʻa e totongi ʻo e koloá ʻi ho fonuá ʻo fakalaka ia ʻi hoʻo paʻanga hū maí? ʻOkú ke hohaʻa pe ʻe fēfē haʻo tokonaki maʻau mo e faʻahinga ʻokú ke ʻofa aí? Kapau ko ia, te ke ongoʻi nai ʻoku taʻepau ho kahaʻú. Ka naʻa mo e ʻi he ngaahi tuʻunga faingataʻa peheé, ʻoku hoko ʻa e ʻamanakí ko ha meʻa mātuʻaki mahuʻinga.

ʻUHINGA ʻOKU MAHUʻINGA AÍ

Ko e kakai ʻoku nau maʻu ha vakai fakatuʻamelie ʻoku ʻikai ke nau fakaʻamu pē ke hoko ha ngaahi meʻa lelei. Ko ʻenau ʻamanakí ʻokú ne fakaivia kinautolu ke nau fai honau lelei tahá ʻi honau tuʻunga lolotongá. Ko e fakatātaá, ʻoku fakahaaʻi ʻi he ngaahi akó ko e kakai ʻoku nau vakai fakatuʻamelié . . .

ʻoku nau faʻa matuʻuaki ange ʻa e faingataʻá
ʻoku faingofua ange ke nau feʻunuʻaki
ʻoku nau fai ʻa e ngaahi fili fakapotopoto ange ʻi he moʻuí, kau ai ʻa e tōʻonga ʻokú ne pouaki ʻa e moʻui leleí

MEʻA ʻE LAVA KE KE FAÍ

ʻUluakí, fakakaukau ki he founga ʻe lava ke tokoniʻi ai koe ʻe he Tohi Tapú ʻi he ʻaho ní. ʻOku maʻu ʻi he Tohi Tapú ʻa e ngaahi fokotuʻu ʻaonga ʻe lava ke ne tokoniʻi koe ke fekuki mo e hikihiki ʻa e totongi ʻo e koloá. Ko e ngaahi fokotuʻu ko ení ʻe lava ke ne ʻai koe ke ke malava ʻo mapuleʻi lelei ange hoʻo moʻuí pea ongoʻi mateuteu ange ke fekuki mo e ngaahi pole ʻi he kahaʻú.

“ʻE hanganaki tokangaʻi koe ʻe he malava fakaefakakaukaú, pea ʻe leʻohi koe ʻe he ʻiloʻiló.”—Palōveepi 2:11.

Uá, fakakaukau ki he meʻa ʻoku leaʻaki ʻe he Tohi Tapú fekauʻaki mo e kahaʻú. ʻI hoʻo lāuʻilo ki he mahuʻinga ʻo e poto ʻoku maʻu ʻi he Tohi Tapú, ʻe ueʻi nai ai koe ke vakaiʻi fakalelei ange ʻa e meʻa ʻoku leaʻaki ʻi he tohi ko ení fekauʻaki mo e kahaʻú. Ko e fakatātaá, te ke ako ai ʻoku ʻikai ngata pē ʻa e finangalo ʻa e ʻOtuá ke ke maʻu ha “kahaʻu pea mo ha ʻamanaki” ka ʻokú ne toe tokonaki mai ha fakavaʻe fefeka ki he ʻamanaki ko iá. (Selemaia 29:11) Ko e fakavaʻe ko iá ko e Puleʻanga ʻo e ʻOtuá.

KO E HĀ ʻA E PULEʻANGA ʻO E ʻOTUÁ, PEA KO E HĀ TE NE FAÍ?

Ko e Puleʻanga ʻo e ʻOtuá ko ha founga-pule ʻi hēvani ʻa ia te ne puleʻi fakaʻaufuli ʻa e kotoa ʻo e māmaní. (Taniela 2:44; Mātiu 6:10) Te ne fakangata ʻa e faingataʻá mo e masivá, ʻo fetongi ia ʻaki ʻa e melino mo e ngaahi meʻa hulu fau, ʻo hangē ko ia ʻoku hā ʻi he ngaahi konga Tohi Tapu hokó.

“Te ke fiefia mo lakalakaimonū.”—Saame 128:2.

“[Ko e kakai ʻe ʻi he malumalu ʻo e Puleʻangá] ʻe ʻikai taʻeʻaonga ʻa ʻenau fakaongosiá.”—ʻAisea 65:23.

“ʻE lahi fau ʻa e uité ʻi he māmaní.”—Saame 72:16.

ʻOku falala ʻa e laui miliona ki he ngaahi talaʻofa ko iá, ʻo tuipau ko e ʻOtuá “ʻoku ʻikai lava ke loí.” (Taitusi 1:2) Ko ia fēfē ke ke vakaiʻi tonu ʻa e Tohi Tapú. Ko e ʻamanaki ʻoku ʻomai aí ʻe lava ke ne ʻoatu kiate koe ʻa e mālohi ʻi loto ke fekuki mo e ngaahi faingataʻa fakaʻekonōmiká pea ke hanga ki he kahaʻú mo e falala pau.