ʻOku Ofi ʻa e Palataisí!

Ko e ngaahi meʻa kovi ko ia ʻoku hoko he taimí ni ʻi he foʻi māmaní ʻoku fakahaaʻi ai ʻoku ofi ʻa e Palataisí. ʻOku pehē ʻe he Tohitapú te tau sio ʻi ha ngaahi taimi fakalilifu ki muʻa pē ʻi he hoko mai ʻa e Palataisí. ʻOku tau moʻui ʻi he ngaahi taimi ko iá he taimí ni! Ko e niʻihi eni ʻo e ngaahi meʻa ʻoku pehē ʻe he Tohitapú ʻe hokó:

Ko e ngaahi tau lahi. “ʻE tuʻu ha kakai ki ha kakai, mo ha puleʻanga ki ha puleʻanga.” (Mātiu 24:7) Kuo hoko moʻoni ʻa e kikite ko ení. Talu mei he taʻu 1914, mo e ʻi ai ʻa e ongo tau ʻe ua ʻa e māmaní pea mo e fanga kiʻi tau iiki ange lahi ʻaupito. Kuo mate ai ʻa e kakai ʻe laui miliona.

Mafolalahia ʻa e mahakí. ʻE ʻi ai “ʻi he ngaahi potu kehekehe mo e ngaahi mahaki fakaʻauha.” (Luke 21:11) Kuo hoko moʻoni eni? ʻIo. Kuo tāmateʻi ʻe he kanisaá, mahaki mafú, tīpií, malēliá, ʻeitisí, mo e ngaahi mahaki kehe ʻa e kakai ʻe laui miliona.

Siʻi ʻa e meʻakaí. ʻI he māmaní kotoa ʻoku ʻi ai ʻa e kakai ʻoku ʻikai haʻanau meʻakai feʻunga ke kai. ʻOku mate ʻa e kakai ʻe laui miliona ʻi he fiekaiá he taʻu kotoa pē. Ko e fakaʻilonga eni ʻe taha ʻo e vave ke ʻi heni ʻa e Palataisí. ʻOku pehē ʻe he Tohitapú: “ʻE ai ha ngaahi honge.”​—Maake 13:8.

Ngaahi mofuike. “ʻE ai ha ngahi . . . mofuike ʻi he ngahi potu kehekehe.” (Mātiu 24:7) Kuo toe hoko moʻoni eni ʻi hotau taimí. Kuo mate ʻa e kakai laka hake ʻi he milioná ʻi he ngaahi mofuike talu mei he 1914.

Kakai anga-fulikivanu. Ko e kakaí te nau “ʻofa ki he paʻanga” pea “ʻofa kiate kinautolu pe.” Te nau “ʻofa ki he malie ʻo ʻikai ʻofa ki he ʻOtua.” Ko e fānaú te nau “talangataʻa ki he matuʻa.” (2 Timote 3:1-5) ʻIkai ʻokú ke loto-tatau ʻoku tokolahi ʻa e kakai hangē ko iá ʻi he ʻahó ni? ʻOku ʻikai haʻanau tokaʻi ʻa e ʻOtuá, pea ʻoku nau fakahohaʻasi ʻa e faʻahinga ko ia ʻoku nau feinga ke ako ʻo fekauʻaki mo e ʻOtuá.

Faihia. ʻE toe hoko foki ha “ope ʻo e maumau lao.” (Mātiu 24:12) Ngalingali ʻokú ke loto-tatau ʻoku kovi ange ʻa e faihiá ʻi he tuʻunga ne ʻi ai he ngaahi taʻu kuo maliu atú. Ko e kakai ʻi he feituʻu kotoa pē ʻoku nau ʻi ha tuʻunga faka­tuʻu­tāmaki ʻi hono kaihaʻasia, kākaaʻi, pe fakalaveaʻi.

Ko e kotoa ʻo e ngaahi meʻá ni ʻoku fakahaaʻi ai ʻoku ofi ʻa e Puleʻanga ʻo e ʻOtuá. ʻOku pehē ʻe he Tohitapú: “Ka mou ka vakai kuo hoko ʻa e ngaahi meʻa ko ia, pea mou ʻilo kuo ofi ʻa e Puleʻanga ʻo e ʻOtua.” (Luke 21:31) Ko e hā ʻa e Puleʻanga ʻo e ʻOtuá? Ko e founga-pule fakahēvani ia ʻa e ʻOtuá ʻa ia te ne ʻomai ʻa e Palataisí ki he foʻi māmani ko ení. ʻE fetongi ʻe he Puleʻanga ʻo e ʻOtuá ʻa e ngaahi founga-pule fakaetangatá.​—Taniela 2:44.