Foki ki he “Tauhi-Sipi mo e ʻOvasia ʻo Hoʻomou Moʻuí”

FAKAPAPAUʻI ʻe ʻi ai ʻa Sihova ʻi hoʻo foki kiate iá. Te ne tokoniʻi koe ke fekuki mo e loto-moʻuá, fakaleleiʻi ʻa e ngaahi ongoʻi loto-mamahí, pea maʻu ʻa e nonga ʻo e ʻatamaí mo e lotó ʻi hono maʻu ha konisēnisi maʻa. Te ke toe ongoʻi leva ʻoku ueʻi koe ke tauhi kia Sihova fakataha mo ho kaungālotú. Ko ho tuʻungá ʻe meimei tatau ia mo e niʻihi ʻo e kau Kalisitiane ʻi he ʻuluaki senitulí, ʻa ia naʻe tohi ki ai ʻa e ʻapositolo ko Pitá: “Ne mou hangē ha fanga sipi ʻoku ʻalu heé; ka ko eni kuo mou foki mai ki he tauhi-sipi mo e ʻovasia ʻo hoʻomou moʻuí.”—1 Pita 2:25.

Ko e moʻoni, ko e foki kia Sihová ʻa e meʻa lelei taha ʻe lava ke ke faí. Ko e hā hono ʻuhingá? Te ke ʻai ai ʻa e loto ʻo Sihová ke fiefia. (Palōveepi 27:11) Hangē ko ia ʻokú ke ʻiló, ʻoku maʻu ʻe Sihova ʻa e ngaahi ongoʻi, ko ia ʻoku kaunga ʻetau ngaahi tōʻongá kiate ia. Ko hono moʻoní, ʻoku ʻikai ke fakamālohiʻi kitautolu ʻe Sihova ke tau ʻofa mo tauhi ange kiate ia. (Teutalōnome 30:19, 20) ʻOku peheni hono fakalea ia ʻe ha mataotao Tohi Tapu ʻe taha: “ʻOku ʻikai ha taha ʻe lava ke ne fakaava ho lotó, ko koe pē.” ʻI heʻetau lotu kia Sihova mo ha loto ʻoku fonu ʻi he ʻofá, ko ʻetau fakaava ia hotau lotó. ʻI heʻetau fai peheé, ʻoku tau ʻoatu ai kiate ia ha meʻaʻofa mahuʻinga—ko ʻetau anga-tonú—pea ʻoku tau ʻai ai ke fiefia lahi hono lotó. Ko hono moʻoní, heʻikai ha meʻa ʻe lava ke fakahoa ki he fiefia ʻoku tau hokosia ʻi hono ʻoatu kia Sihova ʻa e lotu ʻokú ne tuha mo iá.—Ngāue 20:35; Fakahā 4:11.

ʻIkai ko ia pē, ʻi hoʻo toe foki ki he lotu moʻoní, ʻe fakalato ai hoʻo fiemaʻu fakalaumālié. (Mātiu 5:3) ʻI he founga fē? ʻOku fifili ʻa e kakai takatakai he māmaní, ‘Ko e hā ʻoku tau ʻi heni aí?’ ʻOku nau fiekaia ki ha tali ki he ngaahi fehuʻi fekauʻaki mo e taumuʻa ʻo e moʻuí. ʻOku maʻu ʻe he faʻahinga ʻo e tangatá ʻa e fiemaʻu ko iá koeʻuhí naʻe fakatupu kinautolu ʻe Sihova mo e holi ko iá. Naʻá ne ngaohi kitautolú ke tau fiefia ʻi he tauhi ange kiate iá. ʻOku tau maʻu ʻa e fiemālie lahi ʻaupito ʻi hono ʻiloʻi ʻoku tau lotu kia Sihova ʻi he ʻofa.—Saame 63:1-5.

Kātaki ʻo ʻiloʻi ʻoku loto ʻa Sihova ke ke foki ange kiate ia. ʻE lava fēfē ke ke fakapapauʻi ia? Fakakaukau: ʻI he lotu fakamātoato, naʻe teuteuʻi fakalelei ai ʻa e polosiua ko ení. Naʻe ʻoatu ia kiate koe, mahalo ʻe ha mātuʻa Kalisitiane pe ko ha kaungātui. Naʻe ueʻi leva koe ke ke lau ia pea tali ʻa e pōpoaki ʻoku ʻi aí. Ko e meʻá ni kotoa ko e fakamoʻoni ia kuo ʻikai ngalo koe ʻia Sihova. ʻI hono kehé, ʻokú ne tohoakiʻi fakaalaala koe kiate ia.—Sione 6:44.

ʻE lava ke tau maʻu ʻa e fiemālie mei hono ʻiloʻi ʻoku ʻikai ʻaupito ngalo ʻia Sihova ʻene kau sevāniti kuo molé. Ko e meʻa ia naʻe houngaʻia ai ha tuofefine ko Donna. Naʻá ne pehē: “Naʻá ku ʻauhia māmālie atu mei he moʻoní, ka naʻá ku faʻa fakakaukauloto ki he Saame 139:23, 24, ʻa ia ʻoku pehē ai: ‘Hakule au, Ela, ʻo ʻilo hoku lotó ni: Sivi au, ʻo ʻilo ʻeku ngaoʻí: ʻO vakai naʻa ʻoku ʻiate au ha hala ʻomi mala, pea taki au ʻi he hala taʻengatá.’ Naʻá ku ʻiloʻi naʻe ʻikai tonu ke u ʻi he māmaní—naʻe ʻikai ʻaupito pē te u tuha mo ia—pea naʻá ku ʻiloʻi ko e kautaha ʻa Sihová ʻa e feituʻu naʻe tonu ke u ʻi aí. Naʻe kamata ke u ʻiloʻi naʻe ʻikai ʻaupito ke liʻaki au ʻe Sihova; naʻe fiemaʻu pē ke u foki kiate ia. Pea ʻoku ou fiefia ʻaupito ʻi heʻeku fai peheé!”

Ko ʻemau lotu loto-moʻoní ia ke ke toe hokosia mo koe foki ʻa e “fiefia a Jihova.” (Nehemaia 8:10, PM) ʻE ʻikai ʻaupito te ke fakaʻiseʻisa ʻi he foki kia Sihová.