Kuo ʻi Ai Nai ha Taimi Naʻá Ke Ongoʻi Taʻelata mo Ilifia Ai?

Sio ki he kiʻi tamasiʻi ʻi he fakatātaá. ʻOku mata taʻelata mo ilifia, ʻikai ko ia? Kuó ke faʻa ongoʻi pehē?— ʻOku ongoʻi pehē ʻa e tokotaha kotoa ʻi he taimi ʻe niʻihi. ʻOku fakamatala ʻa e Tohi Tapú fekauʻaki mo e ngaahi kaumeʻa ʻo Sihova naʻa nau ongoʻi taʻelata foki mo ilifia. Ko e taha ʻo kinautolu ko ʻIlaisiā. Tau ako angé fekauʻaki mo iá.

Naʻe nofo ʻa ʻIlaisiā ʻi ʻIsileli ʻi he taimi fuoloa ki muʻa ke ʻaloʻi ʻa Sīsuú. Ko ʻĒhapi ko e tuʻi ʻo ʻIsilelí naʻe ʻikai lotu ia ki he ʻOtua moʻoní, ʻa Sihova. Ko ʻĒhapi mo hono uaifí, ʻa Sisipeli naʻá na lotu ki he ʻotua loi ko Pēalí. Ko ia ko e tokolahi taha ʻo e kakai ʻi ʻIsilelí naʻa nau kamata foki ke lotu kia Pēali. Naʻe fuʻu anga-kovi ʻaupito ʻa kuini Sisipeli peá ne loto ke tāmateʻi kotoa e kakai naʻa nau lotu kia Sihová, ʻo kau ai ʻa ʻIlaisiā! ʻOkú ke ʻiloʻi ko e hā ʻa e meʻa naʻe fai ʻe ʻIlaisiaá?—

Naʻe hola ʻa ʻIlaisiā! Naʻe ʻalu ia ʻo mamaʻo atu ki he toafá pea toi ʻi ha ʻana. ʻOkú ke pehē ko e hā naʻá ne fai ai iá?— ʻIo, naʻá ne ilifia. Ka naʻe ʻikai fiemaʻu kia ʻIlaisiā ke ilifia. Ko e hā hono ʻuhingá? Koeʻuhí naʻá ne ʻilo ʻe lava ʻa Sihova ʻo tokoniʻi ia. Naʻe ʻosi fakahā ʻe Sihova hono mālohí kia ʻIlaisiā ki muʻa. ʻI he taimi ʻe taha, naʻe tali ʻe Sihova ʻa e lotu ʻa ʻIlaisiaá ʻaki hono ʻomai ha afi mei hēvani. ʻIo ko e moʻoni, naʻe lava ʻe Sihova ʻo tokoniʻi ʻa ʻIlaisiā ʻi he taimi ko ení!

Lolotonga ʻa e nofo ʻa ʻIlaisiā ʻi he ʻaná, naʻe lea ʻa Sihova kiate ia peá ne ʻeke ange: ‘Ko e hā hoʻo meʻa ʻoku fai hení?’ Naʻe tali ʻe ʻIlaisiā: ‘Ko au toko taha pē ʻoku ou kei lotu kiate koé. Ko au pē ʻi hení pea ʻoku ou ilifia naʻa tāmateʻi au.’ Naʻe fakakaukau ʻa ʻIlaisiā naʻe ʻosi tāmateʻi ʻa e faʻahinga kotoa naʻa nau lotu kia Sihová. Ka naʻe tala ange ʻe Sihova kia ʻIlaisiā: ‘ʻIkai, ʻoku ʻikai moʻoni ia. ʻOku ʻi ai ʻa e kakai ʻe toko 7,000 ʻoku nau kei lotu mai kiate au. Ke ke hoko ʻo toʻa. ʻOku lahi ʻa ʻeku ngāue kiate koe ke ke faí!’ ʻOkú ke fakakaukau naʻe fiefia ʻa ʻIlaisiā ke fanongo ki aí?—

Ko e hā ʻe lava ke ke ako mei he meʻa naʻe hoko kia ʻIlaisiaá?— ʻOku ʻikai ʻaupito fiemaʻu ke ke ongoʻi taʻelata mo ilifia. ʻOku ʻi ai ho ngaahi kaumeʻa ʻoku nau ʻofa kia Sihova pea ʻoku nau ʻofa ʻia koe. ʻIkai ko ia pē, ʻoku maʻu ʻe Sihova ʻa e mālohi lahi pea te ne tokoniʻi maʻu pē koe! ʻOkú ke fiefia ke ʻiloʻi heʻikai ha taimi te ke fuʻu ongoʻi taʻelata ai?—