Ko e Hā ʻe Lava ke Maʻu ʻi Heʻemau Uepisaití?

Naʻe tala ʻe Sīsū Kalaisi ki hono kau muimuí: “Mou ʻai hoʻomou māmá ke ulo atu ki he kakaí, koeʻuhí ke nau sio ki hoʻomou ngaahi ngāue leleí pea nau ʻoatu ai ʻa e lāngilangí ki hoʻomou Tamai ʻoku ʻi hēvaní.” (Mātiu 5:16) Ki he taumuʻa ko iá, ʻoku mau ngāueleleiʻaki ai ʻa e tekinolosia fakaeonopōní, ʻo kau ai ʻa e ʻInitanetí. Ko ʻemau uepisaití, jw.org, ko e maʻuʻanga fakamatala ʻInitaneti fakaʻofisiale ia fekauʻaki mo e ngaahi tui mo e ngaahi ngāue ʻa e Kau Fakamoʻoni ʻa Sihová. Ko e hā ʻoku fakaeʻa mai aí?

Ko e ngaahi tali Fakatohitapu ki he ngaahi fehuʻi anga-maheni ʻoku faʻa ʻeke. ʻE lava ke ke maʻu ai ʻa e ngaahi tali ki he niʻihi ʻo e ngaahi fehuʻi mahuʻinga taha kuo faifai ange pea ʻeke ʻe he kakaí. Ko e fakatātaá, ko e tuleki ʻE Toe Ngata Koā ʻa e Faingataʻá? mo e ʻE Toe Moʻui Mai Koā ʻa e Kau Maté? ʻoku maʻu ʻatu ia ʻi he ʻinitanetí ʻi he lea laka hake ʻi he 600. ʻE lava ke ke toe maʻu foki ʻa e Liliu Tohi Tapu Māmani Foʻoú ʻi he lea laka hake ʻi he 130 pea mo ha ngaahi tohi tokoni fakaeako Tohi Tapu, ʻo kau ai ʻa e tohi Ko e Hā ʻOku Akoʻi Moʻoni ʻe he Tohi Tapú? pea mo e ngaahi ʻīsiu fakamuimui ʻo e Taua Leʻo mo e ʻĀ Hake! Ko e lahi ʻo e ʻū tohi ko ení ʻe lava ke lau ia pe fanongo ki ai ʻi he ʻinitanetí pe hiki ʻi ha faʻunga manakoa hangē ko e MP3, PDF, pe EPUB. ʻE aʻu ʻo ke malava ke pulusi mei ai ha ngaahi peesi ke vahevahe ki ha tokotaha mahuʻingaʻia ʻi heʻene leá tonu! Ko e ʻū tohi kuo hiki vitioó ʻoku ala maʻu ia ʻi he ngaahi lea lahi ʻa e kau noá. ʻE lava ke ke hiki ʻa e ngaahi tulama hiki-leʻo ʻo e lau Tohi Tapú, ngaahi tulama Fakatohitapu, mo e fasi mālie ke fiefia ai ʻi ho taimi mālōloó.

Fakamatala moʻoni fekauʻaki mo e Kau Fakamoʻoni ʻa Sihová. ʻOku toe fokotuʻu ai ʻa e ngaahi ongoongo mo e ngaahi vitiō fakamuimui taha fekauʻaki mo ʻemau ngāue ʻi māmani lahí, ngaahi meʻa ʻokú ne uesia ʻa e Kau Fakamoʻoni ʻa Sihová, mo ʻemau ngaahi feinga tokoni ʻofá. ʻE lava ke ke maʻu ai ʻa e ngaahi fanongonongo fekauʻaki mo e ngaahi fakataha-lahi ka hoko maí mo e fakamatala fetuʻutaki ki homau ngaahi ʻōfisi vaʻá.

Fakafou ʻi he ngaahi meʻá ni, ʻoku mau ʻai ke ulo atu ai ʻa e maama ʻo e moʻoní ki he ngaahi feituʻu mamaʻo taha ʻo e māmaní. Ko e kakai mei he konitinēniti kotoa pē, kau ai ʻa e ʻAnitātiká, ʻoku nau maʻu ʻaonga mei ai. ʻOku mau lotu “ke lava ke mafola vave ai pē ʻa e folofola ʻa Sihová” ki he kotoa ʻo e māmaní, ke lāngilangiʻia ai ʻa e ʻOtuá.​—2 Tesalonaika 3:1.

• ʻOku tokoniʻi fēfē ʻe he jw.org ʻa e kakai tokolahi ange ke nau ako ʻa e moʻoni Fakatohitapú?

• Ko e hā te ke saiʻia ke kumi ki ai ʻi heʻemau uepisaití?