Akoʻi Hoʻo Fānaú

Kuo Faifai Ange Peá Ke Ongoʻi Taʻelata mo Ilifia?

KO E kakai tokolahi he ʻahó ni ʻoku nau ongoʻi taʻelata; ʻoku nau ongoʻi ʻoku ʻikai ha taha ʻe tokanga moʻoni ange kia kinautolu. Ko e kakai taʻumotuʻa angé ʻoku nau faʻa ongoʻi peheni. Ka ko e fānau tokolahi he ʻahó ni, naʻa mo e tokolahi ʻoku nau tauhi ki he ʻOtuá, ʻoku nau toe ongoʻi taʻelata foki mo ilifia. ʻOkú ke ʻiloʻi ʻa hono ʻuhingá?—a

ʻOku lava ke ʻi ai ʻa e ngaahi ʻuhinga lahi. Tau vakai angé ki he fakatātā fekauʻaki mo ha tangata naʻe moʻui he taimi fuoloa he kuohilí—meimei ʻi ha taʻu ʻe taha afe ki muʻa ke ʻaloʻi ʻa Sīsuú. Ko hono hingoá ko ʻIlaisiā. Naʻá ne moʻui ʻi he taimi naʻe liʻaki ai ʻe he kakai ʻo e puleʻanga ʻIsilelí ʻa e tauhi ki he ʻOtua moʻoní, ʻa Sihova. Ko e tokolahi tahá naʻa nau kamata lotu ki he ʻotua loi ko Pēalí. Naʻe pehē ʻe ʻIlaisiā: “Ko au pe ʻoku ou toe toko taha.” Ka ʻokú ke fakakaukau ko e moʻoni ko ʻIlaisiā pē ʻa e toko taha naʻe kei tauhi kia Sihová?—

Neongo ia naʻe ʻikai ʻiloʻi ʻe ʻIlaisiā, naʻe kei lotu pē ki he ʻOtua moʻoní ʻa e niʻihi kehe ʻi ʻIsileli. Ka naʻa nau toitoi. Naʻa nau ilifia. ʻOkú ke ʻiloʻi ʻa hono ʻuhingá?—

Ko ʻĒhapi, ʻa e tuʻi ʻIsilelí, naʻe ʻikai ke tauhi kia Sihova; naʻá ne lotu kia Pēali, ko e ʻotua loi ʻo e uaifi fulikivanu ʻo ʻĒhapí ko Sisipeli. Ko ia naʻe feinga ʻa Sisipeli mo ʻĒhapi ke maʻu ʻa e faʻahinga ko ia naʻa nau tauhi kia Sihová ʻo tāmateʻi kinautolu, tautefito kia ʻIlaisiā. Ko e ʻuhinga ia ne hola ai ʻa ʻIlaisiaá. Naʻá ne fononga he meimei maile ʻe 300 (kilomita ʻe 483), ʻo faai atu ʻi he toafá ʻo aʻu ki Hōlepi, ko ha feituʻu ʻa ia ʻoku toe ui ko Sainai ʻi he Tohi Tapú. ʻI aí, ʻi he taʻu ʻe lauingeau ki muʻa he taimi ʻo ʻIlaisiaá, ne ʻoange ai ʻe Sihova ki hono kakaí ʻa e Fekau ʻe Hongofulú mo e toenga ʻo ʻene Laó. Naʻe toitoi ʻa ʻIlaisiā ʻi ha ʻana ʻi Hōlepi ko ia toko taha pē. ʻOkú ke fakakaukau naʻe totonu ke ilifia ʻa ʻIlaisiā?—

ʻOku fakahaaʻi ʻe he Tohi Tapú naʻe ngāueʻaki ki muʻa ʻe Sihova ʻa ʻIlaisiā ke ne fakahoko ʻa e ngaahi mana lalahi. Naʻe tali he taimi ʻe taha ʻe Sihova ʻa e lotu ʻa ʻIlaisiā ke ʻohifo ha afi mei hēvani ke ne keina ha feilaulau. ʻI he founga ko iá, naʻe fakamoʻoniʻi ai ʻe Sihova ko Ia ʻa e ʻOtua moʻoní, ʻo ʻikai ko Pēali. ʻI he taimi ko ení, lolotonga ʻa e ʻi he ʻaná ʻa ʻIlaisiaá, naʻe folofola ʻa Sihova kiate ia.

“Ko e ha ʻau ʻoku ke ʻi heni ai?” ko e ʻeke ange ia ʻe Sihová. Ko e taimi ia naʻe pehē ai ʻe ʻIlaisiā, ‘Ko au pe toko taha ʻoku ou toe he faʻahinga ʻoku lotu kiate koé.’ Naʻe fakatonutonu anga-ʻofa leva ai ʻe Sihova ʻa ʻIlaisiā, ʻo ne pehē, ‘ʻoku ʻi ai ha toko fitu afe ʻoku nau tauhi mai kiate au.’ Naʻe tala ʻe Sihova kia ʻIlaisiā ke ne foki, peá ne fakamatalaʻi ange ʻoku ʻi ai ʻEne ngāue lahi ange kiate ia ke ne fai.

ʻOkú ke pehē ko e hā ʻoku lava ke tau ako mei he faʻifaʻitakiʻanga ʻa ʻIlaisiaá?— Naʻa mo e faʻahinga ko ia ʻoku nau tauhi kia Sihová ʻoku nau ilifia nai he taimi ʻe niʻihi. Ko ia ko kitautolu kotoa, tatau pē ʻa e iiki mo e lalahi, ʻoku fiemaʻu ke tau manatuʻi ke hanga kia Sihova ki ha tokoni. ʻOku talaʻofa ʻi he Tohi Tapú: “ʻOku ofi leva ʻa Sihova ki he kakai kotoa ʻoku tautapa kiate ia.”

ʻOku toe ʻi ai ha lēsoni ʻe taha: ʻOku tau maʻu ʻa e fanga tokoua mo e fanga tuofāfine he feituʻu kotoa pē ʻoku nau ʻofa ʻia Sihova pea ʻia kitautolu. ʻOku pehē ʻe he Tohi Tapú: ‘Ko e ngaahi faʻahinga faingataʻaʻia tatau pē ʻoku kātekina ʻe he haʻohaʻonga kotoa ʻo [hotau] fanga tokouá ʻi he māmaní.’ ʻIkai ʻokú ke fiefia ke ʻiloʻi ʻoku ʻikai ʻaupito pē ke tau tuēnoa moʻoni kitautolu?—

Lau ʻi hoʻo Tohi Tapú

1 Tuʻi 19:3-18

Teutalonome 5:1-22

Sāme 145:18

1 Pita 5:9 (NW)

[Fakamatala ʻi lalo]

[Fakatātā ʻi he peesi 18]

[Fakatātā ʻi he peesi 18]

[Fakatātā ʻi he peesi 19]

[Fakatātā ʻi he peesi 19]