Lotu ki he ʻOtuá ʻAki ʻa e Moʻoní

Ke hoko ʻo fakahōifua ʻa e lotú ki he ʻOtuá, kuo pau ke makatuʻunga ia ʻi he moʻoní. (Sione 4:​23) ʻOku fakapapauʻi ʻe he Tohitapú ʻoku kau ʻa e kau lotu moʻoní ki he “Fakataha tonu ʻa e ʻOtua Moʻui, ko e pou mo e tuʻunga ʻo e Moʻoni.” (1 Timote 3:​15) Ko e faʻahinga ʻoku faʻuʻaki ʻa e fakatahaʻanga ʻa e ʻOtuá ʻoku ʻikai ngata pē ʻi heʻenau tui ki he moʻoni ʻo e Folofola ʻa e ʻOtuá kae toe moʻui foki ʻo fehoanaki mo ia pea maluʻi ia, ʻo ʻai ia ke ʻiloa ʻi he māmaní kotoa.​—Mātiu 24:14; Loma 10:​9-​15.

ʻOKU ʻiloa ʻa e Kau Fakamoʻoni ʻa Sihová ʻi heʻenau ngāue fakaeako Tohitapú, ʻa ia ʻoku fai ia he taimí ni ʻi he ngaahi fonua laka hake he 200. ʻOku nau ako ʻa e Tohitapú pea akoʻi ko e moʻoní ia, ʻo taʻefakakau atu ki ai ʻa e tākiekina vaivai ʻa e ngaahi filōsofia fakaetangatá. ʻOkú ke maheni mo ʻenau ngaahi akonaki makatuʻunga ʻi he Tohitapú? ʻOku toumoua ʻa e tokolahi ke fanongo ki he Kau Fakamoʻoni ʻa Sihová koeʻuhi ko e fakamatala ʻikai lelei ʻoku fai takai holo kiate kinautolú. Ka ʻoku fakaafeʻi ʻa e kakai loto-totonú ke nau fili pē ʻiate kinautolu pe ko e malanga ʻa e Kau Fakamoʻoní ko e moʻoní ia pe ʻikai. Ko ha fili mātuʻaki mahuʻinga pehē ʻoku ʻikai totonu ke makatuʻunga ia ʻi ha fanongo talanoa. Ko e tokolahi ko ia kuo nau fakatotoloʻi fakafoʻituitui ʻiate kinautolu pē ʻa e ngaahi akonaki ʻa e Kau Fakamoʻoni ʻa Sihová kuo nau maʻu ʻa e ʻaonga lahi.

Ko e ʻIlo ʻo e Moʻoní ʻOkú Ne Toʻo ʻa e Manavaheé

Ko e fakatātaá, fakakaukau angé ki he tuʻunga ʻo Eugenia. Naʻe ʻohake ia ʻi ha fāmili Katolika mālohi. Ko ʻene tamaí ko e taha ia ʻo e kau fai fokotuʻutuʻu ʻo e ʻaʻahi fakaetuʻitapu ki Mekisikou ʻi he 1979. Lolotonga ʻene ʻaʻahi ki he ngaahi kaungāmeʻá, naʻe fetaulaki ai ʻa Eugenia mo e Kau Fakamoʻoni ʻa Sihová. ʻI heʻenau tokoní naʻá ne kamata ai ke ʻanalaiso ʻo toe ofi ange ʻa e meʻa ʻoku leaʻaki ʻe he Tohitapú. ʻOkú ne fakamanatu: “ʻI he ʻuluaki taimí, naʻe kamata ke lele hake ʻa e manavaheé. Kuó u ʻilo ʻa e moʻoní! Ka naʻe ʻuhinga ení ko e lahi taha ʻo ʻeku ngaahi tui ki muʻá naʻe hala. Ko hoku fāmilí, ngaahi kaungāmeʻá, kakai ʻa ia ʻoku ou ʻofa aí​—naʻa nau hala kotoa. Naʻá ku ongoʻi hohaʻa. Naʻá ku hanganaki ʻeke hifo kiate au pe ʻe anga-fēfē ʻa e tali ʻa hoku fāmilí ki he meʻa kuó u toki ʻiloʻi foʻoú. ʻI he faai mai ʻa e taimí pea mo e tokoni ʻa Sihová, naʻá ku kamata ke feʻunuʻaki ki he meʻa lahi fau naʻe hokosia ko ení. ʻI he ʻaho ʻe taha naʻá ku fili ai ke u fakahā ia ki ha kaungāmeʻa ʻo e fāmilí, ko ha palōfesa ʻo e teolosiá. Naʻá ku tala ange kotoa kiate ia fekauʻaki mo ʻeku holi ke ʻilo ʻa e moʻoní. Naʻá ne pehē mai leva, ‘Kapau ʻokú ke loto ke ʻiloʻi ʻa e moʻoní, kumi ki he Kau Fakamoʻoni ʻa Sihová.’”

Hangē pē ko ia naʻe manavahē ki ai ʻa Eugenia, naʻe tuku ia ki tuʻa ʻe hono fāmilí. Kae kehe, naʻe hokohoko atu pē ʻa hono tokoniʻi fakalaumālie ia ʻe he Kau Fakamoʻoní. ʻOkú ne fakamatala: “Naʻe fakaivimālohiʻi au ke u tuʻu maʻá e moʻoní. Naʻá ku ʻiloʻi ko ha meʻa ia ʻoku taau ke fai ha faitau ki ai. Ko e talitali lelei naʻá ku maʻu mei he Kau Fakamoʻoni ʻa Sihová naʻe mahuʻinga ʻaupito. Naʻá ku ongoʻi ʻa hono ʻofaʻi au ʻi he loto fakatahaʻanga Kalisitiané. Ko e ʻunu ʻo ofi ki he kautaha ʻa e ʻOtuá naʻá ne tokoniʻi au ke u ikunaʻi ʻa e manavahē ʻi he pau ke tuʻu tokotahá.”

Fakakaukau ange ki ha fakatātā ʻe taha. Naʻe tupu hake ʻa Sabrina ʻo anga ki he lāulea fakafāmili maʻu pē ʻo fekauʻaki mo e Tohitapú. Ko hono moʻoní, naʻa nau fakatupu ha founga ʻo ha ‘lotu fakafāmili.’ Naʻá ne tōʻongaʻaki ʻa e feohi mo e kau mēmipa ʻo e ngaahi lotu kehekehe ke fakaeʻa ʻenau ngaahi halá. ʻI he taimi naʻe tuʻuaki ange ai kiate ia ʻe ha taha ʻo e Kau Fakamoʻoni ʻa Sihová ha ako Tohitapú, naʻá ne tali lelei ia ʻi he taumuʻa ke fakahalaʻi ʻenau ngaahi tuí. ʻOkú ne fakamanatuʻi: “Hili ʻa e ako ʻo laka hake he taʻu ʻe tahá, naʻá ku hoko ʻo ilifia ʻi he mole ʻo ‘ʻeku moʻoní.’ Naʻá ku ʻiloʻi naʻe faingofua ke fakaeʻa ʻa e kākā ʻa e ngaahi lotu lahi kuó u kau ki aí, ka naʻe ʻikai ʻaupito ke faingofua ia he taimí ni.”

Naʻe ʻai ʻe he manavahē ʻa Sabrina ke ʻikai toe hoko atu ʻa ʻene ako Tohitapu mo e Kau Fakamoʻoni ʻa Sihová. Ka naʻá ne ongoʻi leva ʻa ʻene hala moʻoni mo ha meʻa fakalaumālie. Naʻá ne fili ai ke toe fai ʻene akó pea faifai atu pē ʻo ne tali ʻa e moʻoni foʻou ko ení. Naʻe fakalakalaka ʻa Sabrina ʻo aʻu ki he tuʻunga ʻo e loto ke vahevahe atu ki he niʻihi kehé ʻa e meʻa naʻá ne akó. Naʻe aʻu ʻo ne kole ke ō fakataha mo e Kau Fakamoʻoní ʻi heʻenau ngāue fakafaifekau fale ki he falé. ʻOku fakamatala ʻa Sabrina: “Ki muʻa ke maʻu ʻa e tali ke malanga fakataha mo e Kau Fakamoʻoni ʻa Sihová, naʻe ʻeke mai kiate au: ‘ʻOkú ke loto moʻoni ke hoko ko ha taha ʻo e Kau Fakamoʻoni ʻa Sihová?’ ‘ʻIkai!’ ko ʻeku talí ange ia. Naʻe toe lele hake ʻiate au ʻa e manavaheé.” Faifai atu pē, hili ʻa e hokohoko atu ke maʻu ʻa e ngaahi fakatahá kotoa ʻo siofi ʻa e kakai ʻa e ʻOtuá mo e anga ʻo ʻenau ngāueʻaki ʻa e ngaahi tefitoʻi moʻoni ʻi he Tohitapú, naʻe hoko ai ʻa Sabrina ki he fakamulituku ko e moʻoní totonu pē ia. Naʻá ne papitaiso pea ko ha tokotaha ʻevangeliō taimi-kakato ia he taimí ni.

Ko e Hā ʻOku Mātuʻaki Kehe Aí?

ʻE ʻeke nai ʻe ha taha, ‘Ko e hā ʻoku mātuʻaki kehe ai ʻa e ngaahi akonaki ʻa e Kau Fakamoʻoni ʻa Sihová mei he ngaahi lotu kehé?’ Ko ha vakai nounou ki he meʻa ʻoku tui ki ai ʻa e Kau Fakamoʻoní te ne tokoniʻi koe ke ke sio ai ko e kau Kalisitiane loto-moʻoni kinautolu, ko e kau ako loto-tōnunga ʻo e Tohitapú. ʻOku mau fakalototoʻaʻi koe ke ke sio hifo ki hoʻo Tohitapú tonu ki he ngaahi konga tohi ʻi he fakanounou ʻo ʻenau ngaahi tefitoʻi tuí ʻoku fakahaaʻi ʻi ʻolungá.

ʻI hono fai ha vakai ofi ange ki he meʻa ʻoku tui ki ai ʻa e Kau Fakamoʻoni ʻa Sihová mo e founga ʻo ʻenau pipiki ki he meʻa ʻoku akonakiʻaki ʻe he Tohitapú, ʻe lava ai ke tāpuakiʻiʻaki koe ʻa e tauʻatāina ʻoku tokonaki mai ʻe he moʻoní. (Sione 17:17) ʻOku ʻikai ha ʻuhinga ke manavahē ai ki he moʻoní. Manatuʻi ʻa e talaʻofa ʻa Sīsuú: “ʻE faifai pea mahino kiate kimoutolu ʻa e moʻoni, pea ʻe fakatauʻatāina ʻa kimoutolu ʻe he moʻoni.”​—Sione 8:​32.

[Puha ʻi he peesi 6]

KO E NGAAHI TEFITOʻI TUI ʻE NIʻIHI ʻA E KAU FAKAMOʻONI ʻA SIHOVÁ

◯ Ko Sihova ʻa e ʻOtua māfimafi-aoniú. ʻOku ʻasi ʻa hono huafa fakafoʻituituí ʻo laka hake he tuʻo 7,000 ʻi he ngaahi muʻaki maniusikilipi ʻo e Tohitapú.​—Sāme 83:18.

◯ Ko Sīsū Kalaisí ko e ʻAlo ia ʻo e ʻOtuá, ʻa ia naʻá ne haʻu ki māmani ke foaki ʻa ʻene moʻuí maʻá e faʻahinga ʻo e tangatá. (Sione 3:​16, 17) ʻOku muimui ʻa e Kau Fakamoʻoni ʻa Sihová ʻi he ngaahi akonaki ʻa Sīsū Kalaisí hangē ko ia ʻoku maʻu ʻi he ngaahi Kōsipelí.

◯ Ko e hingoa Kau Fakamoʻoni ʻa Sihová ʻoku makatuʻunga ia ʻi he Aisea 43:​10, ʻa ia ʻoku pehē: “Ko kimoutolu ʻa e kau fakamoʻoni aʻaku​—ko Sihova ia.”

◯ Ko e Puleʻanga ʻoku lotu ki ai ʻa e kakaí ʻi he lotu “Ko ʻEmau Tamai” ko ha founga-pule fakahēvani ia ʻe vavé ni ʻene toʻo atu ʻa e faingataʻa mo e mamahi kotoa ʻi he māmaní ke fakaʻataʻatā ki he Palataisi ko ia ʻoku talaʻofa ʻe he Tohitapú.​—Aisea 9:​6, 7 [Isaia 9:​5, 6, PM]; Taniela 2:​44; Mātiu 6:​9, 10; Fakahā 21:​3, 4.

◯ Ko e tokotaha kotoa ʻokú ne fai ʻa e finangalo ʻo e ʻOtuá ʻokú ne maʻu ʻa e faingamālie ke fiefia taʻengata ʻi he ngaahi tāpuaki ʻa e Puleʻangá.​—Sione 17:3; 1 Sione 2:​17.

◯ Kuo pau ke fakafuo ʻe he kau Kalisitiané ʻenau tōʻongá ki he lau ʻa e Tohitapú. Kuo pau ke nau feinga ke faitotonu, ke moʻui ʻi ha moʻui maʻa, ʻulungaanga taau, pea ke fakahāhā ʻa e ʻofa ki honau kaungāʻapí.​—Mātiu 22:39; Sione 13:35; 1 Kolinito 6:​9, 10.

[Fakatātā ʻi he peesi 5]

ʻOku fakaʻilo atu ʻe he Kau Fakamoʻoni ʻa Sihová ʻa e moʻoni ʻo e Tohitapú ki he kakai ʻi he ngaahi fonua laka hake he 200